Ukrainski sieryjał «Pryhonnaja» nazyvajuć novaj «Rabyniaj Izaŭraj». U čym sakret pośpiechu?
Ukrainski sieryjał «Pryhonnaja» staŭ chitom pa kolkaści prahladaŭ u Polščy. Jaho aŭdytoryja ŭ susiedniaj krainie raście niabačanymi tempami.
U sacsietkach pra jaho pišuć šarahovyja hledačy i polskija top-čynoŭniki, a viadučyja ŚMI sprabujuć razhadać sakret šalonaj papularnaści «mylnaj opiery» ŭkrainskaj vytvorčaści, jakuju ŭžo staviać u adzin šerah z brazilskaj «Rabyniaj Izaŭraj» i tureckim «Cudoŭnym viekam», piša bbc.com.
Dyk čamu ž palakam tak pryjšoŭsia daspadoby mienavita hety ŭkrainski sieryjał?
Pra što jon?
«Pryhonnaja» — heta kaściumavanaja mieładrama, źniataja kampanijami StarLight Films i Film.UA. Padziei adnosiać hledačoŭ u Niežyn XIX stahodździa. U hetym haradku na Čarnihaŭščynie žyvie zamožny pamieščyk Čarvinski, va ŭłasnaści jakoha — maładaja, vytančanaja i čaroŭnaja pryhonnaja Kaciaryna Viarbickaja.
Chrośnica žonki Čarvinskaha, Kaciaryna maje biezdakornyja maniery, viedaje niekalki zamiežnych moŭ, hraje na fartepijana i pryhoža maluje.
Kruciačysia ŭ kołach miascovych bahaciejaŭ, Kaciaryna zakachałasia ŭ pryvabnaha dvaranina Alaksieja Kasačova. Ale na šlachu da ščaścia maładych stanovicca Čarvinski. Kab zdabyć svabodu i atrymać prava lubić, Kaciaryna pieraadolvaje niamała pieraškod.
Joj daviadziecca pieražyć śmierć blizkich, vystajać ŭ połymi narodnaha paŭstańnia i nie stracić honar u brudzie kijeŭskich bardelaŭ.
Dzie zdymali, chto pakazvaŭ
Kab lepš pieradać atmaśfieru, stvaralniki sieryjała admovilisia ad štučnych paviljonnych dekaracyj. U śpisie łakacyj, dzie prachodzili zdymki — Kijeva-Piačerskaja Łaŭra i kijeŭski «Šakaładny damok», Nacyjanalny muziej narodnaj architektury i pobytu Pirahova, Nacyjanalny historyka-kulturny zapaviednik «Kačanoŭka», a taksama «Ternopalski Viersal» — Pałac Višniavieckich.
Pieršy siezon «Pryhonnaj» u lutym 2019 pakazaŭ ukrainski telekanał STB. Za pieršy tydzień pakazu sieryjał uznačaliŭ rejtynhi tranślacyj usich kanałaŭ Ukrainy ŭ budni.
Paśla pravy na pakaz ukrainskaj mieładramy nabyli Litva, Čarnahoryja, Sierbija, Bośnija i Hiercahavina, Makiedonija, Słavienija i Charvatyja.
Ale pieršym zamiežnym kanałam, jaki pakazaŭ «Pryhonnuju», staŭ polski hramadski viaščalnik TVP1, dla jakoha navat stvaryli šmathałosaje ahučvańnie na polskaj movie.
«Chit», «fienomien» i «źjava»
Mienavita tak nazyvajuć «Pryhonnuju» polskija ŚMI, kali pišuć pra ahłušalny pośpiech pracy ŭkrainskich kiniematahrafistaŭ.
Padstavaj dla hetaha źjaŭlajecca rejtynhi mieładramy. Pa dadzienych śpiecyjalizavanaha polskaha resursu Wirtualne Media, za pieršy tydzień pakazu aŭdytoryja «Pryhonnaj» skłała 1,23 miljona hledačoŭ. I heta pry tym, što epizody pakazvali ŭ viačerni prajm-tajm tolki z paniadziełka pa sieradu.
Za druhi tydzień prakatu «Pryhonnaj» kolkaść prychilnikaŭ sieryjała vyrasła da 1,79 miljona. Tamu kiraŭnictva TVP1 vyrašyła pakazvać jaho i ŭ vychodnyja.
«Aŭdytoryja sieryjała raście ad epizodu da epizodu, — piša Wirtualne Media. — Pieršy ź ich pierahledzieli 1,01 miljona hledačoŭ, apošni — 2,28 miljona ».
Jak adznačyła polskaje Radio Zet, heta nastolki ŭzradavała kiraŭnika polskaha hramadskaha hihanta TVP Jaceka Kurskaha, što jon napisaŭ u Twitter: «Dasiahnuli 3 miljonaŭ! Heta rekordnaja aŭdytoryja 27 epizodu. I jana raście. Heta ŭžo źjava. Dziakuj!».
U čym sakret pośpiechu?
Siarod pryčyn pośpiechu ŭkrainskaha sieryjała ŭ Polščy vydańnie Dziennik Zachodni nazyvaje hieahrafičny faktar. Vydańnie adznačaje, što da niadaŭniaha času palakam prapanoŭvalisia kaściumavanyja mieładramy pieravažna tureckaj vytvorčaści.
«Upieršyniu na našych ekranach źjaviŭsia sieryjał, dziejańnie jakoha adbyvajecca ŭ našych hieahrafičnych šyrotach, - piša Dziennik Zachodni. — siaredzina XIX stahodździa, kali razhortvajucca padziei «Pryhonnaj» — heta čas, kali Čarnihaŭ i Varšava, Lublin i Sasnaviec byli častkaj adnoj krainy i funkcyjanavali ŭ adnolkavych hramadska-palityčnych umovach».
Na dumku polskaha vydańnia, jašče adnoj pieravahaj pracy ŭkrainskich kiniematahrafistaŭ źjaŭlajecca toje, što ŭ sieryjale nie abminajuć pytańnie kłasavaha supraćstajańnia.
«U šmat jakich siołach situacyja była takoj, jak pakazana ŭ «Pryhonnaj». Akramia historyi kachańnia, u sieryjale chapaje scen prodažu sialan adnym uładalnikam inšamu. Možna ŭbačyć i vielizarnyja bizuny, jakim pan adłupcavaŭ kavala, kali toj advažyŭsia pajści suprać jaho», - dadaje Dziennik Zachodni.
Jašče adnoj pieravahaj ukrainskaha sieryjała, kali paraŭnać z łacinaamierykanskimi ci tureckimi, časopis nazyvaje toje, što pakazaana «žyćcio 170 hadoŭ tamu … nie tolki z punktu hledžańnia šlachty, ale i z punktu hledžańnia pryhniečanych sialan, jakija niahledziačy ni na što spadziajucca na lepšuju budučyniu».
Ukrainskaja «Rabynia Izaŭra»?
Nie abminuła ŭvahaj vialiki pośpiech ukrainskaha sieryjała i adna ź viadučych polskich haziet Gazeta Wyborcza.
U artykule «Brazilskaje kachańnie, ukrainskija bizuny: Ci jość «Pryhonnaja» fienomienam maštabu «Rabyni Izaŭry»?» Vydańnie adznačaje, što historyja ŭkrainskaj pryhonnaj šmat u čym paŭtaraje pierypietyi žyćcia čaroŭnaj i niesvabodnaj braziljanki.
Zrešty, Gazeta Wyborcza adznačaje «ŭražvajučyja» kaściumy i «malaŭničyja łakacyi», hledziačy na iakija, «mnohija hledačy zachočuć naviedać Ukrainu», a taksama «vydatny» akciorski skład — u stužcy zadziejničany jak viadomyja vykanaŭcy, tak i talenavityja pačatkoŭcy.
Akramia taho, praciahvaje Gazeta Wyborcza, pieravahaj «Pryhonnaj» jość i toje, što «stvaralniki źviartajuć uvahu na niepryjemnyja staronki ŭkrainskaj historyi, ź jakoj palaki mieli šmat ahulnaha».
Na dumku haziety, pośpiech ukrainskaha sieryjała ŭ Polščy abumoŭleny tym, što «ŭpieršyniu my nazirajem sintez mylnaj opiery z kaściumavanym žanram, ubudavanym u našu kulturu».
Bližejšym časam buduć vyzvaleny bolš za 150 palitźniavolenych39
Kamientary