Mienski aŭtazavod pačynaje pracavać u skaročanym režymie — try dni ŭ tydzień. Surjozna «urazajutsia» zarobki pracoŭnych.
Mienski aŭtazavod pačynaje pracavać u skaročanym režymie — try dni ŭ tydzień. Surjozna «urazajutsia» zarobki pracoŭnych.
Pieršymi navinu ab pierachodzie najbujniejšaha pradpryjemstva Biełarusi na skaročany pracoŭny tydzień pres‑centru Chartyi97 paviedamili sami pracoŭnyja MAZa, jakich siońnia pra heta apaviaścili na zavodzie.
«Z 2 lutaha MAZ pierajšoŭ na trochdzionny pracoŭny tydzień. Kankretna, 2, 6, 9, 13, 16, 20, 23, 27 lutaha abvieščany prastoj za tak zvanyja 2/3 zarpłaty», ‑‑ paviedamili pracoŭnyja. Hetuju infarmacyju pres‑centru Chartyi'97 paćvierdzili ŭ prafsajuzach.
«Tak, mnie taksama pra heta paviedamili siońnia ranicaj na MAZie. Ludzi nie buduć pracavać pa paniadziełkach i piatnicach. U hety paniadziełak, darečy, užo nie pracavali. Pracavać budzie tolki aŭtobusnaja vytvorčaść. Astatnija, u tym liku vytvorčaść aŭtamabilaŭ, skaračajuć pracoŭny tydzień», ‑‑ paviedamiŭ pres‑centru Chartyi'97 Uładzimir Łazoŭski, staršynia prafkama Mienskaj haradskoj pieršasnaj prafsajuznaj arhanizacyi, jakaja ŭvachodzić u skład prafsajuza REP.
Pavodle słovaŭ Uładzimira Łazoŭskaha, pracoŭnych MAZa čakaje surjoznaje skaračeńnie zarobkaŭ.
«Na pradpryjemstvie i biez taho ŭžo adbyłosia skaračeńnie zarpłaty, ludzi stracili ad 200 da 500 tysiačaŭ rubloŭ u suviazi z tym, što pracujuć u režymie niapoŭnaha času, abmiežavanyja samym surjoznym čynam roznyja dapłaty, premii. Zarpłata była 1 300 tysiačaŭ — 1400 tysiačaŭ. Zaraz ‑‑ ad 800 tysiačaŭ da 1 200 tysiačaŭ. I heta nie miaža, zarpłaty buduć jašče bolš skaračacca», ‑‑ paviedamiŭ prafsajuzny lider.
Na Mienskam aŭtazavodzie, jak i na ŭsich biełaruskich pradpryjemstvach, adbyvajucca zvalnieńni pracoŭnych. «Zvyčajnaja praktyka na niestabilnych vytvorčaściach ‑‑ praciahnieńnie kantraktaŭ vielmi prablematyčnaje. Na MAZie nie pierazaklučajucca kantrakty ź ludźmi pieradpiensijnaha ŭzrostu», ‑‑ skazaŭ Łazoŭski.
Na pradpryjemstvie raście kolkaść niezadavolenych.
«Ja dumaju, što kali ludzi atrymajuć płaciožki za kvartpłatu, jakaja ŭzrasła na 20 adsotkaŭ, ubačać raźlikovyja listy, vielmi mahčymyja stychijnyja vystupy.Razmovy siarod pracoŭnych iduć vielmi krytyčnyja», ‑‑ kanstatavaŭ prafsajuzny lider.
Kamientary