Ad mižnarodnaj biaśpieki da raźmiaščeńnia rakiet ZŠA — što abmiarkoŭvali ŭ Minsku Łukašenka i Patrušaŭ

Źmianieńni ŭ mižnarodnaj i rehijanalnaj biaśpiecy abmierkavany na sustrečy Alaksandra Łukašenki z sakratarom Rady biaśpieki Rasii Mikałajem Patrušavym. Ab hetym paviedamiŭ siońnia žurnalistam rasijski čynoŭnik pa vynikach sustrečy, pieradaje BIEŁTA.

«My ź im pahavaryli ab pytańniach stratehičnaj stabilnaści, ab tych źmianieńniach, jakija adbyvajucca ŭ mižnarodnaj i rehijanalnaj biaśpiecy, jak ich treba ŭličvać, jakija novyja vykliki i pahrozy i jaki ŭpłyŭ jany akazvajuć, jak treba reahavać na tyja dziejańni, jakija robiać našy partniory», - skazaŭ Mikałaj Patrušaŭ.

Sakratar Savieta biaśpieki pryvioŭ u prykład vychad Złučanych Štataŭ Amieryki z Dahavora ab abmiežavańni sistem procirakietnaj abarony ŭ pačatku 2000-ch i z Dahavora ab rakietach siaredniaj i mienšaj dalokaści ŭ hetym hodzie, a taksama zajavy ZŠA ab namiery raźmiaščać hetyja rakiety na Uschodzie. «Pierš za ŭsio jany bačać praciŭnikam Kitaj. Datyčycca nas heta ci nie? Viadoma, Rasii heta datyčycca, tamu što tyja rakiety, jakija buduć tam raźmieščany, dastajuć našu terytoryju. My pavinny heta ŭličvać», - adznačyŭ jon.

Mikałaj Patrušaŭ źviarnuŭ uvahu i na pytańni, źviazanyja z zabieśpiačeńniem biaśpieki ŭ jeŭrapiejskim rehijonie. U Rumynii ŭžo razhornuty sistemy procirakietnaj abarony, u bližejšy čas hetu zbroju płanujecca raźmiaścić u Polščy. «U błokach, u jakich raźmiaščajecca rakieta, mohuć raźmiaščać udarnuju rakietu, - rastłumačyŭ jon zakłapočanaść rasijskaha boku. - Heta tyja pretenzii, jakija my pradjaŭlali Złučanym Štatam, i naša reakcyja. My nie źbirajemsia pieršymi ničoha rabić, ale budziem reahavać na tyja vykliki i pahrozy, jakija buduć abaznačany».

Asobnaja ŭvaha ŭ čas sustrečy była ŭdzielena baraćbie z teraryzmam. Subiasiedniki syšlisia na dumcy, što dla procistajańnia hetaj pahrozie nieabchodna abjadnoŭvać namahańni. «Vielmi važna, kab nivodnaja dziaržava nie akazvała padtrymku terarystyčnym dziaržavam i nie vykarystoŭvała terarystyčnyja arhanizacyi ŭ niejki momant u svaich intaresach», - padkreśliŭ sakratar Savieta biaśpieki.

• 0
• 0
• 0
• 0
• 0
• 0