Zabojcam Zacharanki i Hančara pakul nie pahražaje ni rasstreł, ni pažyćciovaje źniavoleńnie. Tolki jość adno «ale»

Ad momantu źniknieńnia i, chutčej za ŭsio, zabojstva Juryja Zacharanki, Viktara Hančara i Anatola Krasoŭskaha prajšło ŭžo bolš za 20 hadoŭ. Pavodle biełaruskaha zakanadaŭstva, pryciahnuć da adkaznaści za ździajśnieńnie asabliva ciažkich złačynstvaŭ možna na praciahu 15 hadoŭ. Heta značyć, što zabojcy palitykaŭ užo nie adkažuć pierad sudom? Pra heta «Naša Niva» spytała ŭ jurysta i pravaabaroncy Paŭła Sapiełki.

Pavialičyć

Pavieł źviartaje ŭvahu, što ŭ 1999 hodzie siłaviki zaviali kryminalnyja spravy pa artykule 101 Kryminalnaha kodeksa redakcyi 1960 hoda «Naŭmysnaje zabojstva». Pavodle hetaha artykuła, abvinavačanym mahło pahražać ad troch da dziesiaci hadoŭ źniavoleńnia.

Ale Sapiełka źviartaje ŭvahu, što abvinavačańnie moža być pierakvalifikavanaje na artykuł 100 KK «Naŭmysnaje zabojstva pry abciažvajučych abstavinach», pakolki zabojcy mahli dziejničać «arhanizavanaj złačynnaj hrupaj» albo praz toje, što zabityja vykonvali «słužbovy albo hramadski doŭh». Pavodle hetaha artykuła, abvinavačanyja mahli być prysudžanyja da śmiarotnaha pakarańnia. I mienavita hety fakt mianiaje raskłady adnosna terminu daŭniny.

Artykuł 83 ciapierašniaha Kryminalnaha kodeksa praduhledžvaje: «Pytańnie ab užyvańni terminaŭ daŭniny da asoby, jakaja ŭčyniła złačynstva, za jakoje jamu moža być pryznačana pakarańnie ŭ vyhladzie pažyćciovaha źniavoleńnia abo śmiarotnaha pakarańnia, vyrašajecca sudom». To bok niahladziačy na termin daŭniny, kryminalnyja spravy, jakija mohuć praduhledžvać pažyćciovaje źniavoleńnie ci rasstreł, mohuć usio adno razhladacca ŭ sudzie.

Pry hetym, pavodle biełaruskaha zakanadaŭstva, abvinavačanych u takim razie ŭsio adno nie mohuć pakarać pažyćciovym albo vyšejšaj mieraj. Maksimum — pazbaŭleńnie voli.

Ale i heta nie ŭsio. Isnuje jašče adzin cikavy punkt zakanadaŭstva, tłumačyć Pavieł Sapiełka.

Termin daŭniny spyniajucca, kali da ich skančeńnia złačyniec ździajśniaje novaje naŭmysnaje złačynstva. 

Ličycca, što kryminalnik tak i nie staŭ na šlach vypraŭleńnia, a značycca, adlik terminu daŭniny pačynajecca z dnia ździajśnieńnia novaha złačynstva.

To bok kali na praciahu 1999-2014 zabojcy akazalisia datyčnymi choć da čahości — choć zachoŭvańnie zbroi, choć raspaŭsiud parnahrafii, choć finansavyja machinacyi, — rasstrelny artykuł znoŭ moža stać aktualnym.

• 0
• 0
• 0
• 0
• 0
• 0
• 0
• 0