Novaŭviadzieńnie zakranie nie ŭsio vojska, a tolki peŭnyja vajskovyja čaści. Ich pieralik stanie viadomy pa skančeńni ekśpierymientu. U ahulnavajskovy pajok dadaduć śmiatanu i syr.
Pra pierachod biełaruskich vajskoŭcaŭ na «šviedski stoł» paviedamiŭ namieśnik ministra abarony pa tyle hienierał-major Alaksandr Balihataŭ. Ciapier na bazie 50-j źmiašanaj avijacyjnaj bazy pravodzicca adpaviedny ekśpierymient, paviedamiła infarmahienctva «Interfaks-Zachad». Pavodle namieśnika ministra, sałdaty atrymajuć mahčymaść vybirać adnu ź dźviuch pieršych stravaŭ, adnu ź dźviuch druhich, kampot, małako, harbatu.
Varta adznačyć, što peŭnyja elemienty «šviedskaha stała», pra jakija kazaŭ hienierał-major Balihataŭ, užo niekalki hadoŭ vykarystoŭvajucca ŭ niekatorych čaściach krainy. Prynamsi, aŭtar hetych radkoŭ sutykaŭsia z takoj praktykaj piać hadoŭ tamu ŭ časie prachodžańnia vajskovaj terminovaj słužby ŭ radyjotechničnym pałku ŭ Navahrudku: tam vajskoŭcy taksama mieli mahčymaść vybaru stravaŭ.
Jak patłumačyŭ kiraŭnik pres-słužby Minabarony Viačasłaŭ Ramienčyk, novaŭviadzieńnie nie abmiažoŭvajecca adno mahčymaściu vybaru stravaŭ, treba kazać taksama i pra raspracoŭku novaha techničnaha zabieśpiačeńnia.Pa jaho słovach, dla palapšeńnia arhanizacyi charčavańnia vajskoŭcaŭ stvarajucca novyja linii, jakija dazvolać nablizić vajskovyja stałoŭki da pryncypaŭ «šviedskaha stała». Novaŭviadzieńnie zakranie nie ŭsio vojska: pa skančeńni ekśpierymientu budzie vyznačany pieralik vajskovych čaściej, dzie hetyja pryncypy buduć prymienienyja. «Vybar toj ci inšaj čaści zaležyć ad zadačaŭ, jakija jana vykonvaje» — padkreśliŭ kiraŭnik pres-słužby. Jon nahadaŭ taksama, što da kanca hodu ŭ vojsku buduć uviedzienyja novyja palepšanyja ahulnavajskovyja pajki. Ciapier sałdaty buduć užyvać jajki i sok štodnia, a nie raz na tydzień, taksama ŭ racyjon dadatkova ŭviaduć syr, śmiatanu i časnok, u niekatorych čaściach — polivitaminy.
Kamientary