Supracoŭnik «Rašy Tudej» Prydybajła źjaviŭsia kala BT, kali pajšli čutki pra zavoz rabotnikaŭ z Rasii. Chto heta?
«Naša Niva» paviedamlała ŭ svaim telehram-kanale pra mahčymy zavoz kadraŭ z Rasii na miescy zabastoŭščykaŭ u Biełteleradyjokampanii.
U pryvatnaści, u ścienach ustanovy byŭ zaŭvažany hramadzianin Rasii Kanstancin Prydybajła — u minułym biełaruski žurnalist, jaki ciapier pracuje ŭ struktury rasijskaha prapahandysckaha kanała «Raša Tudej».
Na pytańnie pra svaju datyčnaść da farmavańnia novaj kamandy BT Kanstancin adkazaŭ «NN» raspłyvista: «Zbolšaha tak. Ludzi zvalniajucca, treba kamuści pracavać. Šukajuć pa ŭsim rynku, u tym liku i ŭ Rasii. Ja pracavaŭ na «BT» u niekatorych ŚMI Rasii, i ciapier zachodziŭ da kaleh, i hetuju temu (pra kadry — «NN») my taksama abmiarkoŭvali».
Chto ž taki Kanstancin Prydybajła?
Daŭno žyvie na dźvie krainy
Kanstancin naradziŭsia ŭ Varkucie, da 2006 hoda žyŭ u Ižeŭsku. Paśla razam ź siamjoj pierajechaŭ na histaryčnuju radzimu baćkoŭ u Homielskuju vobłaść. Skončyŭ BDU pa śpiecyjalnaści «Sacyjalnaja psichałohija».
Sam siabie nazyvaje «nachabnikam» i «internet-zaležnym». Sprabavaŭ vieści svoj jutub-błoh, mužčynskuju kałonku ŭ časopisie «Horad žančyn».
Karjeru ŭ žurnalistycy pačynaŭ na radyjo, paśla prajšoŭ kastynh i vioŭ «Dobraj ranicy, Biełaruś» na Biełaruś-1. Potym jaho paciahnuła na hieahrafičnuju radzimu — u Rasiju.
Spačatku Kanstancin uładkavaŭsia namieśnikam hałoŭnaha redaktara na rehijanalny kanał Life78 — heta filijał razhalinavanaj struktury tabłoida Lifenews. Miedyja ŭlapałasia ŭ hučny skandał, kali paśla hutarki z karespandentam vydańnia skončyła žyćcio samahubstvam dačka vice-śpikiera parłamienta Sankt-Pieciarburha.
Nie prapracavaŭšy ŭ Rasii i dva hady, Prydybajła zajaviŭ, što znoŭ płanuje viarnucca na «Biełaruś-1». Chadzili čutki, što jon choča zapuścić hučny prajekt i stać šoŭmienam nakštałt Ivana Urhanta.
Ale niešta nie skłałasia znoŭ: na heta miesca ŭziali Jaŭhiena Pierlina, a Prydybajła znoŭ pajechaŭ u Rasiju.
Spačatku byŭ namieśnikam hałoŭnaha redaktara na «Radyjo Kamsamolskaja praŭda». Siońnia ž jon u šerahach karespandentaŭ Russia Today. U hety momant aśviatlaje dla kanała temu biełaruskich vybaraŭ i ich nastupstvaŭ.
«Pucin kruty. Łukašenka taksama kruty», — napisaŭ jon 9 žniŭnia. Praź niekalki hadzin jaho zatrymali amapaŭcy, ale nieŭzabavie adpuścili.
Krytykuje ŭsio biełaruska-apazicyjnaje, padłaščvajecca da Sałaŭjova
Da aśviatleńnia žurnalistam padziej ź Biełarusi jość šmat pytańniaŭ.
Tak, u svaich repartažach dla RT, Kanstancin rehularna dazvalaje sabie źnievažalna adhukacca pra apazicyju i jaje lidaraŭ. U adnym sa strymaŭ jon nazyvaje Maryju Kaleśnikavu «hnusnoj sukoj, kotoraja pieriestała popadať v jeho sieksualnyj koridor». Pra ŭvieś abjadnany štab raniej vykazvaŭsia, što heta tolki pryhožaja karcinka, ź jakoj paśla budzie «dupa».
Nie abychodzić uvahaj jon i byłych kaleh: zvolnienych z TB viadučych — Jaŭhiena Pierlina i Uładzimira Burko ŭ kamientach dla šou Uładzimira Sałaŭjova «Połnyj kontakt» jon prama nazyvaje «pierieobuvšimisia v poletie». Na pohlad Prydybajły, jany syšli z telebačańnia tolki dziela taho, kab ich praciahvali klikać na karparatyvy.
Paśla dziaržaŭnaha mierapryjemstva ŭ Kijeŭskim skviery, na jakim dydžei ŭklučyli «Pieramien» Coja, Prydybajła padtrymlivaŭ mienavita pazicyju kiraŭnika administracyi Centralnaha rajona Źmitra Piatrušy, jaki vyklikaŭ na dydžejaŭ milicyju. Nazyvaŭ čynoŭnika hierojem. Taksama jon — rabotnik zamiežnaha miedyja — vystupaje za toje, kab usie zamiežnyja ŚMI pracavali ŭ Biełarusi z paznakaj «zroblena za miažoj», kab prybrać z krainy nie pažadanych «zamiežnych ahientaŭ».
U svaich dopisach Prydybajła zachaplajecca Uładzimiram Sałaŭjovym i ŭ pryncypie reśpiektuje ruskamu miru. Ale navat pracujučy z Rasii, pastajanna znachodzić čas, kab ačarnić ci nasalić biełarusam, jakija niejkim čynam adychodziać ad łukašenkaŭskaj palityki ci vystupajuć za nacyjanalnyja kaštoŭnaści.
Tak, mienavita Prydybajła ŭ svoj čas napisaŭ zajavu ŭ padatkovuju inśpiekcyju na palityčnaha błohiera Eduarda Palčysa, kali toj pačaŭ źbirać srodki na svoj sajt 1863x.com. Prachodziŭsia pa adznakach Hanny Śmilevič, napisaŭ skarhu ŭ Mininfarm na kyky.org.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Hajdukievič paraiŭ biełarusam, jakija nie ździajśniali złačynstvaŭ, «adsiedzieć i žyć dalej»19
Kamientary