Hraf Śmiećcievaje Viadro prajhraŭ lidaru Reform UK Faradžu na davybarach u parłamient Vialikabrytanii
Najdžeł Faradž nabraŭ 22 239 hałasoŭ u akruzie Kłektan, abyšoŭšy Hrafa Binfejsa (Śmiećcievaje Viadro) na 12 784 hałasy.
Lidar brytanskaj pravapapulisckaj partyi Reform UK Najdžeł Faradž pieramoh na dadatkovych vybarach u akruzie Kłektan, ale admoviŭsia prysutničać na abviaščeńni vynikaŭ, piša The Huffington Post.
Faradž atrymaŭ 22 239 hałasoŭ, abyšoŭšy svajho hałoŭnaha supiernika, Hrafa Binfejsa (Count Binface, Hraf Tvar — Śmiećcievaje Viadro, abo Śmiećcievatvary) — satyryčnaha piersanaža, stvoranaha komikam Džo Charvi, jaki atrymaŭ 9 455 hałasoŭ. Jaŭka na vybarach skłała 44,37%.
Aficyjnaje abviaščeńnie pra pieramohu Faradža ŭ centry volnaha času Kłektana sustreli pieravažna maŭčańniem. Sam Faradž i bolšaść siabraŭ jaho partyi nie prysutničali na cyrymonii abviaščeńnia vynikaŭ. Partyja Reform UK biez tłumačeńnia pryčyn taksama admianiła zapłanavany na ranicu piatnicy vystup Faradža ŭ Kłektanie.
Unačy Faradž užo abviaściŭ pra svaju pierakanaŭčuju pieramohu, zajaviŭšy, što vybarščyki «pakazali siaredni palec» palityčnamu isteblišmientu, piša Bi-bi-si.
Hraf Binfejs, za jakim staić komik Džon Charvi, — voin z płaniety Sigma IX. Na publicy jon źjaŭlajecca ŭ čorna-šeraj formie, doŭhim płaščy i šlemie ŭ formie śmiećcievaha viadra. Jon užo amal dziesiać hadoŭ rehularna vyłučajecca ŭ tych ža akruhach, što i viadučyja brytanskija palityki. Naprykład, u 2017 hodzie jon supraćstajaŭ premjer-ministru Terezie Mej u jaje rodnaj akruzie Mejdenched, taksama bałatavaŭsia ŭ adnoj akruzie z premjeram Ryšy Sunakam.
Davybary byli pryznačanyja ŭ suviazi z tym, što Faradž, jaki pradstaŭlaŭ akruhu ŭ nižniaj pałacie brytanskaha parłamienta, 7 lipienia abviaściŭ, što daterminova składaje svaje paŭnamoctvy. Praŭda, jon adrazu daŭ zrazumieć, što znoŭ budzie bałatavacca na hetaje miesca.
Taksama ŭ vybarach udzielničali try kandydaty ad Žachliva-biazhłuzdaj partyi varjataŭ i aktor Łoŭrens Foks.
Charvi vykarystoŭvaje vobraz Hrafa Binfejsa nie tolki dla taho, kab vyśmiejvać brytanskuju palityku i jaje čapurystyja tradycyi, ale i kab stymulavać dyskusii pra demakratyju i zaachvočvać vybarščykaŭ da ŭdziełu.
Na davybarach u akruzie Kłektan jon udzielničaŭ, kab pasprabavać nie puścić u parłamient papularnaha papulista Najdžeła Faradža.
Ciapier čytajuć
Minski miedyk pajšoŭ vajavać za Rasiju, praź miesiac atrymaŭ ciažkaje ranieńnie, a ciapier vybivaje vypłaty, siedziačy ŭ invalidnym vazku28
Minski miedyk pajšoŭ vajavać za Rasiju, praź miesiac atrymaŭ ciažkaje ranieńnie, a ciapier vybivaje vypłaty, siedziačy ŭ invalidnym vazku
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1414
Kamientary
Ścisła: "Majho Łondana ŭžo, na žal, niama", "Pradaviec u centry Łondana ledźvie zmoh zrazumieć, što ja kažu", ... ihd.