Žychara Chojnikaŭ z rasijskim pašpartam Dźmitryja Kulička asudzili na 15 sutak za ŭdzieł u akcyi ŭ Minsku 9 žniŭnia. Jon adsiedzieŭ piać sutak, vyjšaŭ na volu i bolš nie ŭdzielničaŭ u mitynhach. Adnak praz try miesiacy jaho apaviaścili ab vysyłcy z krainy i dali na zbory try dni, paviedamlajuć Mocnyja naviny.
Małady čałaviek nie razumieje, čamu jamu daviałosia na hod pakinuć Biełaruś i na jakich padstavach jaho vysłali z krainy za adzin pratakoł za administracyjnaje parušeńnie pavodle artykuła 23.34 KaAP.
«Časam ja zabyvaju, što ŭ mianie rasijskaje hramadzianstva. Ja naradziŭsia, vyras, vučyŭsia i žyŭ u Biełarusi, u Chojnikach. U mianie jość dazvoł na žycharstva, dziakujučy jakomu ŭ mianie takija ž pravy, jak i ŭ biełarusaŭ. Paśla piaci pravaparušeńniaŭ za hod vynosicca pytańnie ab departacyi. U mianie ni adnaho parušeńnia za apošni hod, za vyklučeńniem 9 žniŭnia. Ja ŭdakładniaŭ ŭ prakurora pytańnie departacyi. Mnie skazali, što šancy na vysyłku roŭnyja nulu. Toje ž samaje mnie skazaŭ supracoŭnik MUS, maŭlaŭ, za jaho 20-hadovuju słužbu nikoha nie vysyłali z krainy za adno parušeńnie», — raspaviadaje Dźmitryj.
«Sutki» paśla zatrymańnia Dźmitryj adbyvaŭ na Akreścina. Jamu, jak jon kaža, pašancavała. Pryvieźli zatrymanych pozna ŭviečary, noč jany prastajali ŭ dvoryku. Chłopca pasadzili ŭ kamieru z volnymi naziralnikami, ich nie bili. Choć z susiednich kamier danosilisia kryki. Dźmitryj kaža, było strašna.
«Prysudzili 15 sutak. Adsiedzieŭ piać pad padpisku, što nie budu chadzić na akcyi. Niekatory čas pracavaŭ i žyŭ u Minsku, ale daviałosia viarnucca ŭ Chojniki. Mianie stali časta vyklikać na razmovy ŭ orhany. Žyŭ spakojna, na mitynhi nie chadziŭ, ale raptam daviedaŭsia pra vysyłku. Ja daviedaŭsia 4 listapada a 7 listapada mianie nie pavinna było być u krainie. Mnie patłumačyli heta tak: dakumienty išli doŭha, supracoŭniki orhanaŭ razhrabalisia z zavałami. «Nam prychodziać narešcie papiery, vas departujuć. Prabačcie» — voś, što ja pačuŭ ad supracoŭnikaŭ pravaachoŭnych orhanaŭ», — dzielicca svajoj historyjaj z «Mocnymi Navinami» Dźmitryj Kuličok.
Małady čałaviek moh abskardzić rašeńnie, ale nie vieryŭ u heta. Zaraz Dźmitryj znachodzicca ŭ Rasii ŭ svajakoŭ, uładkavaŭsia na pracu. Praz hod płanuje viarnucca ŭ Biełaruś, ale nie vyklučaje, što za hety čas niešta moža źmianicca. «Ciažka ŭśviedamlać, što mianie departavali. Blizkija ciažka heta pryniali, asabliva mama i siastra. Siabry mianie padtrymlivajuć», — kaža chłopiec.
-
«Tarmazi, tarmazi, b****!» Źjaviłasia videa pra raściahnutyja na darozie na miažy Rasii i Biełarusi šypy
-
U «śpis terarystaŭ» dadali dzieviać čałaviek, u tym liku kiraŭnika «Novaha zroku»
-
Dabracca maršrutkaj z Hrodna ŭ Viciebsk možna budzie bieź pierasadak — heta adzin z samych doŭhich maršrutaŭ u krainie
Kamientary