Staličnyja kvatery buduć tańnieć i letam

— Jašče letaś u śniežni ja moh pradać svaju standartnuju dvuchpakajovuju kvateru ŭ Šabanach prykładna za 75 tysiač dołaraŭ, a ciapier jaje "čyrvony košt" składaje kala 53 tysiač "zialonych",

— padzialiŭsia z hazietaj svaimi razvažańniami Alaksandr z Minska. — Kali ž adbudziecca spynieńnie abvału cenaŭ na staličnuju nieruchomaść?"

Tempy patańnieńnia pačali znižacca

Pavodle infarmacyi ekśpiertaŭ žyllovaj nieruchomasci, za pieršyja try miesiacy hoda ceny na druhasnym rynku kvater u Minsku znizilisia prykładna na 20 pracentaŭ. Razam z tym, siońnia padličana, što ŭ krasaviku kvatery patańnieli tolki na 3,5 pracenta.

Sama mocna košt kvater abvalvaŭsia ŭ sakaviku i pačatku krasavika, kali kvadratny mietr žylla tańnieŭ na 25—30 dalaraŭ štotydniova.

Kiraŭnik ahienctva "BiełTCN", staršynia savieta Biełaruskaj asacyjacyi "Nieruchomaść" Mikałaj Prastałupaŭ adznačaje, što siońnia ceny na druhasnym rynku staličnych kvater pačynajuć pakrysie stabilizavacca, bo znižeńnie koštu kvadratnaha mietra składaje tolki 5—8 dalaraŭ za tydzień. Macniej za ŭsio praciahvajuć tańnieć ciapier vialikija pa płoščy šmatpakajovyja kvatery. Tak, kvadratny mietr troch- i čatyrochpakajovych kvater i ciapier praciahvaje tańnieć tempam u siarednim ad 13 da 23 dalaraŭ za tydzień.

Pakupniki šukajuć tannyja kvatery

Mikałaj Prastałupaŭ adznačyŭ na rynku novuju tendencyju, kali na fonie zamarudžvańnia tempaŭ padzieńnia cenaŭ na kvatery, patencyjalnyja pakupniki pačali bolš aktyŭna cikavicca žyllom. U vyniku ŭ krasaviku ŭ stalicy było zarehistravana bolš za 700 ździełak kupli-prodažu žyllovaj nieruchomasci.

Pavodle statystyki infarmacyjnaha katałoha respublikanskaha vydańnia "Nieruchomaść Biełarusi", siaredni košt kvadratnaha mietra prapanovy adnapakajovych kvater składaje kala 1505 dalaraŭ, dvuchpakajovych — 1480, trochpakajovych kvater — 1470 dalaraŭ.

Razam z tym, Mikałaj Prastałupaŭ adznačaje, što pa takim košcie kvatery pradajucca tolki ŭ sapraŭdy likvidnych punktach stalicy.

Siońnia realna nabyć standartnuju adnapakajovuju kvateru ŭ spalnych rajonach Minska, kali kvadratny mietr ahulnaj płoščy takoha žylla budzie kaštavać kala 1350 dalaraŭ.

Ździełki pa kupli-prodažu dvuchpakajovych i šmatpakajovych kvater realna ažyćciaŭlajucca ŭ tych vypadkach, kali košt kvadratnaha mietra žylla prapanujecca na ŭzroŭni 1200—1300 dalaraŭ. U śpiecyjalizavanych infarmacyjnych katałohach źjavilisia nievialikija dvuchpakajovyja kvatery ahulnaj płoščaj da 46 kvadratnych mietraŭ u starych piacipaviarchovych damach pa košcie ad 48 da 53 tysiač dalaraŭ.

Navat u likvidnych spalnych rajonach usio čaściej standartnyja dvuchpakajovyja kvatery prapanujucca pa košcie ad 55 da 65 tysiač dalaraŭ. Daražejšaje žyllo siońnia popytam amal nie karystajecca.

Patencyjalnych pakupnikoŭ kvater "adbiraje" dolevaje budaŭnictva

U apošnija try miesiacy na staličnym rynku žylla praciahvajecca pašyreńnie prapanoŭ pa linii dolevaha budaŭnictva. Padčas finansavaj niestabilnasci ŭ budučych dolnikaŭ isnavali apasienni, što dolevaje budaŭnictva moža być zamarožana, kali ŭ častki małazabiaśpiečanych klijentaŭ buduć ciažkasci z finansavańniem.

Kab peŭnym čynam aktyvizavać dolevaje budaŭnictva ŭ hałoŭnym miehapolisie krainy, kiraŭnictva Minharvykankama jašče ŭ sakaviku padrychtavała rašeńnie № 101, zhodna ź jakim klijentam, što zaklučyli z budtrestami dahavor dolevaha budaŭnictva, davałasia mahčymaść vykarystoŭvać na hetyja mety lhotnyja kredyty pad 5 pracentaŭ hadavych na 20 hadoŭ. Da apošniaha času takija kredyty dolnikam nie vydavalisia, bo vyšejnazvanaje rašeńnie staličnych uładaŭ nie ŭ poŭnaj miery stasavałasia z normami Ukaza kiraŭnika dziaržavy № 185 "Ab vydzialenni hramadzianam ilhotnych kredytaŭ na budaŭnictva ci nabyćcio žylla". Nieŭzabavie lhotnyja kredyty na budaŭnictva žylla dolniki pačali atrymlivać užo ŭ pieršaj dekadzie maja, kali hetyja sprečnyja momanty byli razhledžany śpiecyjalistami Nacyjanalnaha banka krainy.

Siońnia budaŭničyja arhanizacyi prapanoŭvajuć svaim klijentam zaklučać dahavory dolevaha budaŭnictva, dzie kvadratny mietr kvater budzie kaštavać dla dolnikaŭ ad 1100 da 1500 dalaraŭ.

Vidavočna, što pry takim raskładzie cenaŭ patencyjalnyja klijenty ahienctvaŭ nieruchomasci ŭsio čaściej razhladajuć varyjanty dolevaha budaŭnictva abo nabyćcia žylla ŭ novabudoŭlach. Hetu tendencyju paćviardžajuć i apošnija žyllovyja aŭkcyjony, na jakich MAPID pradavaŭ svaje novyja kvatery. Nahadaju, što ŭ apošni dzień krasavika i ŭ mai UP "Minski haradski centr nieruchomasci" sumiesna z AAT "MAPID" pradavali kvatery biez apracoŭki ŭ panelnych damach pa košcie kvadratnaha mietra žylla krychu bolš za tysiaču dołaraŭ. Śpiecyjalisty rynku nieruchomasci ŭpeŭnieny, što mienavita na aŭkcyjonnyja ceny kvater, ź ciaham času, buduć raŭniacca amal usie ŭdzielniki druhasnaha rynku žylla.

Patańnieńnie praciahniecca minimum da vosieni

Sioleta ŭ stalicy płanujecca pabudavać kala 20 tysiač kvater, ź jakich bolš za 75 pracentaŭ žylla budzie prapanoŭvacca dla asobaŭ z patrebaj u palapšenni žyllovych umoŭ. Razam z tym, siońnia ŭ žyllovych čerhach stalicy staić bolš za 240 tysiač hramadzian i siemjaŭ. Vidavočna, što različvać na novuju kvateru ŭ najbližejšyja hady zmohuć daloka nie ŭsie "čarhaviki".

Z inšaha boku, siońnia na druhasnym rynku staličnych kvater u svabodnym prodažy znachodzicca ŭžo bolš za 10 tysiač kvater, popyt na bolšaść ź jakich minimalny. Uličvajučy hetuju akaličnaść, Mikałaj Prastałupaŭ prahnazuje, što na praciahu letnich miesiacaŭ "miortvaha" rynkavaha siezona staličnyja kvatery buduć i nadalej tańnieć nievialikimi tempami. Jak buduć siabie pavodzić ceny na žyllo vosieńniu, budzie zaležać ad mnohich faktaraŭ. U pieršuju čarhu — ad ahulnaj ekanamičnaj situacyi ŭ śviecie i ŭ našaj krainie, ad koštu kredytaŭ dla nasielnictva i sabiekoštu budaŭnictva žylla.

• 0
• 0
• 0
• 0
• 0
• 0
• 0
• 0