Šafiora z Navapołacka aryštavali za abrazu vykładčycy fizkultury Akademii MUS
Kryminalnaja sprava zaviedzienaja adrazu pa dvuch artykułach: Raspalvańnie sacyjalnaj varažniečy (art. 130) i Abraza pradstaŭnika ŭłady (art. 369). Moža pahražać da piaci hadoŭ źniavoleńnia.
26-hadovaha Jaŭhiena Charaškieviča zatrymali 19 studzienia rankam. «Byŭ maroz, i jon vyjšaŭ raniej z chaty, kab prahreć aŭtamabil. Kali viartaŭsia, to jon išoŭ napieradzie, a za im dva ci try čałavieki, nie ŭ kajdankach, ničoha. Skazaŭ, što zatrymlivajuć.
Paźniej doma pravodzili pieratrus supracoŭniki HUBAZiKa, kanfiskavali kampjutar. Ženia taksama zajmajecca strajkbołam, to zabrali try aŭtamaty i adzin pistalet strajkbolnyja. Taksama jon krychu zajmajecca majninham, apisali videakarty, ale pakinuli doma. Chacieli kanfiskavać hrošy i kartki bankaŭskija, ale pakinuli», — raskazvajuć znajomyja.
Samoha Jaŭhiena adrazu advieźli ŭ Viciebsk na dopyt u Śledčy kamitet, a potym było vyrašana pakinuć jaho pad vartaj. Vobšuk pravodziŭsia ŭ ramkach kryminalnaj spravy, zaviedzienaj pa dvuch artykułach. A što stała padstavaj?
«Havorka pra abrazu Natalli Pietuchovaj. Jana ź vioski Śviača Biešankovickaha rajona».
Natalla Pietuchova spačatku sama vučyłasia ŭ Akademii MUS, a potym zastałasia tam pracavać vykładčycaj fizičnaha vychavańnia, za čas vučoby jana nie raz pakazvała dobryja vyniki ŭ biehu.
Jaŭhien Charaševič da śniežnia 2020 hoda pracavaŭ kiroŭcam na Połackim małočnym kambinacie, ale potym jamu vyrašyli nie praciahvać kantrakt. Znajomy jaho kaža, što načalstvu nie spadabałasia, kali Charaševič vyrašyŭ stać niezaležnym naziralnikam na vybarach 9 žniŭnia. Jamu doŭha nie davali vychadny, ale mužčyna znojšoŭ šlach, jak vykrucicca — pajšoŭ zdaŭ kroŭ u jakaści donara, a na nastupny dzień jamu praduhledžvaŭsia vychadny. Jaŭhien adrazu pajechaŭ u viosku Farynava Połackaha rajona, adkul rodam, kab tam nazirać za vybarami.
12 žniŭnia Charaševiča zatrymali prosta na terytoryi kambinata, nibyta jon zaklikaŭ ludziej jechać u Minsk padtrymać pratesty. Praŭda, užo praz dva dni vyzvalili, kali adpuskali ŭsich palitźniavolenych, što siadzieli pa administracyjnych artykułach. U vyniku Jaŭhiena navat apraŭdali pa hetym «pravaparušeńni».
Za apošnija paŭhoda Charaševiča dvojčy vyklikali ŭ Śledčy kamitet dla dačy pakazańniaŭ. Spačatku za bojku z AMAPam, jakaja była 10 žniŭnia ŭ Navapołacku, ale Jaŭhien u toj dzień byŭ u kamandziroŭcy ŭ Hłybockim rajonie. Pakazvali roznych ludziej, pytalisia, ci paznaje kaho. A ŭ śniežni praviali razmovu adnosna «destruktyŭnych paviedamleńniaŭ» u telehramie, ale nie zatrymlivali.
U śniežni źjaviŭsia źliŭ BYPOL ab ludziach, jakija znachodziacca ŭ raspracoŭcy HUBAZiKa, siarod ich byŭ i Jaŭhien Charaševič. «Miežy zakryvalisia litaralna praz paru dzion, było zusim mała času na toje, kab pryniać rašeńnie. Jon usio ž vyrašyŭ nikudy nie źjazdžać, žonka na toj momant była na čaćviortym miesiacy ciažarnaści, dyj z hrašyma nie tak usio dobra».
Pres-słužba MUS paviedamiła, što na Charaševiča vyjšli supracoŭniki viciebskaha HUBAZiKa ŭ ramkach «pošuku asobaŭ z ekstremisckimi pohladami, jakija padtrymlivajuć prychilnikaŭ masavych biesparadkaŭ».
Usiaho pa roznych palityčna matyvavanych kryminalnych spravach u Biełarusi prachodziać kala 1000 čałaviek, 189 ź ich pravaabaroncy ŭžo aficyjna pryznali palitviaźniami.
Brat udavy Zielcara: Kadebisty išli ŭ kvateru pa mianie1
Kamientary