Sud pa spravie Cichanoŭskaha ŭ Hrodnie: na lačeńnie milicyjantaŭ patracili pa 500 rubloŭ
U sudzie Kastryčnickaha rajona Hrodna 8 lutaha praciahvajecca razhlad spravy za incydent na vybarčym pikiecie 29 maja pa tak zvanaj «spravie Cichanoŭskaha». Na łavie padsudnych znachodziacca troje ź dziesiaci fihurantaŭ kryminalnych spraŭ za 29 maja: Dźmitryj Furmanaŭ, Jaŭhien Raźničenka i Uładzimir Kniha. Paciarpiełymi pa spravie pryznanyja čatyry supracoŭniki milicyi. Na pieršy dzień suda źjavilisia tolki dvoje — Uładzimir Kazłoŭski i Alaksandr Chvalenia, na nastupny dzień płanavaŭsia ich dopyt. Ale na sud jany nie źjavilisia z pryčyny taho, što jany «zadziejničanyja ŭ achovie hramadskaha paradku ŭ suviazi z Chryščeńniem». Jašče dvoje paciarpiełych amapaŭcaŭ nie źjavilisia na sud z pryčyny siesii i chvaroby. U sudzie abviaścili pierapynak dla zabiaśpiačeńnia jaŭki ŭsich čatyroch paciarpiełych milicyjantaŭ. Ale i na treciaje sudovaje pasiedžańnie jany nie źjavilisia, piša spring96.org.
Što adbyvajecca na sudzie?
Nahadajem, Dźmitryja Furmanava, Jaŭhiena Raźničenku i Uładzimira Knihu abvinavačvajuć u aktyŭnym udziele ŭ dziejańniach, jakija hruba parušajuć hramadski paradak 29 traŭnia ŭ Hrodnie (č.1 art. 342 KK). Akramia hetaha, Raźničenku i Knihu abvinavačvajuć u hvałtoŭnych dziejańniach u dačynieńni da milicyjantaŭ (art. 364 KK). Abvinavačanyja nie pryznajuć svajoj viny pa ŭsich epizodach.
Spravu razhladaje sudździa Kastryčnickaha rajona Hrodna Volha Biekušava. Dziaržaŭnaje abvinavačvańnie pa spravie padtrymlivaje starejšy pamočnik prakurora Hrodna Mikita Myśliviec. Pa spravie pryznanyja čatyry paciarpiełyja milicyjanty. Na sud u pieršy dzień źjavilisia tolki dva paciarpiełyja ad dziejańniaŭ Raźničenki i Knihi supracoŭniki milicyi — Uładzimir Kazłoŭski i Alaksandr Chvalenia. Paciarpiełyja supracoŭniki AMAPa — Rachunok i Budnik — na sud nie zmahli źjavicca pa pryčynie chvaroby i siesii. Učastkovy Kazłoŭski, jaki apynuŭsia 29 traŭnia padčas pikieta na ziamli, na pieršym sudovym pasiedžańni zajaviŭ pazoŭ da Raźničenki ab kampiensacyi maralnaj škody na sumu 8 000 rubloŭ.
U pieršy dzień suda dapytali palitźniavolenaha Dźmitryja Furmanava, jaki raspavioŭ, što 29 traŭnia prosta źbiraŭ podpisy na Savieckaj płoščy, paśla čaho jaho zatrymali.
Treci dzień suda
Užo treciaje sudovaje pasiedžańnie čakajecca dopyt paciarpiełych milicyjantaŭ. Ale i 8 lutaha na pačatak sudovaha pasiedžańnia jany nie źjavilisia, bo nibyta nie atrymali apaviaščeńnia pra sud. Dvoje milicyjantaŭ, Kazłoŭski i Chvalenia, paabiacali pryjści na nastupnaje pasiedžańnie — užo na čaćviortaje sudovaje pasiedžańnie. Načalnik AMAPaŭcaŭ Rachunka i Budnika paviedamiŭ, što tyja nie pryjduć na sud, bo «nieviadomaja rasstanoŭka bajcoŭ u hety dzień».
«Značyć, u susiedni budynak apaviaščeńnie dajšło, a ŭ milicyju — nie», — adreahavała na heta sudździa Biekušava.
Zhodna z abvinavačańniem, Raźničenka schapiŭ Kazłoŭskaha za tułava i pavaliŭ jaho na tratuarnuju plitku. Chvaleniu jon vyciaŭ nia mienš za dva razy pa nahach i nižniaj častcy tułava, a Kazłoŭskaha nie mienš za dva razy pa tułavie nieviadomymi pradmietami. U vyniku ŭ Chvaleni byŭ paškodžany videarehistratar, a ŭ Kazłoŭskaha — rukaŭ formiennaha abmundziravańnia i słužbovyja boty.
Sudździa pryznačyła dopyt Kazłoŭskaha i Chvaleni na 14:45.
Na lačeńnie milicyjantaŭ patracili pa 500 rubloŭ
Jak paviedamlaje «Radyjo Svaboda», na sudzie pamianiali paradak daśledavańnia dokazaŭ. Prakuror Mikita Myśliviec začytaŭ piśmovyja materyjały spravy. Jon ahučyŭ traŭmy, jakija zafiksavali ŭ Furmanava na nastupny dzień paśla zatrymańnia: rana za vucham, krovapadcioki i ranki na tvary, u rajonie ruki, pojasa, kalena.
«Jak vy atrymali paškodžańni?» — zapytałasia sudździa ŭ Furmanava.
«Padčas zatrymańnia na Savieckaj płoščy. Na vulicy, a taksama, vidać, kali straciŭ prytomnaść u aŭtobusie», — adkazaŭ Furmanaŭ.
U Knihi paśla zatrymańnia zafiksavali krovapadciok na vusie pamieram 3×4 santymietry.
Z materyjałaŭ spravy stała viadoma, što na lačeńnie milicyjantaŭ Kazłoŭskaha i Chvaleni spatrebiłasia amal pa 500 rubloŭ. Infarmacyju dała lakarnia chutkaj dapamohi. Kolki kaštavała lačeńnie Furmanava i Knihi — nie paviedamili.
Da taho ž prakuror začytaŭ košt ryštunku, jaki paciarpieŭ padčas incydentu na płoščy: narukaŭnik z adznakami — 3 rubli 88 kapiejek, boty chramavanyja — 42 rubli 30 kapiejek, miehafon — 30 rubloŭ 31 kapiejka. Ramont dźviarej mikraaŭtobusaŭ, kudy sadžali zatrymanych, abyšoŭsia amal u 230 rubloŭ.
Da materyjałaŭ spravy, jak stała viadoma ad prakurora, dałučyli videazapisy, jakija raźmiaščali ŭ telehram-kanale «Biełaruś hołovnoho mozha» (jahony administratar Ihar Łosik 7,5 miesiaca znachodzicca pad vartaj), a taksama z telehram-kanała, jaki pryznany ŭ Biełarusi ekstremisckim. Jahonuju nazvu dziaržaŭny abvinavaŭca začytvaŭ uhołas.
Kamientary