Za hod kolkaść rabotnikaŭ, što pracujuć niapoŭny čas, vyrasła ŭ vosiem razoŭ

U Biełarusi zachoŭvajecca tendencyja pavieličeńnia kolkaści rabotnikaŭ, zaniatych niapoŭny čas.

Pra heta na pres‑kanfierencyi 8 červienia paviedamiŭ namieśnik ministra pracy i sacyjalnaj abarony Piotr Hrušnik.

Takaja vysnova zroblena na padstavie analizu situacyi ŭ krasaviku 2009 hoda.

Kolkaść takich rabotnikaŭ skłała 75,6 tys. čałaviek, što ŭ 1,2 raza bolš, čym u sakaviku 2009 hoda, i ŭ 8,3 raza bolš, čym u krasaviku 2008 hoda.

Na 1% pavialičyłasia ŭ krasaviku ŭ paraŭnańni z sakavikom kolkaść rabotnikaŭ, jakim byli dadzienyja vodpuski biez zachavańnia abo z častkovym zachavańniem zarabotnaj płaty, — z 50,7 tys. da 51,2 tys. čałaviek. U paraŭnańni z krasavikom 2008 hoda hety pakazčyk pavialičyŭsia ŭ 6,6 raza. Takim čynam, ahulny abjom vymušanaj niapoŭnaj zaniataści ŭ krasaviku 2009 hoda ŭzros u paraŭnańni z sakavikom u 1,1 raza i skłaŭ 126,8 tys. čałaviek, abo 3,8% da śpiskavaj kolkaści rabotnikaŭ suprać 3,5% u sakaviku. Pry hetym u paraŭnańni z krasavikom 2008 hoda kolkaść nie poŭnaściu zaniatych rabotnikaŭ pavialičyłasia ŭ 7,5 raza.

Na dumku namieśnika ministra, «takim čynam najmalniki na dadzienym etapie aktyŭna vykarystoŭvajuć vymušanyja vodpuski i niapoŭny pracoŭny čas jak antykryzisnyja miery, skiravanyja na zachavańnie pracoŭnych kalektyvaŭ, prajaŭleńnie sacyjalnaj adkaznaści da svaich rabotnikaŭ, jakija ŭ hetych umovach vykarystoŭvajucca mnohimi krainami». Hrušnik padkreśliŭ, što «na vypadak paharšeńnia stanovišča na rynku pracy ministerstvam padrychtavany i realizujecca kompleks dadatkovych mier, skiravanych na zachavańnie stabilnaj situacyi i niedapuščeńnie rostu biespracoŭja».

U pryvatnaści, prapanoŭvajecca realizavać miery pa arhanizacyi apłačvajemych hramadskich rabot, aktyvizacyi pradprymalnickaj dziejnaści, pa apieradžalnaj pierapadrychtoŭcy kadraŭ, rabotnikaŭ, jakija znachodziacca pad ryzykaj zvalnieńnia, stvareńni subsidavanych pracoŭnych miescaŭ. Padrychtavany i ŭniesieny na razhlad urada prajekt ukaza prezidenta ab davańni rabotnikam, jakija znachodziacca ŭ vymušanym vodpusku biez utrymańnia, mahčymaści brać udzieł u apłačvajemych hramadskich rabotach naroŭni ź biespracoŭnymi i vypłaty im zarpłaty sa srodkaŭ, što nakiroŭvajucca na zabieśpiačeńnie zaniataści. Taksama praduhledžvajecca mahčymaść rehistracyi ŭ jakaści biespracoŭnych vysłabanienych rabotnikaŭ, jakija źjaŭlajucca akcyjanierami pradpryjemstvaŭ.

Pavodle słoŭ Hrušnika, u kožnym rehijonie stvarajecca infarmacyjnaja baza ab abjektach hramadskich rabot, ab siezonnych i časovych rabotach, miescaznachodžańni i vidach rabot dla arhanizacyi časovaj zaniataści rabotnikaŭ pramysłovych pradpryjemstvaŭ, jakija znachodziacca ŭ vymušanych vodpuskach.

Maryna Nosava, BiełaPAN

• 0
• 0
• 0
• 0
• 0
• 0
• 0
• 0