U Lidzie zahinuŭ doktar-hiniekołah miascovaj balnicy. Jaho cieła znajšli kala šmatpaviarchovika
U Lidzie zahinuŭ doktar-hiniekołah Lidskaj CRB Jaŭhien Janko. Jaho cieła znajšli dniom 4 sakavika kala 9-paviarchovaha doma ŭ centry horada. Asnoŭnaja ź viersij zdareńnia — suicyd, piša Tut.by.
Jaŭhienu było 39 hadoŭ. Jon doŭhi čas pracavaŭ u Lidskaj CRB, a taksama ŭ adnym z pryvatnych miedycynskich centraŭ Lidy. Doktar pieršaj kvalifikacyjnaj katehoryi. Staž pracy pa śpiecyjalnaści — 11 hadoŭ. Na sajcie balnicy jaho fotazdymak jość na Došcy honaru.
Miascovyja žychary ŭspaminajuć pra jaho, jak pra dobraha doktara, prafiesijanała i pazityŭnaha čałavieka.
Svajaki miarkujuć, što ŭčynak Jaŭhiena moža być źviazany z pracoŭnymi pytańniami.
— Na minułym tydni jon rabiŭ apieracyju kiesarava siačeńnia, tam prajšło nie ŭsio hładka — i byccam by ŭ balnicy raźbirali hety vypadak. 4 sakavika jon pavinien byŭ pajści ŭ administracyju. Apošnija dni byŭ sam nie svoj. Pieražyvaŭ, što, moža być, jon sapraŭdy ŭ čymści pamyliŭsia — kažuć svajaki.
U administracyi Lidskaj CRB paviedamili, što ŭčora, 4 sakavika, Jaŭhien da ich nie prychodziŭ «i naohuł da jaho nie było jakich-niebudź pytańniaŭ». Tam vielmi pieražyvajuć.
— Jon vydatny doktar i zaŭsiody prafiesijna vykonvaŭ svaje abaviazki. Doŭhi čas pracavaŭ u našaj balnicy. Da jaho nikoli nijakich pytańniaŭ nie było, nivodnaha kanfliktu. Pa toj apieracyi, ab jakoj kažuć svajaki, pretenzij da doktara nie było. Tam usio ŭžo dobra, žančyna ŭ paradku. My ŭsie smutkujem i pieražyvajem z-za taho, što zdaryłasia, — kažuć u administracyi Lidskaj CRB. U Jaŭhiena zastalisia žonka i 14-hadovaja dačka.
Kamientary