Bajden paabiacaŭ, što ŭsie darosłyja amierykancy mohuć pryščapicca da 1 maja
Prezident ZŠA Džo Bajden u svaim zvarocie da nacyi abviaściŭ, što ŭsio darosłaje nasielnictva krainy va ŭzroście ad 18 hadoŭ da 1 maja pavinna mieć mahčymaść prajści vakcynacyju ad karanavirusa, paviedamlaje Bloomberg.
Pavodle jaho słoŭ, Złučanym Štatam udasca dasiahnuć pastaŭlenaj administracyjaj mety — 100 młn pryščepak za pieršyja 100 dzion znachodžańnia Bajdena na pasadzie kiraŭnika dziaržavy — na 40 dzion raniej: «My nie tolki źbirajemsia dasiahnuć hetaj mety, my źbirajemsia jaje pierasiahnuć».
«My źbirajemsia pierajści ad 1 młn pryščepak u dzień, jaki ja abiacaŭ u śniežni pieradym tym, jak prynieści prysiahu, da taho, kab padtrymać i pierasiahnuć ciapierašni temp u 2 młn pryščepak u dzień, apiaredžvajučy ŭvieś śviet», — cytuje prezidenta Associated Press.
Sa słoŭ Bajdena, heta dazvolić amierykancam sabracca nievialikimi hrupami, kab adśviatkavać 4 lipienia nie tolki Dzień niezaležnaści ZŠA, ale i «niezaležnaść ad hetaha virusa».
«Adziny sposab viarnuć naša žyćcio, viarnuć našu ekanomiku ŭ patrebnaje rečyšča — heta pieramahčy virus», — padkreśliŭ jon.
Raźviedka ZŠA: Biełaruś stała pieradavym vajskovym płacdarmam Rasii24
Kamientary