47-hadovy Uładzimir Piarcoŭ staŭ novym kiraŭnikom Ministerstva infarmacyi. Jon źmianiŭ na pasadzie Ihara Łuckaha, jaki pajšoŭ na pavyšeńnie ŭ namieśniki kiraŭnika Administracyi prezidenta. Chto taki Uładzimir Piarcoŭ?
Vioŭ dyskateki ŭ Viciebsku
Uładzimir naradziŭsia ŭ 1974 hodzie ŭ Viciebsku, hadavaŭsia na vulicy Čkałava. U rodnym horadzie skončyŭ mastacka-hrafičny fakultet miascovaha ŭniviersiteta.
Jašče ŭ čas vučoby pracavaŭ u Pałacy kultury i techniki prafsajuzaŭ, dzie byŭ viadučym dyskatek. Heta była siaredzina 90-ch. Na toj momant na Biełaruś viaščała rasijskaja radyjostancyja «Junosť», ale z dapamohaj biełaruskaha retranślatara.
Ciaham času «Junosť» zahinuła, a voś chvala dla viaščańnia zastałasia volnaj. Mienavita Piarcovu tady ŭdałosia damovicca ź viciebskaj telestudyjaj ab stvareńni novaj prahramy na hetaj chvali. U vyniku tak i naradziłasia radyjostancyja «Viciebsk». Piarcoŭ paklikaŭ da siabie ŭ kamandu kaleh z Pałaca kultury, a taksama siabroŭ. Faktyčna stancyja stvarałasia z nula, pracuje pa siońnia.
Adnačasova supracoŭničaŭ i ź viciebskim telebačańniem, dzie stvaraŭ niekatoryja pieradačy.
Niaŭdały dośvied u «Dobraj ranicy, Biełaruś»
U pačatku 2000-ch, paśla karotkaj sproby pracy ŭ Rasii, Piarcoŭ sprabuje prabicca ŭ efir BT. Spačatku apynajecca ŭ prahramie «Budni», paśla na niepraciahły čas jamu atrymlivajecca stać viadučym papularnaj na toj čas pieradačy «Dobraj ranicy, Biełaruś!». Piarcoŭ pracavaŭ u pary razam z Taćcianaj Sulimavaj. Tym nie mienš u chutkim časie kiraŭnictva kanała vyrašaje, što duet Piarcova i Sulimavaj «niedastatkova dynamičny dla ranišniaha efiru». «U vobrazie viadučych prysutničała niešta, što zakałychvaje publiku», — kazaŭ tahačasny kiraŭnik BT Jahor Rybakoŭ. Tamu hety tandem daviałosia prybrać z efiru.
U 2002 hodzie Piarcoŭ stanovicca kiraŭnikom Hrodzienskaj abłasnoj teleradyjokampanii. Sam jon chvaliŭsia, što nie paciahnuŭ za saboj u Hrodna ziemlakoŭ i siabroŭ, a pracavaŭ z tymi kadrami, jakija tam byli. «Chaj krytykujuć, aby proźvišča nie błytali», — taki deviz svajoj pracy Piarcoŭ ahučvaŭ u intervju. Sam jon kazaŭ sa skruchaj, što hledačam pryščapili «Švarceniehiera i inšych monstraŭ», a lepš hladzieć muškiecioraŭ z Bajarskim i savieckaha Vini-Pucha.
Ziać Radźkova
Ad 2008 da 2010 Uładzimir Piarcoŭ uznačalvaŭ dyrekcyju telekanała «RTR-Biełaruś» pry STB. Pasada hučyć vielmi pradstaŭniča, ale nasamreč heta byŭ dastatkova maleńki kalektyŭ, jaki najpierš sačyŭ za tym, kab u efir nie vyjšła ničoha ideałahična niapravilnaha, pry patrebie ŭklučalisia nažnicy.
Mienavita ŭ hety čas Piarcoŭ sustrakaje viadučyju STB Juliju Radźkovu, dačku Alaksandra Radźkova. Na toj čas Radźkoŭ byŭ ministram adukacyi, a ŭ chutkim časie pojdzie na pavyšeńnie ŭ Administracyju prezidenta, a paśla ŭznačalić «Biełuju Ruś».
«Z časam Julija zaŭvažyła, što kaleha śpiecyjalna vartuje jaje paśla kožnaha vypusku navin», — pisała hazieta «Sovietskaja Biełoruśsija» pra paru. Praź niekalki hadoŭ jany pabralisia šlubam.
Amal adrazu paśla hetaha Piarcoŭ staŭ dyrektaram pradstaŭnictva telekanała «Mir» u Biełarusi. Na hetaj pasadzie jon źmianiŭ Ludmiłu Sidarovič, jakaja ŭznačalvała pradstaŭnictva amal z momantu stvareńnia, z 1996 hoda.
U pary jość dačka Lizavieta, jana školnica. Julija Piarcova ciapier pracuje viadučaj navin na «Biełaruś-1». Siastra Julii Natalla Ihnacienka žyvie ŭ Maskvie, pazicyjanuje siabie jak piśmieńnicu.
Što takoje «Mir»?
Skažam ščyra — heta daloka nie toj telekanał, jaki najpierš uklučajuć hledačy. Pavodle rejtynhaŭ papularnaści jon zajmaje vośmaje miesca ŭ Biełarusi. Ź viadomych pieradač chiba što možna zhadać «Słabaje źviano», ale heta pradukt rasijskich televizijščykaŭ.
U biełaruskim pradstaŭnictvie pracuje nie tak i mała ludziej — kala 100 čałaviek. Siarod tych prajektaŭ, jakimi telekanał hanarycca, — «Biełaruś siońnia», jakuju jany robiać sumiesna z žurnalistami «Sovietskoj Biełoruśsii», «Miljon pytańniaŭ ab pryrodzie», jakaja źjaŭlajecca ŭ efiry ŭžo bolš za 10 hadoŭ, a taksama «Jašče tańniej», pra toje, jak aščadna pastupać z hrašyma. Byli cykły pieradač, jakija pryśviečanyja historyi Druhoj suśvietnaj vajny.
Isnuje taksama radyjostancyja «Mir». Tym nie mienš, supierničać na roŭnych z kankurentami «Mir» byŭ nie zdolnym.
Hałoŭnaja meta telekanała — infarmavańnie pra padziei ŭ krainach SND. Uvachodzić u abaviazkovy pakiet teleprahram, što tranślujucca ŭ Biełarusi.
Pohlady i vykazvańni
U 2011 hodzie z ruk Alaksandra Łukašenki Piarcoŭ atrymaŭ orden imia Franciška Skaryny. Kali časy byli trošku inšymi, to Piarcoŭ zamaŭlaŭ dla «Mira» rekłamu na sajcie Tut.by.
Adnak apošnim časam rytoryka značna źmianiłasia. Jašče da pačatku minułahodniaj prezidenckaj kampanii Piarcoŭ kazaŭ, što «niedziaržaŭnyja ŚMI siejuć paniku, raźbivajuć psichiku ludziej, sprabujuć jachidničać». Havorka išła pra situacyju z karanavirusam.
Uvosień 2020 hoda Piarcoŭ zajaviŭ, što siońniašni Tut.by maje vielmi mała supolnaha z žurnalistykaj. Jon vykazvaŭ spadziavańnie, što ŭsie niedziaržaŭnyja ŚMI viernucca ŭ «narmalnuju kalainu».
Jon ličyć, što Biełaruś trapić u suśvietnyja padručniki jak kraina, jakaja «dvojčy paźbiehła kalarovaj revalucyi». A pratest u Biełarusi byŭ zusim nie inicyjatyvaj hramadzian, a arhanizavany zachodnimi śpiecsłužbami.
«Skazaŭ: ja tut ničoha prasić nie budu». Žonka raskazała, jak Vieramiejčyka pryznali pahrozaj u Litvie6
Kamientary