Džo Bajden vystupiŭ z zajavaj z nahody incydentu z razvarotam samalota Ryanair u Minsk. Tekst źjaviŭsia na sajcie Biełaha doma.
ZŠA ličać pramym parušeńniem mižnarodnych normaŭ «prymusovaje pieranakiravańnie kamiercyjnaha rejsa Ryanair» u Biełaruś, a taksama źniaćcie z samalota i aryšt biełaruskaha žurnalista Ramana Pratasieviča, paviedamlaje Tut.by.
Amierykanski prezident padkreśliŭ, što ZŠA samym rašučym čynam asudžajuć toje, što zdaryłasia, a taksama ličać aburalnym «videa, jakoje, vierahodna, Pratasievič zrabiŭ pad prymusam». ZŠA nazvali incydent u Biełarusi «haniebnym napadam jak na palityčnaje inšadumstva, tak i na svabodu presy».
Džo Bajden zaklikaŭ vyzvalić Ramana Pratasieviča, a taksama sotni inšych palityčnych źniavolenych u Biełarusi. I padtrymaŭ zakliki pravieści mižnarodnaje rasśledavańnie, kab vyśvietlić usie abstaviny spravy.
«Ja vitaju navinu ab tym, što Jeŭrapiejski sajuz zaklikaŭ da kropkavych ekanamičnych sankcyj i inšych mier, i ja paprasiŭ maju kamandu raspracavać adpaviednyja varyjanty pryciahnieńnia da adkaznaści vinavatych — u ciesnym supracoŭnictvie ź Jeŭrasajuzam, inšymi sajuźnikami i partniorami, mižnarodnymi arhanizacyjami», — zajaviŭ Bajden.
Amierykanski prezident dadaŭ, na praciahu mnohich miesiacaŭ biełarusy zajaŭlajuć ab svaim patrabavańni demakratyi, pavahi pravoŭ čałavieka i zachavańnia fundamientalnych svabod u krainie.
«Ja apładziruju mužnaści i rašučaści biełarusaŭ, jakija zmahajucca za asnoŭnyja pravy, uklučajučy takich žurnalistaŭ, jak Raman Pratasievič, i lidaraŭ apazicyi, takich jak Śviatłana Cichanoŭskaja i jaje muž Siarhiej Cichanoŭski. Złučanyja Štaty praciahnuć padtrymlivać narod Biełarusi ŭ jaho baraćbie», — dadaŭ Bajden.
Kamientary