Ajcišnica, biznesvumien, błohierka. Kim pracujuć žonki biełaruskich futbalistaŭ?
Na apošniaj naradzie Alaksandr Łukašenka aburyŭsia žonkami futbalistaŭ. «Pahladzicie, što robiać našy spartsmieny, asabliva ich žonki. U čempijanacie niekatoryja futbalisty atrymlivali vializnyja sumy hrošaj. A navošta žonkam pracavać? Jany siadziać i tykajuć ŭ hetyja ajfony. I ŭsie — za BČB. Ad hultajstva».
«Naša Niva» pahladzieła, kim pracujuć žonki futbolnych topaŭ.
Śviatłana Hleb
Žonka Alaksandra Hleba — byłaja «Supiermadel Biełarusi», a ciapier instabłohierka. Kaliści pracavała mieniedžaram u baćki, jaki zajmaŭsia vytvorčaściu kaśmietyki, paśla ź siastroj raźvivała IP pa prodažy adzieńnia.
Ale z zamužžam adyšła ad spraŭ i pryśviaciła siabie siamji — u šlubie z futbalistam Śviatłana naradziła dźviuch dačok.
Volha Hleb
Toj vypadak, kali žonka bolš viadomaja za muža. Volha — papularnaja błohierka i biznesvumien. Jana ŭładalnica brenda adzieńnia Moshé — u jaje niekalki kram u Minsku. Volha raspaviadała, što, kab adkryć biznes, skinułasia pa $200 z mamaj i siastroj, jašče $2000 pazyčyła ŭ muža, jakija paśla chutka jamu viarnuła.
Byłoha napadajučaha zbornaj Biełarusi Viačasłava Hleba z žonkaj bačyli na vialikim maršy 16 žniŭnia.
Kryścina Kozieł
Spartyŭnaja žurnalistka zamužam za paŭabaroncam BATE Jaŭhienijem Jabłonskim. Jana była viadoma jak viadučaja pieradačy na BT «Kozieł pra futboł».
Sprabavała raskrucić ŭ jutubie kanał «Futbołka», ale apošni vypusk tam vychodziŭ hod tamu.
Maryna Niakrasava-Hutar
Žonka hałkipiera «Šachciora» Alaksandra Hutara raniej śpiavała ŭ pop-hurcie Las Vegas. Paźniej sprabavała pačać solnuju karjeru. Ciapier jana ŭ dekrecie — małodšamu ź jaje dvuch synoŭ dva hady.
U sacyjalnych sietkach Maryna padtrymlivała Volhu Chižynkovu, kali tuju kinuli na Akreścina.
Ksienija Bachar
Pakul muž Ivan hulaje za minskaje «Dynama», Ksienija pracuje ŭ IT — jana prajektnaja mieniedžarka ŭ Visor Games (heta kampanija raspracoŭvaje hulni dla sacyjalnych sietak i mabilnych płatform). Letaś skončyła mahistraturu ŭ Akademii kiravańnia pry prezidencie.
Na minułych vybarach dziaŭčyna chacieła stać niezaležnym naziralnikam na ŭčastku, ale jaje nie dapuścili.
Alaksandra Stasievič
Žonka futbalista «Šachciora» Ihara Stasieviča — fešn-błohier.
U studenctvie Alaksandra była rabočaj na barysaŭskim zavodzie, vykładała chareahrafiju. Paśla skančeńnia BDPU pracavała sakratarkaj u pryjomnaj rektara. A potym całkam syšła ŭ siamju. U pary dvoje synoŭ.
U adnym intervju Alaksandra tłumačyła: u futbalistaŭ ciažki hrafik, jany nie mohuć zabirać dziaciej z sadka, tamu pobytavyja kłopaty kładucca na žonak.
Kaciaryna Rudźko
Žonka abaroncy «Šachciora» Jahora Filipienki pracuje ŭ śfiery mody.
Jana trymaje brend upryhažeńniaŭ Pilgrim, a taksama źjaŭlajecca saŭładalnicaj bucika R.O.S.E.
Julija Kiślak
Mama dvuch dziaciej i žonka paŭabaroncy minskaha «Dynama» Siarhieja Kiślaka taksama asvojvaje fešn-industryju.
Julija adkryła firmu pa pašyvie kaściumaŭ Kis Store.
Patrycyja Kryviec
Pracu dziela kachanaha kinuła polka Patrycyja — žonka Siarhieja Kryŭca, jaki da niadaŭniaha času byŭ futbalistam bresckaha «Dynama».
Ciapier Kryviec hulaje za polski kłub, tamu siamja pierabrałasia žyć u susiedniuju krainu.
38-hadovaha vajskovaha lotčyka sudziać za abrazu Łukašenki5
Kamientary