«Śviatar drennamu nie navučyć». Baciuški zamieniać nastaŭnikaŭ, jakich nie chapaje na siale?
Na kanale STB vyjšła intervju z kiraŭnikom pravasłaŭnaj carkvy. Vienijamin vykazaŭ dumku, što śviatary mahli b vieści ŭroki ŭ sielskich škołach, dzie jość deficyt z kadrami.
«Moža, na zakanadaŭčym uzroŭni zrabić tak, kab śviatary mahli vykładać, vučyć dziaciej u škołach? — spytaŭ žurnalist u kiraŭnika BPC. — Heta i deficyt nastaŭnickich kadraŭ na siale budzie vyrašać, plus dadatkovy zarobak i vychavańnie padrastajučaha pakaleńnia. Dumaju, pravasłaŭnyja śviatary drennamu školnikaŭ nie navučać».
«Ciapier my sumiesna ź Ministerstvam adukacyi razhladajem mahčymaść i pierśpiektyvy atrymańnia našymi śviatarami ci vypusknikami duchoŭnych škoł dadatkovaj adukacyi piedahahičnaj ci prachodžańnia kursaŭ, što dało b takuju mahčymaść», — adkazaŭ mitrapalit.
Jon dadaŭ, što da hetaha pytańnia treba padychodzić udumliva, ale realizavać ideju mahčyma.
Ci značyć heta, što śviatary buduć vykładać u zvyčajnych viaskovych škołach i zamieniać tam nastaŭnikaŭ, jakich nie chapaje, naprykład, pa fizicy ci matematycy?
Pa kamientar «Naša Niva» źviarnułasia da Fiodara Poŭnaha, staršyni sinadalnaha adździeła pa supracoŭnictvie sa śvieckimi ŭstanovami adukacyi.
«Ja razmaŭlaŭ z Uładykam paśla intervju. Jon mieŭ na ŭvazie inšaje — niadzielnyja škoły pry prychodach, dzie mieŭ by miesca piedahahičny padychod. Zrazumiejcie, nie kožnaha śviatara možna adpravić vykładać. U cełym ja maju mierkavańnie, što adukacyja musić być vyklučna śvieckaj», — patłumačyŭ jon.
Pa zakonie, nie luby dypłom daje prava pracavać nastaŭnikam. Treba mieć vyšejšuju ci siaredniuju śpiecyjalnuju piedahahičnuju adukacyju (heta prapisana ŭ Adzinym kvalifikacyjnym daviedniku pasad słužačych). Inšy varyjant — čałaviek, jaki paśla ŭniviersiteta atrymaŭ inšuju prafiesiju, moža prajści pierapadrychtoŭku pa piedahahičnych profilach. Jana, jak praviła, pravodzicca ŭ VNU zavočna i zajmaje kala dvuch hadoŭ.
Kolki nasamreč ciahnucca pracoŭnyja pajezdki Łukašenki? Cikavyja ličby17
Kamientary