Kolki nasamreč ciahnucca pracoŭnyja pajezdki Łukašenki? Cikavyja ličby
Pres-słužba Łukašenki sprabuje pakazać, što ŭ pracoŭnych pajezdkach jon pravodzić šmat hadzin. Ale što nasamreč?
Prajekt «MotolkoPomohi» padličyŭ, kolki ciahnucca pracoŭnyja vizity Łukašenki ŭ realnaści.
Apošnim časam Łukašenka jeździć pa «Dažynkach». Prajekt piša, što kožnuju takuju pajezdku telehram-kanał «Puł pieršaha» sprabuje pakazać maštabna i dla hetaha na praciahu ŭsiaho dnia publikuje fota i videa z Łukašenkam.
Kali analizavać jaho vizity vyklučna pa tym, jak jany padajucca ŭ pres-słužbaj u telehram-kanale, to składvajecca ŭražańnie, što Łukašenka pravodzić u pajezdkach pa 5-10 hadzin i ŭvieś hety čas aktyŭna zbližajecca z narodam. Ale ŭ realnaści heta nie tak, analizuje «MotolkoPomohi».
Za apošni miesiac Łukašenka 4 razy jeździŭ na abłasnyja «Dažynki» ŭ roznyja rehijony krainy (prapuściŭ tolki pieršyja ŭ Mahiloŭskaj, a siońnia pajechaŭ u Połack), kožny raz u subotu.
Padčas vizitu na «Dažynki» ŭ Masty 2 listapada pres-słužba dała spravazdaču ab jaho prybyćci na śviata ŭradžaju ŭ 11:06, i na praciahu nastupnych 5,5 hadziny publikavała słovy Łukašenki.
Apošni post pra pajezdku vyjšaŭ u 16:28 — tam pakazali, jak jon spuskajecca sa sceny i idzie razmaŭlać ź ludźmi. Ale nasamreč na toj momant jaho ŭžo daŭno ŭ horadzie nie było, bo ŭ Mastach jon pravioŭ usiaho 1,5 hadziny i palacieŭ užo ŭ 12:30.
Jašče adzin prykład — heta «Dažynki» ŭ Vałožynie, jakija prajšli 19 kastryčnika.
Pra prybyćcio Łukašenki ŭ horad napisali ŭ 10:43 i dalej pasty išli na praciahu 10 hadzin. Adnak užo ŭ 11:45 Łukašenka z Vałožyna palacieŭ.
Prajekt padličyŭ, što ŭ 2024 hodzie pres-słužba Łukašenki paviedamiła pra jak minimum 24 jaho pajezdki pa krainie ŭ bujnyja rajcentry, abłasnyja centry i vioski.
Kožnuju takuju pajezdku Puł pieršaha aśviatlaje ŭ siarednim pa 7-8 hadzin, a realna Łukašenka tam pravodzić ad 55 chvilin da 3,5 hadziny.
Prajekt piša, što jak minimum u 15 pajezdkach u 2024 hodzie Łukašenka pravodziŭ značna mienš času, čym sprabavała pakazać jaho pres-słužba. Jany zaŭsiody pišuć, kali jon pryjazdžaje, ale amal nikoli nie paviedamlajuć, kali jon źjazdžaje.
Padličana, što za 2024 hod Łukašenka sumarna miesiac pravioŭ na adpačynku ŭ svaich zaharadnych rezidencyjach i ŭ vioscy Aleksandryja. Dvojčy (u listapadzie i lipieni) adpačyvaŭ u rezidencyi «Viskuli» ŭ Biełaviežskaj puščy, dvojčy byŭ u Prypiackaj rezidencyi ŭ vioscy Laskavičy, i cełych 9 razoŭ u Aleksandryi (pry čym dvojčy pa 5 dzion zapar).
Usie hetyja vizity jamu byli patrebnyja dla adnaŭleńnia zdaroŭja pierad ci paśla zamiežnaha vizitu, robić vysnovu «MotolkoPomohi». Da prykładu, 4 lipienia jon prybyŭ u Aleksandryju z Astany i byŭ u vioscy cełych 5 dzion. Takaja ž situacyja była i pierad pajezdkaj Manholija-Irkuck, pierad jakoj, znoŭ ža 5 dzion, jon rychtavaŭsia ŭ Aleksandryi i adtul adpraviŭsia ŭ Ułan-Batar.
Kamientary