«My nie źbiralisia sychodzić ź Biełarusi»: kiraŭnik EPAM Arkadź Dobkin prakamientavaŭ słovy Łukašenki
9 žniŭnia na pres-kanfierencyi Alaksandr Łukašenka skazaŭ, što «niejki EPAM i inšyja, Dobkin abo Drobkin (…) hrošy siudy pieraličvaŭ na pratesnyja akcyi». Taksama jon zajaviŭ, što: «My pavinny bačyć usie finansavyja patoki. Rabicie pradukt, atrymlivajcie hrošy, ale jany pavinny być tut».
Kiraŭnik EPAM daŭ dev.by z hetaj nahody aficyjny kamientar.
«Kamientar, jaki prahučaŭ, biezumoŭna, nielha nazvać pryjemnym abo doŭhačakanym dla mianie ci kampanii. I, na naš pohlad, maje sens prosta koratka prakamientavać biahučuju situacyju i acharaktaryzavać pazicyju EPAM u cełym.
My viadziem biznes u Biełarusi i inšych krainach śvietu bolš za 25 hadoŭ i stavimsia da hetaha vyklučna adkazna. Z poŭnym razumieńniem usich asacyjavanych hłabalnych i łakalnych ryzyk. Adkazna pierš za ŭsio pierad našymi supracoŭnikami, klijentami, inviestarami, i pierad krainaj, biezumoŭna, taksama. Što heta značyć?
Heta značyć, što naša adkaznaść pierad supracoŭnikami, klijentami i inviestarami nikoli nie dazvalała nam pradprymać nieabdumanyja i niepravamiernyja kroki, jakija mahli b pryvieści da ryzyk parušeńnia vytvorčaj dziejnaści kampanii, abo, praściej kažučy, da straty reputacyi.
Hetymi pryncypami kirujucca ŭsie administracyjnyja kiraŭniki EPAM i hłabalna, i ŭ Biełarusi, i ŭ inšych rehijonach. U dadatak ŭsie finansavyja apieracyi EPAM jak hłabalnaj publičnaj kampanii, a taksama i piersanalnyja finansavyja apieracyi jaje klučavych administracyjnych kiraŭnikoŭ, jakija mohuć prama ci ŭskosna paŭpłyvać na apieracyjnuju dziejnaść kampanii, stroha rehłamientujucca Savietam dyrektaraŭ i prachodziać šmatlikija mižnarodnyja aŭdyty, što nie pakidaje miesca dla niekarektnych tłumačeńniaŭ, zdahadak abo kamientaroŭ.
Heta taksama značyć, i heta vyklučna važna, što my nie źbiralisia sychodzić ź Biełarusi. I pakul jość maładyja ludzi, hatovyja vučycca, pakul jość talenty, jakija hatovyja žyć i pracavać u krainie, i pakul jość klijenty, jakija ceniać hety talent i hatovyja pracavać z EPAM Biełaruś — my płanujem praciahvać pracavać i raźvivać kampaniju tut.
Pakul nas nie vymusiać krainu pakinuć…
JERAM siońnia ŭvachodzić u elitu suśvietnaha IT.
My žyviem i pracujem u amal 40 krainach śvietu i raściem amal na 40% u hod. Tolki za try apošnija miesiacy EPAM vyras bolš čym na 4 tysiačy čałaviek hłabalna.
U 2021 hodzie nas stanie bolš na bolš čym 10 tysiač talenavitych inžynieraŭ, dyzajnieraŭ, i kansultantaŭ pa ŭsim śviecie.
Biełaruś była adnoj z pryčyn, čamu ŭ nas atrymałasia zrabić usio heta, amal niemahčymaje.
I my spadziajemsia, što jana budzie častkaj EPAM jašče doŭhija hady».
Kamientary