Lonia Paškoŭski źniaŭ film pra Afhanistan. Jon zaśpieŭ Kabuł pierad samym prychodam talibaŭ
Hety vypusk «Chaču damoŭ» jutub-błohier ź Biełarusi Lonia Paškoŭski zdymaŭ u siaredzinie lipienia. Užo tady było zrazumieła, što taliby nastupajuć i chutka padyduć da Kabuła. 15 žniŭnia «Taliban» abviaściŭ, što całkam kantraluje Afhanistan. Terarystyčnaja arhanizacyja zachapiła krainu za ličanyja tydni — paśla taho, jak ZŠA vyvieli svaje vojski. Paśla źmieny ŭłady dziasiatki tysiač afhancaŭ i zamiežnikaŭ sprabujuć lubymi šlachami vyjechać z krainy, nie ŭjaŭlajučy svajo žyćcio pry talibach.
U Afhanistanie žyvie kala 40 narodnaściaŭ, najbujniejšaja ź ich — puštuny, kala 40%. Bolšaść ź ich žyvuć na poŭdni krainy. Inšyja bujnyja — chazarejcy, tadžyki i ŭźbieki.
«Kabuł nazyvajuć adnym z samych niebiaśpiečnych haradoŭ śvietu, tamu što tut adbyvajecca vializnaja kolkaść teraktaŭ. U 2019 hodzie ich było bolš za 1700, to bok bolš za 4 na dzień u krainie, — raspaviadaje Lonia. — Centr Kabuła — heta prosta horad-krepaść. Heta vielizarnaja kolkaść vajskoŭcaŭ, błokpastoŭ. Ty paŭsiul bačyš ludziej z aŭtamatami, paŭsiul kalučy drot, vializnyja 5-6-mietrovyja bietonnyja ŭmacavańni. Centr horada najbolš pakutuje ad teraktaŭ, bo tam usie pasolstvy, dziaržustanovy, univiersitety, balnicy i hetak dalej. Na ŭskrainach ničoha takoha niama, aproč pastajannych patruloŭ z palicyi i vajskoŭcaŭ».
«Z 6 ranicy prykładna da 9-10 ranicy ŭ horadzie adbyvajucca napady, vybuchi. Tamu lepš hety čas pierasiadzieć doma i nie vychodzić», — raić miascovy kiroŭca.
Kamientary