U Libanie znachodzicca da 300 biełarusaŭ.

Siońnia vajskovyja ŭłady Izrailu ŭzhadnili z pradstaŭnikami ambasadaŭ čas i maršruty evakuacyi zamiežnych hramadzianaŭ, daŭšy harantyi, što bajavyja dziejańni ŭ hetych rajonach vieścisia nia buduć. Tym časam, jak paviedamili ŭ dyppradstaŭnictvie Biełarusi ŭ Syryi, pieršyja biełaruskija hramadzianie, jakija vyrašyli pakinuć zonu libanska-izrailskaha ŭzbrojenaha kanfliktu, prybyli ŭ Damask. Ciapier Ministerstva zamiežnych spravaŭ Biełarusi vyrašaje, jakim čynam dastavić suajčyńnikaŭ na radzimu.

U ambasadzie Biełarusi ŭ Syryi paćvierdzili, što pieršaja hrupa biełarusaŭ čakaje mahčymaści viarnucca dadomu. Kolki kankretna čałaviek zdoleli źjechać ź Libanu, dziažurny dyppradstaŭnictva nie ŭdakładniŭ — pakolki, jak jon vykazaŭsia, aŭtobusy ŭvieś čas padciahvajucca i siarod pasažyraŭ-zamiežnikaŭ taksama mohuć być i biełarusy.

(Dziažurny ambasady: ) “Tak, jość tyja, chto prybyŭ u Damask. Jany jość, ale reč u tym, što ich niama ciapier u nas u ambasadzie. Adnak usie źviestki adnosna biełarusaŭ buduć akumulavacca va ŭpraŭleńni infarmacyi Ministerstva zamiežnych spravaŭ”.

Zhodna z papiarednimi acenkami, u Libanie znachodzicca da 300 biełarusaŭ — u asnoŭnym heta žonki hramadzianaŭ Libanu, a taksama tyja, chto pracuje ŭ sfery absłuhoŭvańnia ci turbizsnesu. Na hety momant biełaruskaja ambasada ŭ Damasku padtrymlivaje kantakt z paŭsotniaj suajčyńnikaŭ, jakija naŭprost zajavili pra žadańnie pakinuć zonu kanfliktu. Razhladajucca roznyja sposaby viartańnia ŭ Biełaruś. U pryvatnaści, jość damoŭlenaść z rasiejskim dyppradstaŭnictvam, kab uziać biełarusaŭ na bort samalota Ministerstva nadzvyčajnych sytuacyjaŭ, jaki adlacić u Maskvu zaŭtra. Chto jašče nie paśpieŭ vyjechać ź Libanu siońnia, 19 lipienia hanarovy kansulat Biełarusi ŭ Libanie arhanizuje specyjalny aŭtobus z Bejrutu ŭ Damask. Planujecca, što hetyja ludzi 21 lipienia adlaciać u Miensk čarternym rejsam kampanii “Biełavija”. Treci varyjant praduhledžvaje dastaŭku biełarusaŭ pavietranym transpartam Ministerstva nadzvyčajnych sytuacyjaŭ Biełarusi.

U toj čas, jak płynia ŭciekačoŭ ź Libanu macnieje, hramadzianie Izrailu pa-roznamu aceńvajuć nieabchodnaść siłavoj aperacyi suprać libanskaj vajskovaj arhanizacyi “Chizbała”, padčas jakoj hinuć i mirnyja libancy. Tak, adzin z tych, chto adjechaŭ u Izrail, a paśla znoŭ viarnuŭsia ŭ Biełaruś, ličyć, što mienavita repatryjanty padtrymlivajuć bolš žorstkija zachady suprać krainaŭ, jakija pahražajuć biaśpiecy Izrailu.

(Spadar: ) “Izrailcy, jakija žyvuć u pasialeńniach albo dzieści pobač z arabami, jany časta našmat lajalniejšyja da svaich susiedziaŭ. Tamu što ŭsich arabaŭ nielha pad adzin hrebień časać — nia ŭsie ž ekstremisty, tak? Ale što da repatryjantaŭ, byłych našych hramadzianaŭ, to jany pryzvyčailisia da bolš žostkich zachadaŭ. Mahčyma, vychavanyja jašče stalinskimi represijami — maŭlaŭ, kali vorah nie zdajecca, značyć, jaho treba źniščać”.

Dniami ź Libanu planujecca evakujavać bolš za 5 tysiač zamiežnikaŭ — pieradusim, žančyn i dziaciej. Kali dojdzie čarha da astatnich achvočych, pakul nieviadoma, adnak paviedamlajecca, što tolki francuskich hramadzianaŭ u hetaj krainie naličvajecca kala 20 tysiač. Tym časam, Izrail i libanskaja vajskovaja arhanizacyja “Chizbała” praciahvajuć abmieńvacca rakietna-bombavymi ŭdarami. Achviarami novaj vajny ŭžo stali bolš za 200 čałaviek z abodvuch bakoŭ. MZS Biełarusi źviarnułasia da biełaruskich hramadzianaŭ z nastojlivym zaklikam ŭstrymacca ad pajezdak na Blizki Ŭschod da poŭnaj narmalizacyi sytuacyi.

Radyjo Svaboda

• 0
• 0
• 0
• 0
• 0
• 0
• 0
• 0