Ledź nie zahubiŭ karjeru praz praparščyka, što skraŭ tank. Chto taki hienierał Biełakonieŭ, jaki prapanavaŭ dziejničać mietadami viermachta
«Treba, jak Pucin skazaŭ, mačyć u sarciry ŭsich: za adnaho — 20, 100… Kab było niepanadna nikomu. Moža być, hruba, ale ščyra», — tak deputat Pałaty pradstaŭnikoŭ Aleh Biełakonieŭ vykazaŭsia paśla minskaj pierastrełki. U sacyjalnych sietkach zaŭvažyli, što heta padobna da zahada načalnika štaba Viarchoŭnaha kamandavańnia viermachta Vilhielma Kiejciela. Toj ustanaviŭ taksu ŭ 50-100 žyćciaŭ kamunistaŭ za žyćcio adnaho niamieckaha sałdata. Cikava, što da taho svajho vykazvańnia pra Biełakonieva viadoma było nie vielmi mnoha. Raskazvajem, što heta za čałaviek, jaki ŭ sučasnaj Biełarusi prapanuje dziejničać mietadami viermachta?
Alehu Biełakonievu 56 hadoŭ. Ciapier jon deputat i staršynia kamisii pa nacyjanalnaj biaśpiecy Pałaty pradstaŭnikoŭ. Da hetaha piać hadoŭ źjaŭlaŭsia načalnikam Hienieralnaha štaba ŭzbrojenych sił Biełarusi. A jašče raniej — kamandavaŭ siłami śpiecyjalnych apieracyj krainy.
Sam Biełakonieŭ rodam z Prymorskaha kraja Rasii. Na vajennaha advučyŭsia ŭ Omskim vyšejšym ahulnavajskovym kamandnym vučyliščy.
Pačynaŭ słužyć kamandziram haŭbičnaha ŭzvoda. Potym trapiŭ u Biełaruś, dadatkova advučyŭsia ŭ Vajskovaj akademii, pierajšoŭ u motastrałki, potym — u SSA, jakim niejki čas kiravaŭ.
Cikava, što ŭ niejki momant karjera Biełakonieva ledź nie pajšła pad adchon. Jak adznačajuć našy krynicy, jaho źniali z pasady kiraŭnika Słonimskaj asobnaj miechanizavanaj bryhady, tamu što praparščyk skraŭ z anhara tank, kab pajechać na razborki.
Ale, jak kažuć našy surazmoŭcy, kali emocyi ścichli, Biełakonievu ŭsio daravali, bo «takoje ŭ vojsku — rucina, pakarali ž nie za toje, što praparščyk skraŭ tank, a za toje, što stała viadoma».
Publikavaŭ fotazdymki piva i sušanaj ryby jak prafiłaktyki karanavirusa, a potym trapiŭ na ŠVŁ
Paśla viartańnia z apały Biełakonieŭ praciahnuŭ uzdymacca pa karjernaj leśvicy, skončyŭ fakultet Hienštaba Vajskovaj akademii. A ŭ pačatku 2014 hoda staŭ pieršym namieśnikam ministra abarony, načalnikam Hienieralnaha štaba.
«Načalnik Hienieralnaha štaba ŭ Biełarusi — heta prosta vysokapastaŭleny pisarčuk. Biełakonieŭ dziejničaŭ u mirny čas, nijakich bitvaŭ nie vyjhravaŭ, reformaŭ nie pravodziŭ, cokaŭ abcasam — zvyčajny, ničym nie admietny biełaruski hienierał», — apisvajuć našy surazmoŭcy.
Niezadoŭha da svajoj adstaŭki pa ŭzroście Biełakonieŭ sustrakaŭsia z nataŭcami (biełaruskija miratvorcy zadziejničany ŭ sumiesnaj z NATA misii ŭ Livii) i zajaŭlaŭ «Našaj Nivie», što Biełaruś hatovaja da sumiesnych vučeńniaŭ z NATA — heta było ŭ 2019-m. Adnak z hetaha ničoha nie atrymałasia.
U 2019-m Biełakonieŭ syšoŭ u adstaŭku, bo staŭ deputatam Pałaty pradstaŭnikoŭ ad Puchavickaj vybarčaj akruhi №65. U parłamiencie jaho pryznačyli staršynioj kamisii pa nacyjanalnaj biaśpiecy. Heta jon prapanuje sudzić tych, chto zaklikaje da sankcyj suprać biełaruskich uładaŭ.
Cikava, što Biełakonieŭ taksama nie asabliva zaścierahaŭsia ad karanavirusa. I niezadoŭha da taho, jak trapić na ŠVŁ u reanimacyju z kavidam, jon publikavaŭ u svoj zakryty Instagram-akaŭnt fotazdymkami sušanaj ryby, harełki i piva z prypiskaj «prafiłaktujem kavid». Vyžyŭ Biełakonieŭ cudam.
Pierad prezidenckimi vybarami 2020 hoda Biełakonieŭ kataŭsia ŭ turne pa dziaržaŭnych ustanovach uschodu respubliki z vystupleńniami ab pravilnaści abranaha kursu.
Nie viedaŭ biełaruskaj movy i ličyŭ, što SVV — heta «suvorovskij vojennyj vuz»
Znajści stanoŭčuju rekamiendacyju na Biełakonieva akazałasia niaprosta. Aficery, jakija ź im pierasiakalisia ŭ vojskach i ŭ Hienieralnym štabie, adhukajucca pra Biełakonieva nie asabliva dobra.
«Pad vyhladam intensiŭnaj dziejnaści kašmaryŭ padnačalenych za drobiazi. Paśla jaho pryjezdaŭ u čaści davodziłasia pisać fejkavyja raparty ab «pryniatych mierach», kab nie razvalvać kalektyvy niespraviadlivymi pakarańniami», — kažuć aficery.
Našy surazmoŭcy ličać, što za hady žyćcia ŭ Biełarusi Biełakonieŭ tak i nie zdoleŭ stać biełaruskim aficeram, i źviartajuć uvahu na toje, što ŭ «krytyčny» momant jon pracytavaŭ nie svajho niepasrednaha hałoŭnakamandujučaha, a rasijskaha — Pucina.
Što admietna, Biełakonieŭ tak i nie vyvučyŭ biełaruskaj movy. Pres-słužba pierakładała dla jaho na ruskuju movu teksty «Našaj Nivy» pra vojska i nasiła ŭ razdrukavanym vyhladzie.
Adzin z surazmoŭcaŭ «Našaj Nivy», vykładčyk Minskaj suvoraŭskaj vučelni, pryhadvaje historyju ad svaich hadavancaŭ, jakija stajali ŭ ačapleńni kala Steły z pahonami SVV (Suvoraŭskaje vajennaje vučylišča) padčas sumiesnaha mierapryjemstva z ruskimi.
«Kali rasijski hienierał spytaŭ u Biełakonieva, što za dziŭnyja ŭ vas takija pahony i čamu tam SVV a nie «SVU», toj adkazaŭ, što heta aznačaje «suvorovskij vojennyj vuz», — kaža naš surazmoŭca.
«Možna doŭha pryvodzić prykłady jaho słužbovych pravałaŭ, ale ja liču, što heta nie maje nijakaha značeńnia ŭ analizie situacyi ź jaho słovami, — raskazvaje sasłužyviec Biełakonieva, były vysokapastaŭleny vajenny. —
Aleh ničoha inšaha skazać i nie moh, jon sałdat, u jaho nie moža być trošku voraha ci trošku siabra, jon skazaŭ, jak dumaje, z ulikam prafiesijnaj defarmacyi za dziasiatki hadoŭ vysłuhi.
Sens u tym, što kožny pavinien zajmacca svajoj spravaj, sałdat nie pavinien być palitykam — heta šlach da taho, kab stać paśmiešyščam i siarod svaich, i siarod čužych.
Z vusnaŭ sałdata heta b uspryniali — «nu, što ź jaho ŭziać». Ja ž całkam dapuskaju, što dumka ab «likvidacyi» vielmi papularnaja siarod siłavikoŭ, jakija ciapier supraćstajać narodu. Heta tolki publična ahučvałasia nie adzin raz, a niepublična — strašna padumać kolki. Ale takaja zajava z vusnaŭ palityka — zusim inšaja reč.
Biełakonieŭ ža palitykam nie staŭ i stać nikoli nie zmoža. Možna razvažać, što my ŭsie vinavatyja, što dapuścili taki voś uzrovień «deputataŭ», ale tut jość i jašče adzin aśpiekt.
Jak ja razumieju, jaho deputackija paŭnamoctvy nieŭzabavie skončacca, i kudy dalej iści — nastaŭnikam dapryzyŭnaj padrychtoŭki ŭ škołu?
Mnie zdajecca, parłamienckaja siniekura stała narkotykam i Biełakonieŭ chacieŭ by, kab jaho «pakinuli» i na druhi termin, u tym liku tamu jon i pierastaŭ trymać jazyk za zubami, kab zaŭvažyli i pachvalili», — zaklučaje naš surazmoŭca.
Kamientary