Ofis AAN u Ženievie adkazaŭ na abvinavačańni ź Minska ŭ finansavańni pratestaŭ
Ofis Viarchoŭnaha kamisara AAN pa pravach čałavieka adkazaŭ «Svabodzie» na zapyt adnosna abvinavačańniaŭ aficyjnym Mienskam pradstaŭnictva AAN u Biełarusi ŭ niametavym vykarystańni srodkaŭ i finansavańni pratestavaj dziejnaści.
«My nie prymajem charaktarystyku hetaj sytuacyi, asabliva versiju padziej, jakuju adlustroŭvajuć ŚMI, padkantrolnyja dziaržavie», — napisaŭ nam presavy pradstaŭnik Ofisu Viarchoŭnaha kamisara AAN u pravach čałavieka ŭ Ženevie Rupert Kołvił.
Na hetym tydni telekanał ANT u siužecie žurnalista Ihara Tura zajaviŭ, što niametavaje vykarystańnie finansaŭ, vydzielenych AAN na padtrymku ludziej ź invalidnaściu i achviar chatniaha hvałtu, dapuściŭ były staršy radnik u pravach čałavieka pradstaŭnictva AAN u Biełarusi Omer Fišer.
Pavodle versii ANT, Fišer vydatkavaŭ ź biudžetu Ofisu pravoŭ ludziej ź invalidnaściu kala 5 tysiač dalaraŭ na apłatu advakataŭ 23-m udzielnikam pratestaŭ. Fišera nielha było zatrymać, dadaŭ telekanał, bo ŭ jaho byŭ dyplamatyčny imunitet.
Raniej paviedamlałasia, što kiraŭnik MZS Biełarusi Ŭładzimir Makiej padčas sustrečy z hieneralnym sakratarom AAN Antoniju Huteryšam paskardziŭsia na toje, «jak niekatoryja pradstaŭniki kamandy AAN u Biełarusi skarystali finansavyja srodki AAN, jakija vydzialajucca dla ludziej ź invalidnaściu, na padtrymku ŭdzielnikaŭ pratestavych akcyj i da taho padobnaje».
«Z častkovaj infarmacyi, pradstaŭlenaj AAN da hetaha času, abvinavačańni datyčać vykanańnia słužbovych funkcyj słužbovymi asobami AAN u realizacyi prahramy AAN, — napisaŭ u adkazie na zapyt Svabody Rupert Kołvił. — Pa-raniejšamu isnuje roźnica ŭ pohladach pamiž uradam i arhanizacyjaj na hety kont».
«My praciahvajem vieryć, što hetaje pytańnie možna vyrašyć niepasredna pamiž bakami ŭ poŭnaj adpaviednaści ź dziejnaj mižnarodnaj pravavoj bazaj, — adznačajecca ŭ adkazie ofisu AAN u Ženevie. — Tamu my hłyboka škadujem ab sposabie, u jakim na dziaržaŭnym telekanale byli vysunutyja surjoznyja abvinavačańni ŭ adras supracoŭnikaŭ AAN, u tym liku vykarystańnie zapisaŭ razmovaŭ ź dziaržaŭnymi asobami ŭ aficyjnych pamiaškańniach, što vidavočna parušaje prava na pryvatnaje žyćcio i naležnuju praceduru».
Ciapier čytajuć
Što Babaryka i Kaleśnikava adkazali na pytańni pra vajnu92
Kamientary