Офіс ААН у Жэневе адказаў на абвінавачанні з Мінска ў фінансаванні пратэстаў
Офіс Вярхоўнага камісара ААН па правах чалавека адказаў «Свабодзе» на запыт адносна абвінавачаньняў афіцыйным Менскам прадстаўніцтва ААН у Беларусі ў нямэтавым выкарыстаньні сродкаў і фінансаваньні пратэставай дзейнасьці.
«Мы не прымаем характарыстыку гэтай сытуацыі, асабліва вэрсію падзей, якую адлюстроўваюць СМІ, падкантрольныя дзяржаве», — напісаў нам прэсавы прадстаўнік Офісу Вярхоўнага камісара ААН у правах чалавека ў Жэнэве Рупэрт Колвіл.
На гэтым тыдні тэлеканал АНТ у сюжэце журналіста Ігара Тура заявіў, што нямэтавае выкарыстаньне фінансаў, выдзеленых ААН на падтрымку людзей з інваліднасьцю і ахвяр хатняга гвалту, дапусьціў былы старшы раднік у правах чалавека прадстаўніцтва ААН у Беларусі Омэр Фішэр.
Паводле вэрсіі АНТ, Фішэр выдаткаваў зь бюджэту Офісу правоў людзей з інваліднасьцю каля 5 тысяч даляраў на аплату адвакатаў 23-м удзельнікам пратэстаў. Фішэра нельга было затрымаць, дадаў тэлеканал, бо ў яго быў дыпляматычны імунітэт.
Раней паведамлялася, што кіраўнік МЗС Беларусі Ўладзімір Макей падчас сустрэчы з генэральным сакратаром ААН Антонію Гутэрышам паскардзіўся на тое, «як некаторыя прадстаўнікі каманды ААН у Беларусі скарысталі фінансавыя сродкі ААН, якія выдзяляюцца для людзей з інваліднасьцю, на падтрымку ўдзельнікаў пратэставых акцый і да таго падобнае».
«З частковай інфармацыі, прадстаўленай ААН да гэтага часу, абвінавачаньні датычаць выкананьня службовых функцый службовымі асобамі ААН у рэалізацыі праграмы ААН, — напісаў у адказе на запыт Свабоды Рупэрт Колвіл. — Па-ранейшаму існуе розьніца ў поглядах паміж урадам і арганізацыяй на гэты конт».
«Мы працягваем верыць, што гэтае пытаньне можна вырашыць непасрэдна паміж бакамі ў поўнай адпаведнасьці зь дзейнай міжнароднай прававой базай, — адзначаецца ў адказе офісу ААН у Жэнэве. — Таму мы глыбока шкадуем аб спосабе, у якім на дзяржаўным тэлеканале былі высунутыя сур’ёзныя абвінавачаньні ў адрас супрацоўнікаў ААН, у тым ліку выкарыстаньне запісаў размоваў зь дзяржаўнымі асобамі ў афіцыйных памяшканьнях, што відавочна парушае права на прыватнае жыцьцё і належную працэдуру».
Каментары