Prakurorka Kaśjančyk abraziłasia ŭ čarhovy raz — žycharka Fanipala atrymała dva hady «chatniaj chimii»
10 listapada ŭ sudzie Minskaha rajona vyniesieny prysud 42-hadovaj žycharcy Fanipala Anastasii Baranavaj. Sudździa Novikava pryznała jaje vinavataj pavodle art. 369 Kryminalnaha kodeksa za abrazu pamočnicy prakurora Frunzienskaha rajona Minska Aliny Kaśjančyk i vyniesła pakarańnie ŭ vyhladzie dvuch hadoŭ «chatniaj chimii». Prakuror zaprošvaŭ 1,5 hoda «chimii». Taksama ŭ jaje kanfiskavany telefon u dachod dziaržavy.
Anastasija była zatrymanaja na 9—12 žniŭnia 2021 hoda za kamientar u bok Aliny Kaśjančyk u adnym z telehram-kanałaŭ. Zhodna z pakazańniami abvinavačanaj padčas papiaredniaha śledstva, kamientar utrymlivaŭ vyraz «Jak ziamla nosić takuju hnidu?». Linhvistyčnaja ekśpiertyza, kab paćvierdzić abraźlivy charaktar kamientara, nie pravodziłasia.
Paciarpiełaja na pasiadžeńnie nie źjaviłasia.
Žančyna častkova pryznała vinu. Jana raspaviała, što zajšła ŭ teleram-kanał padčas abiedziennaha adpačynku, dzie ŭbačyła infarmacyju pra toje, što adna hramadzianka padała na inšuju hramadzianku ŭ sud z nahody niepraciahnieńnia damovy arendy žylla. Proźviščy žančyn jana nie pamiataje. Pakinuła kamientar «biez zadniaj dumki» i nie chacieła pakryŭdzić čałavieka: dziaŭčyna na zdymku była maładzieńkaja, a jaje forma nahadvała čyhunačnuju. Kali b jana viedała, što dziaŭčyna — supracoŭnik prakuratury, jana b nie pakidała kamientar, ale tady ŭ jaje byŭ «paetyčny paryŭ». Častkova pryznaje vinu, tamu što pisała jaho hramadziancy, a nie pradstaŭniku ŭłady i navat nie adkryvała sam tekst materyjału.
Zhodna z pakazańniami padčas śledstva, Baranava raspaviadała, što joj stała škada žančynu, na jakuju Kaśjančyk padała ŭ sud.
Padčas sprečak abvinavaŭca paličyŭ, što vina Anastasii całkam dakazanaja i paprasiŭ pakarać jaje abmiežavańniem voli z nakiravańniem u PUAT terminam na 1,5 hady — «chimii».
Abaronca padkreśliła, što ŭ dziejańniach Baranavaj adsutničaje skład złačynstva, tamu što abraza pradstaŭnika ŭłady nie była naniesienaja pry vykanańni im słužbovych abaviazkaŭ. U zahałoŭku artykuła ŭtrymlivalisia źviestki ab tym, što žyllovyja adnosiny skłalisia pamiž dvuma hramadziankami, to-bok Kaśjančyk vystupała ŭ jakaści hramadzianki. Linhvistyčnaja ekśpiertyza taksama nie pravodziłasia, tamu advakatka paprasiła apraŭdać Baranavu.
Sud vynies pakarańnie ŭ vyhladzie dvuch hadoŭ «chatniaj chimii».
Pamočnica prakurora Frunzienskaha rajona Minska Alina Kaśjančyk padtrymlivała dziaržaŭnaje abvinavačvańnie ŭ mnohich «palityčnych» spravach, udzielničała ŭ pracesach pa kryminalnych spravach suprać pratestoŭcaŭ. Jana była dziaržabvinavaŭcam u spravie žurnalistak «Biełsata» Kaciaryny Andrejevaj i Darji Čulcovaj, jakich za strym z Płoščy Pieramien asudzili na dva hady kałonii. Taksama Kaśjančyk pradstaŭlała abvinavačvańnie ŭ spravie ab nadpisach «Nie zabudziem» kala miesca hibieli Alaksandra Tarajkoŭskaha.
Heta nie pieršy prysud, vyniesieny za kamientary ŭ adras dziaržabvinavaŭcy Kaśjančyk. Na dva hady chimii była asudžana haspadynia kvatery, jakaja pa zhodzie bakoŭ skasavała damovu arendy kvatery z prakurorkaj. U pačatku listapada Z hady «chimii» atrymaŭ palitviazień Vadzim Hil za kamientary ŭ dačynieńni da 11 słužbovych asob, siarod adrasataŭ była taksama Alina Kaśjančyk. Jašče da dvuch hadoŭ chatniaj chimii prysudzili 43-hadovuju Juliju Kuksu za kamientar u adnosinach da Kaśjančyk u telehram-čacie pad paviedamleńniem pra sud za nadpis «Nie zabudiem! Nie prostim!» na «Puškinskaj».
U dakumientach pa «spravie Epštejna» znajšli ślady bujnych hrašovych pieravodaŭ u Minsk. Znoŭ uspłyło imia Karyny Šulak44
Kamientary