«Ja ŭžo nie dumaŭ, što hety dzień pryjdzie». Praz 43 hady z amierykanskaj turmy vyzvalili čałavieka, jaki byŭ pamyłkova asudžany

Usie kryminalnyja abvinavačvańni sa Strykłanda źniatyja. Atrymlivajecca, jon adbyŭ samaje doŭhaje pamyłkovaje zaklučeńnie ŭ turmie ŭ historyi štata Misury. Jaho niespraviadlivaje źniavoleńnie taksama trapiła ŭ śpis samych doŭhich u historyi ZŠA.

«Usio jašče nie mahu pavieryć, — kaža Strykłand. — Ja ŭžo nie dumaŭ, što hety dzień pryjdzie».

Jon daviedaŭsia pra svajo vyzvaleńnie z navin, što pierapynili sieryjał, jaki jon hladzieŭ.

Za što jaho pasadzili?

U krasaviku 1978 hoda ŭ Kanzasie byli rasstralanyja čatyry čałavieki, troje ź ich pamierli. Sincija Duhłas, adzinaja, chto vyžyŭ, apaznała Strykłanda jak adnaho z zabojcaŭ.

Sincija apaznała dvaich zabojcaŭ u toj ža dzień. Strykłanda, a jaho jana viedała asabista, jana apaznała tolki na nastupny dzień, kali ŭ palicyi joj padkazali, što vałasy Strykłanda padobnyja da vałasoŭ treciaha zabojcy, zhodna ź jaje apisańniem. Duhłas patłumačyła, što adrazu nie zmahła apaznać jaho, bo ŭžyvała ŭ toj dzień kańjak i marychuanu.

Ale ciaham nastupnych 30 hod Duhłas kazała, što pamyliłasia i pamyłkova identyfikavała Strykłanda jak zabojcu. Jana navat sprabavała vyzvalić jaho praz arhanizacyju Midwest Innocence Project. Duhłas pamierła ŭ 2015 hodzie, ale pierad hetym šmat razoŭ kazała siabram pra svaju pamyłku ŭ śviedčańniach 1978-ha hoda.

Dvoje zabojcaŭ, jakich Duhłas apaznała adrazu, pryznali svaju vinu i ŭ vyniku atrymali pa 10 hod źniavoleńnia kožny.

Jak apraŭdali Strykłanda praz 43 hady?

Prakuror akruhi Džeksan Piters Bejkier napisaŭ u žniŭni hetaha hoda: «My ŭsie čuli viadomy vyraz pra toje, što prajaŭleńnie niespraviadlivaści ŭ adnym miescy — heta pahroza spraviadlivaści paŭsiul».

Hetaja cytata z Marcina Lutera Kinha, napisaŭ prakuror, ilustruje i vypadak ź niavinna asudžanym Strykłandam.

Prakuror Bejkier prykłaŭ šmat namahańniaŭ, kab niespraviadlivyja abvinavačvańni byli źniatyja z Kievina Strykłanda. Heta jon rasšukaŭ dokazy taho, što Duhłas pryznavałasia publična ŭ pamyłkovaści svaich śviedčańniaŭ 1978 hoda, i ŭrešcie zmoh davieści spravu da vyzvaleńnia Kievina.

Na pačatku hetaha miesiaca Strykłand davaŭ pakazańni padčas 3-dzionnaha słuchańnia. Jurysty z kamandy pa jaho vyzvaleńni pradstavili nieabchodnyja śviedčańni i arhumienty na karyść apraŭdańnia Kievina.

Strykłand paśla vyzvaleńnia, siedziačy ŭ invalidnym vazku, padziakavaŭ sudździ za pierahlad «śviedčańnia, jakoha nie było» suprać jaho i skazaŭ, što cenić čas, jaki sudździa vydatkavaŭ, kab vysłuchać jaho i zrazumieć, što sapraŭdy adbyłosia ŭ 1978 hodzie.

Taksama Strykłand zajaviŭ, što budzie sprabavać paŭpłyvać na źmieny ŭ zakanadaŭstvie. U jaho jość idei, jak nie dapuścić, kab niešta padobnaje zdaryłasia ź inšymi.

Ci budzie kampiensacyja?

Na płatformie GoFundMe pačaŭsia zbor hrošaj dla Kievina Strykłanda, kab dapamahčy jamu pačać žyćcio nanoŭ. Fandrejzinh inicyjavała taja ž arhanizacyja, što dabivałasia vyzvaleńnia Strykłanda, Midwest Innocence Project. U arhanizacyi śćviardžajuć, što štat Misury nie pradstavić nijakaj kampiensacyi Strykłandu za 43 hady turmy pa niespraviadlivym abvinavačvańni.

Jak časta pierahladajuć abvinavačvańni i apraŭdvajuć niavinnych ludziej?

U 2020 hodzie va ŭsim ZŠA apraŭdali 129 čałaviek. Ludzi, čyje spravy byli pierahledžanyja i kaho apraŭdali ŭ minułym hodzie, praviali ŭ sukupnaści 1737 hadoŭ u turmie.

U 30% vypadkaŭ niespraviadlivyja pryhavory byli źviazanyja z pamyłkami śviedak.

Hieroju filma «Hatel «Ruanda» dali 25 hadoŭ turmy za suviazi z terarystami

Kaniec lehiendzie kryminalnaha śvietu. Rasśledavalniki ZŠA śćviardžajuć, što identyfikavali sieryjnaha zabojcu Zadyjaka

• 0
• 0
• 0
• 0
• 0
• 0
• 0
• 0