5 faktaŭ pra kamunista Ihara Karpienku, jakomu davieryli miesca staršyni CVK
Centrvybarkam Biełarusi ŭznačaliŭ Ihar Karpienka. Da hetaha jon piać hadoŭ kiravaŭ Ministerstvam adukacyi. «Naša Niva» nahadvaje cikavyja fakty pra jaho.
![](http://nnexpictures.fra1.digitaloceanspaces.com/img/w732d4webp1/photos/z_2021_12/hdz_ministr_karpenka-5hzxu-6m628.jpg.webp)
Pačynaŭ z kamsamoła i vychavaŭčaj pracy ŭ Pieduniviersitecie
Ihar Karpienka naradziŭsia ŭ 1964-m u Novakuźniecku ŭ Sibiry. Paśla škoły adsłužyŭ u vojsku (1982—1984) i tolki tady apynuŭsia ŭ Minsku.
Budučy ministr skončyŭ Piedinstytut pa śpiecyjalnaści «Historyja i zamiežnaja mova», u vyniku ŭ hetaj navučalnaj ustanovie i zastaŭsia.
Z 1989 da 2001 hoda byŭ sakratarom kamiteta kamsamoła, načalnikam adździeła vychavaŭčaj pracy ŭ BDPU, paśla na paru hadoŭ staŭ načalnikam upraŭleńnia vychavaŭčaj pracy i jašče na hod — prarektaram pa vychavaŭčaj pracy. Taksama jon uznačaliŭ stvorany pry BDPU paśpiachovy navučalny centr «Sučasny śviet», jaki prapanoŭvaŭ dadatkovuju płatnuju adukacyju pa zamiežnych movach, a taksama kampjutarnyja kursy.
Pa słovach byłych studentaŭ, Karpienka vykładaŭ kulturu maŭleńnia i vyhladaŭ našmat bolš sučasnym i jeŭrapiejskim vykładčykam, čym jaho zamšełyja kalehi.
Byŭ deputatam parłamienta dvuch sklikańniaŭ
U 2004 hodzie Karpienka abiraŭsia ŭ parłamient. Jon bałatavaŭsia pa Jasieninskaj akruzie jak biespartyjny i, pavodle aficyjnaj infarmacyi, nabraŭ 52%. Trom jaho kankurentam-apazicyjanieram zapisali pa 13—14%.
U parłamiencie treciaha sklikańnia Karpienka ŭvajšoŭ u kamisiju pa achovie zdaroŭja, fizkultury, spravach siamji i moładzi.
Na nastupnych vybarach jon užo pradstaŭlaŭ Kamunistyčnuju partyju. Aficyjnyja vyniki dali Karpienku 66,5%, a jaho supiernicy Valancinie Śviackaj ad BNF (jana supraćstajała Karpienku druhi raz zapar) — 20%.
U hetym sklikańni novaśpiečany kamunist zaniaŭsia mižnarodnymi spravami i suviaziami z SND. Naprykancy terminu jon uznačaliŭ adpaviednuju kamisiju.
«Vobrazna kažučy, ja ŭžo nie školnik, kab mnie z PARIE pahražali palcam, što my niešta nie tak robim, — zajaŭlaŭ jon padčas vizitu ŭ Francyju. — U nas stvoranaja pracoŭnaja hrupa, jakaja vyvučaje pytańnie ŭviadzieńnia maratoryju na śmiarotnaje pakarańnie. Rezalucyja PARIE tolki nanosić škodu vyrašeńniu hetaha pytańnia. U nas jość peŭnaja hramadzianskaja i čałaviečaja hodnaść, jakaja nie dazvalaje tryvać nastaŭleńnie z boku».
Pieduniviersitet znachodzicca na płoščy Niezaležnaści ŭ Minsku. U susiednim budynku pracujuć urad i parłamient, praz darohu znachodzicca Minharvykankam. Takim čynam, za 30 hadoŭ žyćcia ŭ Biełarusi Karpienka nie pracavaŭ nidzie, aproč płoščy Niezaležnaści!
Daŭ Łukašenku ŭ Minsku 67% na prezidenckich vybarach 2010 hoda
Padčas prezidenckaj kampanii-2010 Karpienka, jaki adkryta zaklikaŭ svaju partyju padtrymać Łukašenku, uznačaliŭ Minskuju vybarčuju kamisiju.
Jon asabista prychodziŭ na sustrečy apazicyjnych kandydataŭ z vybarcami i papiaredžvaŭ pra niezakonnaść takich akcyj.
U vyniku Minskaja vybarčaja kamisija zafiksavała, što ŭ stalicy za Łukašenku prahałasavała bolš za 67%. Misija Karpienki była paśpiachova vykananaja.
Z vybarčaj kamisii ŭ hałoŭnyja ideołahi Minska
Na nastupny hod Karpienka staŭ namieśnikam staršyni Minharvykankama. U śfieru jaho ŭpłyvu ŭvajšli pytańni ideałohii, adukacyi, achovy zdaroŭja, sportu, turyzmu i sacyjalnaj abarony.
Čym zapomniŭsia Karpienka na pasadzie hałoŭnaha ideołaha stalicy, dyk heta baraćboj ź biełaruskaj łacinkaj u mietro.
Čynoŭnik patrabavaŭ spynić tranślitaracyju hieahrafičnych nazvaŭ, u tym liku, naprykład, stancyj mietro, ź biełaruskaj movy. Adnak ekśpierty zaŭparcilisia i prymusili Karpienku adstupić, prynamsi časova.
Inšaja jaho inicyjatyva — prapanova ŭvieści adkaznaść za falsifikacyju historyi Druhoj suśvietnaj vajny. «Mahčyma, nadyšła nieabchodnaść na zakanadaŭčym uzroŭni zamacavać peŭnuju adkaznaść za falsifikacyju historyi Druhoj suśvietnaj i Vialikaj Ajčynnaj vojnaŭ, pastavić zasłon niedarečnym vykazvańniam chacia b u pamiać pra zahinułych i z pavahi da vieteranaŭ», — tłumačyŭ jon.
Čynoŭnik z partbiletam
U biełaruskich čynoŭnikaŭ nie pryniata znachodzicca ŭ šerahach palityčnych partyj. A Karpienka nie prosta partyjec, a jašče i sakratar (kiraŭnik) praŭładnaj Kamunistyčnaj partyi Biełarusi. Arhanizacyju jon uznačalvaje z 2012 hoda.
«Niesumnienna, u asnovie našaj prahramy lažyć teoryja marksizmu-leninizmu… Heta partyja, jakaja siońnia prapahanduje idei hramadstva sacyjalnaj spraviadlivaści, na moj pohlad, my pavinny zaniać levy fłanh palityčnaj dziejnaści ŭ nas u Biełarusi», — zajaviŭ jon paśla abrańnia.
U śniežni 2016 hoda jon uznačaliŭ Ministerstva adukacyi. Padčas kiraŭnictva Karpienki sistema adukacyi nie źviedała surjoznych reformaŭ.
Debiurakratyzacyja, pavyšeńnie prestyžu pracy nastaŭnika, stvareńnie spryjalnych umoŭ dla raźvićcia adukacyi na biełaruskaj movie — usio heta nie realizavanaje. Nastaŭniki pa-raniejšamu zastajucca apiryščam falsifikacyj na vybarach i instrumientam cisku na baćkoŭ.
Asnoŭnyja cytaty Ihara Karpienki jak ministra adukacyi
«Nastaŭnik, jak i raniej, zastaŭsia aporaj dziaržaŭnaj ułady i suvierenitetu krainy. Tamu palityka prezidenta pa abaronie nastaŭnikaŭ, ich sacyjalnaj padtrymcy, umacavańni stanoŭčaha imidžu piedahoha i škoły zaŭsiody atrymlivaje stanoŭčy vodhuk u piedahahičnaj supolnaści. U svaju čarhu heta nakładaje i peŭnuju adkaznaść na piedahoha za jakaść i vynik jaho dziejnaści». (24.08.2021)
«Paŭlehalnyja pryvatnyja dziciačyja sadki i škoły pad šyldaj indyvidualnych pradprymalnikaŭ, hramadskich ci relihijnych abjadnańniaŭ u bolšaści vykarystoŭvalisia ŭ palityčnych metach, stanavilisia aporaj dla kalarovaj revalucyi. A ich supracoŭniki i kiraŭniki apynulisia ŭ destruktyŭnych arhanizacyjach roznaha ŭzroŭniu». (24.08.2021)
«My pavinny spynić publična krytykavać nastaŭnika, bo tym samym padryvajem jaho aŭtarytet u vačach školnika. Davajcie spynim publičnaje abmierkavańnie nastaŭnikaŭ, dla hetaha jość inšyja formy: piedsaviety, baćkoŭskija schody, piedahahičnyja supołki, kalehii Ministerstva, ale nie internet. I ŭžo sapraŭdy nie školniki pavinny abmiarkoŭvać z baćkami albo jašče z kim-niebudź nastaŭnika». (29.08.2021)
Kamientary