14‑ty tur čempijanatu Biełarusi pa futbole prynios niekalki cikavych vynikaŭ. Naprykład, BATE byŭ bity ŭ Mahilovie «Dniaprom».
14‑ty tur (start druhoha kruhu) čempijanatu Biełarusi pa futbole ŭ vyšejšaj lizie prynios niekalki cikavych, a časam niečakanych, vynikaŭ.
Barysaŭski BATE paciarpieŭ druhuju parazu ŭ čempijanacie i druhuju parazu zapar. U Mahilovie ŭ subotu jon byŭ bity tamtejšym «Dniaprom» — 1:3.
U sioletnim pieršynstvie piacirazovy čempijon Biełarusi pieršuju parazu atrymaŭ ad «Šachciora» (2:3) u kancy traŭnia, a tydzień tamu, u pieršym matčy 3‑ha kvalifikacyjnaha raŭndu Lihi čempijonaŭ, ad łatvijskaha «Vientśpiłsa».
Salihorski «Šachcior» adpomściŭ navapołackamu «Naftanu» za parazu ŭ finale Kubku Biełarusi. Dy jak! U Navapołacku ŭ niadzielu salihorcy vyjhrali ź likam 4:0. Pryčym usie hały byli zabityja ŭ druhim tajmie.
Heta byŭ nie adziny bujny vynik niadzieli.
U Žodzinie «Tarpieda» na rodnym stadyjonie (kłub nie hulaŭ na svaim poli ad kanca 2007 hoda!) vyjhrała ŭ «Viciebska» — 3:0. Hetaja pieramoha vyvieła tarpiedaŭcaŭ na čystaje druhoje miesca. Hrodzienski «Nioman z takim ža likam pieramoh u haściach «Homiel» (0:3).
Inšyja vyniki prynieśli ničyi: MTZ‑RIPA — «Hranit» — 2:2, «Dynama» Brest — «Smarhoń» — 1:1, «Minsk» — «Dynama» Minsk — 0:0. Heta byŭ debiut hałoŭnaha treniera «Dynama» 27‑hadovaha Kiryły Alšeŭskaha.
Takim čynam u 14‑m tury byli zabityja 20 hałoŭ, 9 — haspadarami, 11 — haściami.
Turnirnaje stanovišča: BATE — 34, Tarpieda — 25, «Dniapro», «Dynama» Minsk — pa 23, «Nioman», «Naftan» — pa 22, «Šachcior» — 21, «Dynama» Brest — 20, «Minsk» — 19, «Homiel» — 18, MTZ‑RIPA — 15, «Viciebsk», «Hranit» — pa 13, «Smarhoń» — 6.
Nastupny tur projdzie 16 žniŭnia, a ŭ nastupnyja vychodnyja, 8-9 žniŭnia, projduć matčy 1/16 Kubku Biełarusi pa futbole.
Kamientary