Bolšaść biełaruskich ministraŭ na pasadzie kala dvuch hadoŭ, ale jość i doŭhažychary. Jak dumajecie, chto jany?
Z pačatku 2020 hoda i da hetaha času Łukašenka zamianiŭ bolš za pałovu kiraŭnikoŭ ministerstvaŭ. Siaredni termin na pasadzie sučasnaha ministra ŭ bolšaści vypadkaŭ nie pieravyšaje dva hady. Adnak jość i tyja, chto zmoh utrymacca ŭ kreśle i dolej.
Z 24 ministraŭ troje zajmajuć kresły pa try hady. Heta ministr transpartu Alaksiej Aŭramienka, ministr enierhietyki Viktar Karankievič i ministr suviazi i infarmatyzacyi Kanstancin Šulhan.
Čatyry hady ŭ kreśle voś-voś adznačać ministr sportu Siarhiej Kavalčuk, ministr pryrody Andrej Chudyk i ministr lasnoj haspadarki Vital Droždža.
Ale jość i trojka lidaraŭ.
Treciaje miesca — Iryna Kaścievič
55-hadovuju ministarku pracy pryznačyli 14 sakavika 2017 hoda. Krychu bolš čym praź miesiac Iryna Kaścievič adśviatkuje piacihodździe ministarskaj dziejnaści. Cikava, što jana — adzinaja žančyna siarod usich ministraŭ.
Minčanka Kaścievič pryšła ŭ ministry pracy ź minekanomiki, kudy patrapiła paśla dvaccaci hod u statystyčnym kamitecie. Darečy, jaje papiarednica Maryjana Ščotkina zajmała pasadu ministra pracy siem hod, a da hetaha Uładzimir Patupčyk pratrymaŭsia try hady.
Druhoje miesca — Siarhiej Nalivajka
Ministr pa padatkach i zborach pryjšoŭ na pasadu 27 śniežnia 2014 hoda. Ciapier jamu 48.
Uradženiec Babrujska, jon adrazu paśla vypusku z VNU pajšoŭ pracavać u padatkovuju inśpiekcyju rodnaha horada, potym niejki čas prabyŭ u administracyi adnaho z rajonaŭ. Zatym byŭ namieśnikam kiraŭnika padatkovaj inśpiekcyi Kastryčnickaha rajona Mahilova.
Paśla hetaha čatyry hady čynoŭnik pravioŭ u kreśle namieśnika ministra. Ministram Nalivajka pracuje voś užo vośmy hod. I heta rekord, bo jaho papiaredniku ŭdałosia ŭtrymacca ŭ kreśle tolki piać hod.
Pieršaje miesca — Uładzimir Makiej
Nu i rekardsmienam siarod ministraŭ źjaŭlajecca 63-hadovy Uładzimir Makiej.
Ministram zamiežnych spravaŭ jon staŭ 20 žniŭnia 2012 hoda. Makiej rodam z Hrodzienščyny. Jon doŭhi čas pracavaŭ u dypłamatyčnaj misii, byŭ pamočnikam Łukašenki i kiraŭnikom jaho administracyi.
I voś užo dziasiaty hod Makiej zastajecca niaźmiennym kiraŭnikom ministerstva. Cikava, što jaho papiarednika Siarhieja Martynava źniali z pasady jakraz na dziasiatym hodzie ŭ ministerskim kreśle.
Jak vyhladaje typovy biełaruski ministr?
Što tyčycca partreta biełaruskaha ministra, to jon vyhladaje tak. Heta, jak praviła, mužčyna. Z 24 ministraŭ u nas tolki adna žančyna.
Siaredni ŭzrost biełaruskaha ministra — 50 hod. Samamu maładomu kiraŭniku ministerstva 37 hod, najstarejšamu — 64.
Z bolšaj vierahodnaściu jon budzie rodam ź Minska i Minskaj vobłaści ci Hrodzienskaj i Mahiloŭskaj. Vierahodnaść natrapić na ŭradženca Homielščyny — nul. Cikava, što dvoje ministraŭ rodam z Ukrainy. Uradžencaŭ Rasii na ministerskich pasadach niama.
Siaredni «staž» biełaruskaha ministra — 1,5 hoda. I heta vielmi mała. Prablemu deficytu i ciakučki dziaržaŭnych słužačych ahučyŭ jašče vosiem hod tamu kandydat histaryčnych navuk Viktar Hiermienčuk, jaki pracuje ŭ Akademii kiravańnia pry prezidencie z 1991 hoda.
Dadatkova siarod prablem dziaržaŭnaj słužby Biełarusi Hiermienčuk vyłučaŭ adsutnaść efiektyŭnaj kadravaj palityki, nizki ŭzrovień prafiesijanalizmu dziaržsłužačych i aktyŭnaje stareńnie.
Kamientary