Kaliści viadomyja rasijanie krucilisia ŭ adnym śviecie: chadzili ŭ adny i tyja ž maskoŭskija buciki, vystupali na adnych karparatyvach. Ale z uvarvańniem Rasii va Ukrainu mnohaje źmianiłasia. Niechta z zorak vykazaŭsia suprać vajny i praz heta źjechaŭ za miažu, bo tam bolš biaśpiečna. Inšyja ž asoby na słovach vykazvajuć padtrymku pucinskamu režymu, ale sami ŭsio roŭna źjazdžajuć u inšyja krainy, dzie pracuje instahram i možna zajści ŭ «Makdonalds» pa kavu. Voś samyja viadomyja vypadki «ŭciokaŭ».
Izrail
Mała chto z rasijskich zorak, jakija źjazdžajuć za miažu, kažuć, što jeduć u emihracyju. Chutčej, jany raspaviadajuć, što prosta źjechali ŭ adpačynak — ale ž, zdajecca, pačatak sakavika nikoli nie byŭ haračym siezonam u rasijskim turbiznesie.
Ksienija Sabčak adnoj ź pieršych adpraviłasia, jak jana kaža, u adpačynak. Spačatku jana pajechała z synam u Turcyju, a paźniej źjavilisia foty Sabčak z aeraporta ŭ Izraili. Žančyna admaŭlaje toje, što pajechała ŭ emihracyju, i padkreślivaje, što ŭ jaje niama «nijakich inšych hramadzianstvaŭ, tupičkoŭ i jacht».
U Izraili ciapier nie tolki Sabčak, ale i inšyja viadomyja rasijanie. Kažuć, naprykład, što tudy pajechali Ała Puhačova i Maksim Hałkin. Apošni raniej adkryta vykazaŭsia suprać rasijskaj ahresii ŭ bok Ukrainy, paśla čaho niekalki kancertaŭ komika admianili. A Puhačova zapisała zvarot, što jana prosta ŭ adpačynku.
Pa niekatorych źviestkach, u Izrail pajechaŭ komik Siamion Ślepakoŭ — i znoŭ na adpačynak, jak jon sam kaža. Ale ž mieniedžarka artysta ŭsio admaŭlaje i kaža, što nasamreč jon znachodzicca ŭ Ispanii. Taksama ŭ Izrail — na «dzień narodzinaŭ da cioci» — adpravilisia śpiavačka Valeryja i jaje muž Iosif Pryhožyn.
U šerahu izrailskich miedyja źjavilisia źviestki pra toje, što Aleh Hazmanaŭ padaŭ dakumienty na atrymańnie hramadzianstva hetaj krainy. Pradstaŭnik śpievaka heta abviarhaŭ. I, narešcie, jak stała viadoma telehram-kanału «Stalinhułah», u atrymańni takoha hramadzianstva Hazmanavu było admoŭlena.
Hety patryjarch rasijskaj pop-sceny padtrymaŭ rašeńnie Pucina ŭvieści vojski va Ukrainu. 5 sakavika hienprakurorka Ukrainy Iryna Vieniedziktava abviaściła, što praz heta śpiavak ciapier zavočna aryštavany va Ukrainie. Kijeŭ padazraje Hazmanava ŭ «zamachu na terytaryjalnuju cełasnaść Ukrainy», pa tym ža artykule trochi raniej byŭ zavočna aryštavany režysior Mikita Michałkoŭ.
7 sakavika Hazmanaŭ paabiacaŭ vystupić z kancertam pierad žonkami rasijskich sałdat, što ŭdzielničajuć u vajnie va Ukrainie. Rasijski Pieršy kanał dziela takoha navat źmianiŭ svaju sietku viaščańnia — tam raptoŭna vyrašyli pakazać hledačam jubilejny kancert da 70-hodździa Hazmanava.
Abjadnanyja Arabskija Emiraty
Niekalki viadomych rasijskich błohierak vybrali dla viasieńniaha adpačynku AAE. Naprykład, tudy vylecieła televiadučaja i śpiavačka Volha Buzava (bolš za 23 miljony padpisčykaŭ u instahramie). Buzava nakiravałasia ŭ emirat Ras-el-Chajma, jaki, hledziačy pa sacsietkach zorki, jakraz i prafinansavaŭ jaje padarožža.
Svoj adjezd Volha prakamientavała tak: «Mnie zaraz heta prosta nieabchodna. Prosta ŭdychnuć marskoje pavietra i pastaracca choć nienadoŭha vyklučyć mozh». Pad jaje pastami ŭ instahramie, jak i pad pastami inšych viadomych rasijskich błohierak, bieźlič kamientaroŭ ludziej, jakija nie razumiejuć, jak možna abstrahavacca ad vajny z boku ŭłasnaj krainy.
U arabski adpačynak (tolki ŭ inšy emirat — Dubaj) vylecieła i inšaja viadomaja televiadučaja, Ksienija Baradzina (bolš za 18 miljonaŭ padpisčykaŭ u instahramie).
Paryž
Taki vybar dla siabie zrabiŭ Alaksandr Vasiljeŭ, historyk mody i viadučy (napeŭna, užo z prystaŭkaj «eks») prahramy «Modny prysud». Vasiljeŭ niekali pierajazdžaŭ u Francyju — jak jon sam kaža, u 1982 hodzie apynuŭsia tam jak emihrant ad savieckaha režymu.
Niekalki dzion tamu Vasiljeŭ napisaŭ adkryty list municypalitetu litoŭskaha horada Visahinas, dzie zachoŭvajecca jaho vialikaja kalekcyja staražytnych kaściumaŭ. U im Vasiljeŭ, jaki maje litoŭskaje hramadzianstva na praciahu bolš čym 20 hadoŭ, vykazaŭsia suprać vajny: «Biesprecedentnyja ambicyi adnaŭleńnia vielizarnaj Impieryi vyklikajuć vajennuju akupacyju, jakaja prosta zaraz razburaje niezaležnuju dziaržavu Ukrainy. Hetaja vajna, biezumoŭna, vyklikaje taksama i biesprecedentnuju izalacyju Rasii i, bolš za toje, moža vyklikać śmiarotnuju jadziernuju vajnu na płaniecie Ziamla».
Źjechali, nie raspaviadajučy, kudy
Taki vybar zrabili rasijskija dziejačy, što raniej nie vykazvali adkrytaj padtrymki pucinskamu režymu. Naprykład, heta kinarežysior Kantemir Bałahaŭ (vy možacie viedać jaho pa stužcy «Dyłda»), paetka Viera Pałazkova, kinakrytyk Anton Dolin.
Hetyja ludzi kazali pra toje, što situacyja ŭ Rasii prosta nie pakinuła im vybaru i prymusiła zrabić takoje ciažkaje rašeńnie — pakinuć krainu.
Adna z samych jarkich historyj u hetym kantekście — adjezd Antona Dolina. Vajnu va Ukrainie Dolin ličyć kracham svajho śvietapohladu na Rasiju: «Nijakaj Rasii bolš niama. Rasija — kuryca z adsiečanaj hałavoj». U dzień adjezdu dźviery ŭ kvateru kinakrytyka paznačyli simvałam Z, jaki zaraz ćviorda źviazany z vajnoj va Ukrainie, a miesiendžary Dolina ŭzłamali.
Jak reahujuć rasijskija ŭłady
Adjezd zorak — tolki elemient bolš hłabalnaj emihracyi. Dziasiatki tysiač hramadzian Rasii źjechali z krainy paśla pačatku vajny.
U rasijskaj Dziarždumie ŭžo prapanavali nie puskać nazad u krainu zorak i aliharchaŭ, što jaje zaraz pakinuli. Deputat ad «Adzinaj Rasii» Sułtan Chamzajeŭ śćviardžaje: «Treba zabaranić advarotny ŭjezd u krainu ŭsim, chto źbieh. U taki čas usim treba abjadnoŭvacca i stvarać dziela raźvićcia i ŭmacavańnia Rasii».
Jak stać lidaram? Uroki ad Uładzimira Zialenskaha
Historyja paŭtarajecca. Vajennyja karykatury savieckaha časopisa «Krokodił» namalavanyja jak siońnia
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary