Ukraincy źniščyli cełuju BTH rasijan pry sprobie pierapravicca cieraz Daniec. Voś jak heta było
Pakul u Maskvie rychtavali dy abmiarkoŭvali parad, z 5 da 12 maja pad Biełahoraŭkaj u Łuhanskaj vobłaści ŭkrainskaja armija zdabyła vidoviščnuju pieramohu. Byli źniščanyja dźvie rasijskija pantonnyja pierapravy i braniatankavaja kałona, jakaja sprabavała farsiravać raku Sievierski Daniec. Značnuju parazu pryznajuć i rasijskija krynicy. Fota z dronaŭ, apublikavanyja ukrainskimi vajskoŭcami, śviedčać pra kałasalnyja straty rasijan. Tłumačym, jak heta adbyłosia.
Na kadrach, apublikavanych ukrainskimi vajskoŭcami, vidać zharełyja tanki dy vajskovyja mašyny i zatoplenyja častki pantonnaha mosta. Na zdymkach taksama vidać šmat paškodžanych abo kinutych mašyn — usiaho 73.
Ministerstva abarony Ukrainy śćviardžaje, što padčas pierapravy cieraź Sievierski Daniec na zachad ad Sievieradaniecka Rasija straciła značnyja siły — sama mieniej adnu bataljonnuju taktyčnuju hrupu, a pantonnaje mastavoje abstalavańnie było vyviedziena z ładu padčas farsiravańnia raki.
Pieraprava cieraz raku — ryzykoŭny manieŭr. Daradca kiraŭnika MUS Ukrainy Viktar Andrusiŭ zajaŭlaŭ, što bajavoje sutyknieńnie adbyłosia pablizu Biełahoraŭki ŭ Łuhanskaj vobłaści. Andrusiŭ śćviardžaje, što ŭkrainskija vajskoŭcy «raźbili cełuju bataljonna-taktyčnuju hrupu».
U svaju čarhu brytanskaja raźviedka paviedamiła ab značnych stratach Rasii padčas hetaha incydentu.
«Ukrainskija siły paśpiachova praduchilili sprobu rasijskaj pierapravy cieraz raku na Danbasie. Na zdymkach vidać, što padčas farsiravańnia raki Sievierski Daniec na zachad ad Sievieradaniecka Rasija straciła značnuju častku bronietechniki prynamsi adnoj bataljonnaj taktyčnaj hrupy, a taksama razhornutuju tam pantonnuju mastavuju techniku», — havorycca ŭ paviedamleńni.
«Akramia taho, Rasija prykładaje značnyja namahańni na ŭskrainach Iziuma i Sievieradaniecka, kab dasiahnuć praryvu ŭ Słaviansk i Kramatorsk. Asnoŭnaja ich meta — akružyć ŭkrainskija siły. Adnak rasijskija sałdaty nie zmahli dasiahnuć nivodnaha značnaha prasoŭvańnia, niahledziačy na zasiarodžvańnie sił na Danbasie paśla vyvadu i pieradysłakacyi padraździaleńniaŭ z Kijeŭskaj i Čarnihaŭskaj abłaściej», — miarkuje brytanskaja vyviedka.
Ale jak ukraincy ažyćciavili hetuju apieracyju?
Ukrainski vajskovy inžynier i aficer sapiornaha padraździaleńnia ŭ tvitary raskazaŭ, jak źniščałaja pantonnaja pieraprava rasijan.
Aficer piša, što spačatku była infarmacyja ad raźviedki, što pa toj bok raki jość rasijanie, i jany kancentrujuć roznuju techniku.
Potym hetaha aficera paprasili zrabić inžyniernuju raźviedku na race Sievierski Daniec. Razam z raźviedvalnymi častkami jon 7 maja adpraviŭsia daśledavać rajon Hryhoraŭki i Biełahoraŭki. Frantavyja padraździaleńni raźviedki ŭ Biełahoraŭcy paviedamili, što na inšym bierazie raki źbirajucca mašyny rasijan.
«Ja daśledavaŭ miascovaść i prapanavaŭ miesca, dzie ruskija mahli b pasprabavać zmantavać pantonny most, kab pierajści na inšy bok. A taksama vykarystaŭ dalnamiery, kab vyznačyć, što raka maje šyryniu 80 m, tamu rasijanam spatrebicca 8 častak (pa 10 mietraŭ) mosta, kab dabracca da inšaha boku. Ja viedaŭ: kab arhanizavać most pry takim ciačeńni raki, im spatrebiacca matornyja łodki, i heta zojmie pa mienšaj miery dźvie hadziny pracy. Mnie spatrebiŭsia dzień, kab usio pravieryć. I ja pavinien byŭ heta zrabić 8 maja», — piša aficer-inžynier.
Jon dałažyŭ hetuju infarmacyju svaim kamandziram. Taksama skazaŭ padraździaleńniu, jakoje nazirała za hetaj častkaj raki, što im treba sačyć za hukam matornych łodak. Bačnaść ŭ hetym rajonie była drennaja, tamu što rasijanie padpalvali pali i lasy i kinuli šmat dymavych hranat.
Ale huk ad ich byŭ. Usio adbyłosia 8 maja ranicaj. Mienavita tam, dzie skazaŭ inžynier.
«Ja taksama byŭ tam, kab usie pravieryć — padniaŭsia dron i pierakanaŭsia, što rasiejcy staviać pantonny most. Nieadkładna dałažyŭ kamandziram», — piša jon.
Račnoje padraździaleńnie nie bačyła padraździaleńniaŭ rasijan, ale zmahło pačuć matornyja łodki i nieadkładna pra heta paviedamić. Artyleryja była hatovaja. Rasijanie zmantavali siem častak mosta z vaśmi. Im navat udałosia pierakinuć niekatoryja vojski i techniku cieraz raku. Pačaŭsia boj.
Prykładna za 20 chvilin paśla taho, jak raźviedvalnaje padraździaleńnie paćvierdziła naviadzieńnie rasijskaha mosta, ciažkaja artyleryja pačała nanosić udary pa rasijskich siłach, a potym padklučyłasia ŭkrainskaja avijacyja.
Paśla pieršaha dnia bajoŭ, ranicaj 9 maja, most byŭ razburany. Častka rasijskich vojskaŭ (~30—50 adzinak techniki + piachota) zastalisia na ŭkrainskim bierazie raki, i šlach nazad im byŭ pierakryty. Jany sprabavali pierapraŭlacca nazad pa złamanym moście. Potym pasprabavali navieści novy most. Tady ŭkrainskaja avijacyja pačała mahutnyja bambardziroŭki rajona i źniščyła tam reštki rasiejskaj techniki i druhi most, jaki jany sprabavali ŭźvieści, piša ŭkrainski aficer.
10 maja pantonny most byŭ całkam razburany. Mienavita tady źjavilisia pieršyja fatahrafii z hetaha rajona.
Pieramoha pad Biełahoraŭkaj sarvała akružeńnie Lisičanska — važnaha pramysłovaha centra ŭ Łuhanskaj vobłaści.
«Chočacca sa škadavańniem adznačyć, što ŭ praciŭnika artyleryja pracuje čaściakom jakaśniej našaj, — piša rasijski błohier @grey_zone. — I heta nie zaležyć ad bajcoŭ taho ci druhoha boku, heta zaležyć ad siłaŭ i srodkaŭ raźviedki, vyjaŭleńnia, raźliku, naviadzieńnia, karektavańnia i daraźviedvańnia celaŭ, naturalna, zbolšaha bieśpiłotnymi srodkami. USU ŭžyvajuć zachodniuju sistemu razumnaha kiravańnia bojem, my ŭžyvajem liniejku na papiarovuju kartu», — piša błohier.
-
Va Ukrainie zatrymali ahienta HRU, jaki byŭ kamandziram adnaho z padraździaleńniaŭ USU
-
U Rasii mužčyna, jaki vydavaŭ siabie za ŭdzielnika «SVA» i sprabavaŭ utapić dziaŭčynu praź sinija vałasy, pajšoŭ z turmy na vajnu i zahinuŭ
-
«Trupy, trupy, trupy našych. Pad poŭnym kantrolem dronaŭ». Dziońnik rasijskaha šturmavika, jaki acaleŭ pad Vaŭčanskam
Amierykanka raskazała, jak vykładała va ŭniviersitecie ŭ Viciebsku i navat dała paru ŭrokaŭ milicyi4
Kamientary