U Nacyjanalnym histaryčnym muziei prybrali fihury Vitaŭta i Jahajły
Taksama vierahodna, što da kanca hoda ekspazicyju pra šlachtu zamieniać na Rasijskuju impieryju.
«Na Vitaŭta i Jahajłu napisali skarhu. Styl skarhi byŭ taki: «što hetyja polskija akupanty tut robiać?» — kažuć znajomyja ź situacyjaj.
Pra toje, što źbirajucca prybrać ekspazicyju, pryśviečanuju šlachcie (jana ŭ siekcyi hieraldyki), «NN» paviedamiła adrazu nielki čałaviek z kulturnaj śfiery.
U Nacyjanalnym histaryčnym muziei adkazali, što ciapier na miescy fihur Vitaŭta i Jahajła rekanstrukcyja Kreŭskaha zamka.
«Ekspazicyja pra hieraldyku ŭ nas na druhim paviersie jość. Nakont taho, što zamieniać na niešta, źviazanaje z Rasijaj, — nie viedaju. Mahčyma», — adkazali ŭ muziei, kudy my patelefanavali jak naviedniki.
Skulptury vialikaha kniazia litoŭskaha Vitaŭta i karala Jahajły byli ŭstalavanyja ŭ muziei ŭ 2011 hodzie.
Vonkavy vobraz Vitaŭta byŭ adnoŭleny na asnovie vyjavy z asabistaj piačatki kniazia. Za asnovu partretnaj vyjavy Jahajły ŭziata płastyka nadmahilla karala, harnitur adnoŭleny pa vyjavie z abraza «Pakłanieńnie troch karaloŭ». Nad partretnymi skulpturami pracavali mastaki Pavieł Łuk i Jury Piskun.
Vitaŭt (1350-1430) źjaŭlajecca adnym z samych viadomych kiraŭnikoŭ VKŁ. Pry im terytoryja kniastva značna pašyryłasia — ad Bałtyjskaha da Čornaha mora. Razam sa stryječnym bratam, polskim karalom Jahajłam, Vitaŭt uznačaliŭ bitvu pad Hrunvaldam u 1410 hodzie, u vyniku jakoj byŭ razhromleny Teŭtonski orden.
Jahajła (kala 1362-1434), kab dać rady cisku Teŭtonskaha ordena, vyrašyŭ, što VKŁ nieabchodny sajuz z Polščaj. Dziela hetaha jon pasvataŭsia da polskaj karalevy Jadvihi. U 1386 hodzie ŭ Krakavie jon byŭ achryščany pa katalickich zvyčajach i abviančany ź joj. Paśla taho Jahajła achryściŭ pavodle zachodniaha (ryma-katalickaha) abradu i tych žycharoŭ VKŁ, jakija da taho času zachoŭvali pahanstva, u tym liku na terytoryi sučasnaj Biełarusi.
Mienavita z Kreŭskaj unii, zaklučanaj Jahajłam u 1385 hodzie, pačalisia stahodździ intehracyi Vialikaha Kniastva Litoŭskaha i Karaleŭstva Polskaha, vynikam čaho stała stvareńnie ŭ 1569 hodzie Rečy Paspalitaj Abodvuch Narodaŭ.
Čytajcie taksama:
«U metach adarvańnia ad Rasii». Carskaja Rasija ci łukašenkaŭskaja RB: dzie «Našaj Nivie» pracavałasia lahčej
«Sistema abarony Vialikaha Kniastva Litoŭskaha ŭ XVI—XVII stahodździach». Publičnaja lekcyja Mikoły Vołkava VIDEA
Łukašenka pra adklučeńnie internetu ŭ 2020-m: Kali heta paŭtorycca, adklučym zusim23
Kamientary