Fiaduta chudy, Kastusioŭ mocna chvory, a Ziankovič zmročny. Źjavilisia pieršyja videa i fota z suda

Minski abłasny sud siońnia pačaŭ razhladać spravu «ab zmovie z metaj zachopu dziaržaŭnaj ułady». Pasiadžeńni prachodziać u budynku Minskaha rajonnaha suda.

Fihurantami pa spravie prachodziać biełaruska-amierykanski juryst i palityk Juryj Ziankovič, navukoviec Alaksandr Fiaduta, były mieniedžar sielskahaspadarčaha i kamunalnaha pradpryjemstvaŭ, a paźniej staršynia Partyi BNF Ryhor Kastusioŭ, a taksama 44-hadovaja piedahoh Volha Hałubovič i 36-hadovy kiroŭca-dalnabojnik Dzianis Kraŭčuk. Apošnija dvoje pracavali na Ziankoviča — Volha była supracoŭnicaj ofisa, a Dzianis karotki čas hladzieŭ za domam Ziankoviča pad Miadziełam, jon paznajomiŭsia z palitykam, kali jany razam adbyvali sutki ŭ 2020 hodzie.

Spravu razhladaje sudździa Uładzimir Areška. Adnak zvyčajna ŭ palityčnych spravach ad sudździ ničoha nie zaležyć.

Papiarednie było abvieščana, što praces budzie prachodzić u zakrytym režymie. Adnak u pieršy dzień suda vyśvietliłasia, što jon budzie adkryty — adkrytaść aznačaje, adnak, što ź ŚMI dostup tudy buduć mieć tolki dziaržaŭnyja. Pieršyja foty i videa źjavilisia ŭ ahienctva BiełTA.

57-hadovy Alaksandr Fiaduta zaŭvažna pachudzieŭ. 65-hadovy Ryhor Kastusioŭ, chvory na rak, mocna pastareŭ. A 44-hadovy Juraś Ziankovič, centralnaja postać va ŭsioj hetaj spravie, vyhladaje zmročnym.

Juraś Ziankovič vyhladaje čałaviekam, jaki najmienš zdolny stać lidaram čahości — jon navat lidaram nievialikich emihracyjnych asiarodkaŭ ci Partyi BNF nie staŭ. Jon lubiŭ hučnyja, skandalnyja zajavy. I mienavita jaho abvinavacili ŭ sprobie arhanizacyi «vajennaha pieravarotu» — u kantakcie z vysokapastaŭlenymi siłavikami. 

Jon, jak i Alaksandr Fiaduta, i Ryhor Kastusioŭ, — nie čałaviek ź siłavym bekhraŭndam i suviaziami ŭ siłavych strukturach, što, napeŭna, jość pieradumovaju luboha paśpiachovaha pieravarotu.

Tym nie mienš, u videasiužetach na biełaruskim i rasijskim telebačańni havorycca, što Juraś Ziankovič i Alaksandr Fiaduta sustrakalisia ŭ karčmie na Sadovym kalcy ŭ Maskvie z «niekatorymi hienierałami Uzbrojenych sił Biełarusi» — ci z asobami, jakija vydavali siabie za hienierałaŭ, ci z realnymi hienierałami, jakija «hulali» ŭ zmoŭnikaŭ, jakija majuć namier ažyćciavić pieravarot. Hetyja sustrečy byli źniatyja schavanaj kamieraj, imavierna, adnym z «hulcoŭ».

Ziankoviča abvinavačvajuć pa č. 1 art. 357 KK (zmova z metaj zachopu dziaržaŭnaj ułady niekanstytucyjnym šlacham), č. 1 art. 361-1 KK (stvareńnie ekstremisckaha farmavańnia i kiraŭnictva im), č. 3 art. 361 KK (publičnyja zakliki da zachopu dziaržaŭnaj ułady), č. 3 art. 130 KK (raspalvańnie sacyjalnaj varožaści).

Fiadutu i Kastusiova — pa č. 1 art. 357 KK (zmova z metaj zachopu dziaržaŭnaj ułady niekanstytucyjnym šlacham).

Hałubovič i Kraŭčuka — pa č. 1 art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak).

Čytajcie taksama: Chto taki Juraś Ziankovič — amierykanski advakat, jaki mieŭ kałasalnaje žadańnie źviartać na siabie ŭvahu

Chto tyja siem čałaviek, kaho abvinavacili ŭ padrychtoŭcy zamachu na Łukašenku?

Stała viadoma imia piataha zatrymanaha pa spravie Ziankoviča i Fiaduty — heta dalnabojščyk z Naračy

Pra ŭsiu spravu viadoma pakul nie tak i šmat.

«Vielmi ciažka rabić niejkija vysnovy, bo ŭsiu infarmacyju, jakuju my viedajem, my majem ź dziaržaŭnaha telebačańnia, inšaha niama, — kazaŭ u mai 2021 hoda pravaabaronca Valancin Stefanovič, jakoha paźniej samoha aryštujuć. Praktyčna, našy viedy ab spravie z taho času nie źmianilisia. — Viedajem taksama, što kazaŭ Łukašenka. Maŭlaŭ, hienierał byŭ niesapraŭdnym, jaho syhraŭ niejki aficer. Usio astatniaje — heta infarmacyjnaja nakručvańnie, pačynajučy ad Bajdena, skončvajučy džypami, jakija pavinny byli prarvacca ź Litvy.

Davajcie razvažać sa składu artykuła 357. U vypadku «zmovy» złačynstva ličycca skončanym u momant tajemnaha pahadnieńnia ab zachopie ŭłady pamiž dvuma ci bolš asobami. Zusim nieabaviazkova, kab heta byli asoby, što majuć niejkija ŭładnyja paŭnamoctvy. Kali b heta ŭsio skončvałasia tolki razmovami ŭ zumie, biez kantaktaŭ ź inšymi asobami, to možna było kazać: ci mała chto pra što razmaŭlaje i spaborničaje ŭ daścipnaści?

Ale ŭsio ž kantakty z «vajskoŭcami», napeŭna, byli. Vierahodna, što jany sapraŭdy mahli pieradavać kamuści niejkija hrošy. Byŭ zrobleny šerah dziejańniaŭ, a zaviaršalny etap — sustreča ŭ Maskvie, dzie byli damoŭlenaści ab dziejańniach.

Možna vieści havorku ab «pravakacyi złačynstva», ale heta składanaja tema. Viadoma, što śledčyja vykarystoŭvajuć takija mietady ŭ svajoj pracy, jak, skažam, «kantrolny zakup» u narkahandli. I suśvietnaja praktyka kaža, što śpiecsłužby, palicyja takija mietady mohuć vykarystoŭvać. Ale jany nie mohuć hrać aktyŭnuju rolu. Adna situacyja, kali hetyja kantakty šukali abvinavačanyja, i zusim inšaja — kali nibyta «hienierały», — tłumačyŭ Stefanovič.

Stefanovič nahadvaŭ, što «heta nie pieršaja sprava ab «zmovie, nakiravanaj na zachop ułady». Čamuści našy orhany zabylisia pra Kaardynacyjnuju radu, ale tam značna praściej, bo Rada dziejničała publična. Jany prapanoŭvali ŭładam pieramovy, a nie niekanstytucyjny zachop.

Jasna, što heta była raspracoŭka, śpiecapieracyja. Usio heta fiksavałasia, usie pieradačy. Ja vielmi ździŭleny niekatorymi piersanažami, jakija tudy ŭpisalisia. Mabyć, prysutničała niejkaja naiŭnaść, — adznačaŭ Stefanovič. — Z taho, što pakazali pa TB, nie da kanca zrazumiełaja rola Ryhora Kastusiova. Mahčyma, jon moh być nieabaznany ŭ hetych płanach. Kali jon nie viedaŭ pra dziejańni i płany, to viny tut niama», — mierkavaŭ Stefanovič.

Juraś Ziankovič byŭ najbolš viadomy supiarečlivymi, časam adkryta skandalnymi zajavami. Mnohija bačyli ŭ ich prosta kałasalnaje žadańnie źviartać na siabie ŭvahu.

Paśla tajamničaj śmierci hałoŭnaha redaktara Chartyi'97 Aleha Biabienina Ziankovič vykazvaŭ zdahadki, što toj chacieŭ dasiahnuć seksualnaha zadavalnieńnia praz zadušeńnie, ale pierastaraŭsia i pamior. A paśla hibieli sałdata Koržyča jon zajaviŭ, što «heta narmalna, što ŭ vojsku zdarajucca nadzvyčajnyja stanoviščy i što navat hinuć ludzi». Jaho frazy vyklikali abureńnie ŭ sacsietkach, asabliva ŭ rodnych achviaraŭ, pra pamiać jakich cynična vykazvaŭsia Ziankovič.

Ziankovič vystupaŭ u jutubie, pisaŭ u fejsbuku, ale nidzie nie staŭ miehapapularnym błohieram.

U 2018-m Ziankovič sabraŭsia być miedyjataram pamiž ułaśnikami restarana «Pajedziem pajadzim» u Kurapatach i pradstaŭnikami hramadzianskaj supolnaści — maŭlaŭ, kab biznesmien Leanid Zajdes adkryŭ muziej pamiaci achviaraŭ stalinizmu. Dalej za razmovy sprava nie zvaruchnułasia. A praź niekalki hadoŭ aktyvisty zaŭvažyli Ziankoviča na ŭvachodzie ŭ skandalny restaran, kudy jon nakiroŭvaŭsia na viačeru.

Nie tak daŭno Ziankovič nabyŭ nieruchomaść u Miadzielskim rajonie. Leta 2020-ha jon razam z žonkaj Alenaj Dzienisaviec baviŭ u Biełarusi.

U prezidenckaj kampanii 2020 hoda jon nie ŭdzielničaŭ, sa štabam Cichanoŭskaj nijak nie byŭ źviazany. U čas burlivych padziej leta i vosieni 2020-ha Ziankoviča ŚMI zhadvali usiaho adzin raz. 31 žniŭnia jaho zatrymali i asudzili na 10 sutak u Miadzieli — jak paviedamiła žonka, za ŭdzieł u akcyi pratestu ŭ dzień vybaraŭ.

Zatoje Ziankovič pačaŭ aktyŭničać u pačatku 2021 hoda — źmiašaŭ z brudam Cichanoŭskuju, nazyvajučy jaje «Śvietkaj-katletnicaj» i davodziačy, što ŭłada nie patrebnaja ni joj, ni jaje štabu. Zasnavalnik PandaDoc Mikita Mikada, inicyjatar kampanij salidarnaści, atrymaŭ ad Ziankoviča charaktarystyku «nievierahodny debił».

U sakaviku 2021-ha Ziankovič abviaściŭ, što pačynaje farmavańnie «Družyn Narodnaj Samaabarony» — inicyjatyvy, jakaja musiła supraćstajać AMAPu na masavych akcyjach pratestu. Paralelna jon arhanizoŭvaŭ strymy, na jakich abmiarkoŭvałasia pytańnie źmieny ŭłady ŭ Biełarusi. A ŭ krasaviku taho ž hoda Ziankoviča i Fiadutu aryštavali ŭ Maskvie, heta była śpiecapieracyja biełaruskaha KDB.

• 2
• 0
• 2
• 5
• 8
• 10
• 23
• 0