Ukraincy ŭvajšli ŭ Baravuju

Infarmacyja pra ŭkrainskich vajskoŭcaŭ u nasielenych punktach Baravaja i Šyjkoŭka na levym bierazie Askoła źjaviłasia ŭ miascovych čatach i rasijskich frantavych błohieraŭ 3 kastryčnika. Aficyjna ŭkrainskaje kamandavańnie paćviardžaje vyzvaleńnie tych ci inšych nasielenych punktaŭ paśla praciahłaha kantrolu nad imi.

Akramia taho, rasijskija frantavyja błohiery pišuć pra źjaŭleńnie ŭkrainskich raźviedhrup u Piasčanym i Čyrvonapapoŭcy — nasielenych punktach na darozie Svatava — Kramiannaja.

Krytyčnym niekatoryja rasijskija błohiery nazyvajuć stanovišča ŭ rajonie Kramiannoj na Danbasie.

Pakul išła začystka vyzvalenaha Limana, pieradavyja ŭkrainskija vojski zamacavalisia ŭ Torskim, Ciornach i zaniali vakolicy Kramiannoj — horada, raźmieščanaha za 35 kiłamietraŭ na ŭschod ad Limana. Rasijskija vojski sprabujuć vystraić liniju abarony pa linii Kramiannaja — Svatava, ale, miarkujučy pa tonie rasijskich błohieraŭ, jany nie nadta raźličvajuć na pośpiech.

«Zaraz praciŭnik, chutčej za ŭsio, zasiarodzić svaje namahańni na pierarazańni kamunikacyj pa trasie z Kramiannoj u Svatava z dalejšym prasoŭvańniem na poŭnač. DRH praciŭnika ŭžo vychodziać na hetuju darohu», — piša rasijski prapahandyst WarGonzo.

«Paŭstaje pytańnie ab utrymańni Kramiannoj — adnaho z klučavych punktaŭ, jakija zabiaśpiečvajuć paŭnočny fłanh abarony Lisičanska. Kramiannuju zdavać nielha ni ŭ jakim razie», — zaklikaje pałkoŭnik Hirkin.

Kramiannaja — horad, u jakim da vajny žyło 18 tysiač čałaviek. Ën staić na levym bierazie Sievierskaha Danca adrazu nad dalinaj raki. Ad jaho 30 km da Lisičanska. Kramiannuju rasijanie zaniali 18 krasavika.

Nahadajem, što 1 kastryčnika rasijskaje Minabarony pryznała stratu Limana. «U suviazi sa stvareńniem pahrozy akružeńnia sajuznyja vojski byli adviedzienyja z nasielenaha punkta Čyrvony Liman na bolš vyhadnyja rubiažy», — havorycca ŭ zajavie Maskvy.

Paŭnočniej ukraincy stvaryli šmatlikija płacdarmy na levym bierazie raki Askoł i nastupajuć ad Łazavoj, Kupianska dy Dvurečnaj.

Svatava — rajcentr na poŭnačy Łuhanskaj vobłaści, da vajny ŭ im žyło 16 tysiač čałaviek. Rasijskija vojski akupavali horad 6 sakavika, na 11-y dzień vajny.

Vyzvaleńnie Svatava mieła b jak stratehičnyja, tak i maralnyja nastupstvy. Heta byŭ by pieršy vyzvaleny rajcentr Łuhanskaj vobłaści, jakaja na siońnia amal całkam kantralujecca rasijskimi vojskami.

Čytajcie taksama: Niejmavierny praryŭ ukrainskaj armii ŭzdoŭž Dniapra. Rasijskaja abarona pad Chiersonam moža abrynucca

• 67
• 0
• 0
• 0
• 0
• 2