Stali viadomyja pryčyny niedavieru da dvuch bajcoŭ «Pahoni». Adzin ź ich sapraŭdy byŭ zavierbavany KDB
U sietkach abmiarkoŭvajuć zajavu eks-bajca pałka Kalinoŭskaha, a ciapier i eks-bajca «Pahoni» Cichana Klukača. Heta jon i jašče adzin biełarus, viadomy pad pazyŭnym «Karyč», nie prajšli pravierki ŭkrainskaj kontrraźviedki.
«Dva maładyja bajcy pałka «Pahonia» samavolna pakinuli padraździaleńnie. Adnaho ź ich SBU padazraje ŭ supracy z KDB», — niadaŭna zajaviła «Pahonia».
Paśla hetaj ścisłaj zajavy źjaviłasia videa kałarytnaha baradača, jaki nazvaŭ siabie kamandziram roty «Pahoni», i ekspresiŭnaja reakcyja Cichana «Franca» Klukača, jaki ŭžo druhi raz apynajecca ŭ epicentry skandału.
«Naša Niva» z vartych davieru krynic daviedałasia, što adbyłosia. Jak ni dziŭna, niama nijakich padstavaŭ dla asablivaha dramatyzmu.
Čytajcie taksama: Dva maładyja bajcy pałka «Pahonia» samavolna pakinuli padraździaleńnie. Adnaho ź ich SBU padazraje ŭ supracy z KDB
Paśla zajavy «Pahoni» ŭ fejsbuku źjaviłasia videa čałavieka, jaki nazyvaŭ siabie «kamandziram roty «Pahoni». Jak stała viadoma «Našaj Nivie», u realnaści Mikałaj «Sikorski» Kościkaŭ nijakim kamandziram nie źjaŭlajecca i farmalnaha dačynieńnia da atrada ciapier nie maje, tolki što ŭ minułym dapamahaŭ jamu.
A paśla Cichan Klukač na svajoj staroncy ŭ fejsbuku abvinavaciŭ va ŭsim Śviatłanu Cichanoŭskuju.
Ale što adbyłosia nasamreč?
Jak patłumačyli «Našaj Nivie» abaznanyja krynicy, i Klukač, i druhi čałaviek niekalki miesiacaŭ prachodzili padrychtoŭku ŭ składzie atrada aeraraźviedki, składzienaha ź biełarusaŭ. Padrychtoŭka biełaruskich dobraachvotnikaŭ adbyvałasia ŭ adnoj z krain «antypucinskaj kaalicyi».
Mierkavałasia, što aeraraźviedka budzie dziejničać u składzie «Pahoni».
Adnak paśla viartańnia atrada va Ukrainu z pryčyny jurydyčnych składanaściej u arhanizacyi słužby zamiežnikaŭ hetamu atradu nie ŭdałosia ŭlicca ŭ «Internacyjanalny lehijon» USU, u składzie jakoha vajujuć bajcy «Pahoni».
Faktyčna, paŭtara miesiaca hetaja hrupa nie mieła farmalnaha statusu, vajskovaha bileta, nie atrymlivała zarobku.
U takoj situacyi cikavaść da biełarusaŭ prajaviŭ Połk imia Kastusia Kalinoŭskaha, u jakoha, u adroźnieńnie ad «Pahoni», inšaje padparadkavańnie i była mahčymaść chutka pryniać biełarusaŭ u svaje šerahi.
Ale pierš čym ulicca ŭ jaho skład, bajcy pavinny byli prajści palihraf i pravierku ŭkrainskaj kontrraźviedki. Dvoje z hrupy toj pravierki nie prajšli.
My nie možam viedać, što pakazaŭ palihraf, ale jość padstavy mierkavać, što pytańni da Klukača i bajca mahli być i nie vynikam palihrafa, a być čysta bijahrafičnaha charaktaru — i heta pakazvaje, nakolki vysokija standarty biaśpieki maje ciapier ukrainskaja armija.
Bajec «Karyč» u svoj čas vučyŭsia pa prahramie Kalinoŭskaha ŭ Polščy i doŭha nie jeździŭ na Radzimu, ale vyrašyŭ pabyvać tam u lutym 2022-ha. U vyniku ŭ Biełarusi jon trapiŭ u rajonny adździeł KDB i pad pahrozaj źniavoleńnia pahadziŭsia supracoŭničać z łukašysckimi śpiecsłužbami. Pa viartańni ŭ Polšču jon, pa našaj infarmacyi, adrazu pryznaŭsia ŭ hetym polskim śpiecsłužbam i rekrucioram dobraachvotnikaŭ va Ukrainu.
Polskija śpiecsłužby nie pabačyli składu złačynstva, bo nijakaj infarmacyi jon nie źbiraŭ i łukašysckim śpiecsłužbam nie pieradavaŭ.
Prajšoŭ jon i filtr rekrutynhu, i infarmacyi pra svoj epizod ź viarboŭkaj nie chavaŭ. Ciažka skazać, što pakazaŭ palihraf — moža być, i sam fakt u bijahrafii vyklikaŭ «vieta» ŭkraincaŭ. Prynamsi, krynicy «Našaj Nivy» nie bačać padstaŭ dumać, što «Karyč» dziejničaŭ niesumlenna abo pracavaŭ na łukašystaŭ.
Što datyčyć 20-hadovaha Cichana Klukača, byłoha palitźniavolenaha, to pretenzii ŭkrainskaha boku taksama mahli hruntavacca abo na farmalnych sumnievach, abo na niehatyŭnaj rekamiendacyi kamandavańnia Pałka Kalinoŭskaha. Reč u tym, što jon syšoŭ z hetaha samaha pałka paśla pakarańnia za złosnaje parušeńnie dyscypliny, na jakoje adreahavaŭ skandałam.
Na karyść toj viersii, što ni adnaho, ni druhoha bajca nie padazravali ŭ pracy na łukašenkaŭskija ci rasijskija śpiecsłužby, a jany prosta nie adpaviadali płancy patrabavańniaŭ, havoryć sam fakt taho, što ich nie aryštavali, a prosta pradpisali im pakinuć Ukrainu.
Jany adpravilisia ŭ Małdovu, kab tam dalej atrymać polskuju vizu.
«U Małdovu ž ich nie puścili, bo hetaja kraina ź mierkavańniaŭ biaśpieki masava admaŭlaje va ŭjeździe lubym hramadzianam Rasii i Biełarusi, jakija vyklikajuć padazreńni — Kišynioŭ baicca sprobaŭ Maskvy destabilizavać situacyju. U dadzienym vypadku małdaŭskich pamiežnikaŭ mahło naściarožyć pradpisańnie Ukrainy hetym dvaim pakinuć krainu. Bačačy takuju pastanovu na rukach, pahraničniki Małdovy vyrašyli nie ŭpuskać ich na svaju terytoryju», — miarkuje abaznanaja krynica.
Niehatyŭny vierdykt ukrainskich śpiecsłužbaŭ adnosna «Karyča» i «Franca» moh zastacca viadomym tolki vuzkamu kołu ŭtajamničanych ludziej, kab nie emacyjnaść Klukača, u interpretacyi jakoha ŭsio nabyło elemienty dramy i zmovy.
Klukač pabačyŭ za ŭsim padkopy Ofisa Śviatłany Cichanoŭskaj. Heta, adnak, vyhladaje fantazijaj: Cichanoŭskaja nie maje ŭpłyvu ni na rašeńni ŭkrainskich siłavych struktur, ni na małdaŭskuju pahraničnuju słužbu, ni navat na kamandziraŭ Pałka Kalinoŭskaha, jakija sami znachodziacca ŭ składanych adnosinach ź jaje Ofisam i joj samoj, bo ličać ich nierašučymi i praciŭnikami siłavych krokaŭ.
Da «Sikorskaha» Kościkava, imavierna, źviarnuŭsia pa dapamohu abo Klukač, abo «Karyč», toj adreahavaŭ videazvarotam, jaki ŚMI raspaŭsiudzili, nie pravieryŭšy asoby aŭtara. Čamu Kościkaŭ vydaje siabie za kamandzira roty, ciažka skazać.
«Naša Niva» nie viedaje, ci manipulavaŭ niechta junym Cichanam Klukačam, padkidvajučy tamu absurdnyja dumki pra vinu Cichanoŭskaj u tym, što jon nie prajšoŭ pravierki ŭkrainskimi śpiecsłužbami. Mahčyma, hetym niekim byŭ «Sikorski»: jaho fejsbuk poŭnicca pierapostami niehatyvu pra Cichanoŭskuju, u tym liku zapuščanaha łukašenkaŭskimi śpiecsłužbami. Klukač adrazu paśla vyzvaleńnia kazaŭ, što rasčaravany ŭ taktycy Cichanoŭskaj.
«U dadzieny momant biełarusam robiacca polskija vizy, hramadoj im sabranyja hrošy na časovaje pražyvańnie i vyjezd», — patłumačyŭ nam čałaviek z koła bajcoŭ.
Stała viadoma aficyjnaja pryčyna śmierci Makieja, Ašurka i Tarajkoŭskaha9
Kamientary