«Schiema była vyhadnaj, kali lhotniki brali pa 300-500 dalaraŭ, a ciapier…» Jak aŭtapierahonny biznes pieražyvaje składanyja časy
Praz sankcyi i amal poŭnaje spynieńnie vytvorčaści i pastavak novych aŭto ŭ Rasiju, biełaruskija aŭtapierahonščyki akazalisia ŭ cikavym stanoviščy. Trafik aŭto ź Jeŭropy i ZŠA, jaki išoŭ praz našu krainu, značna pavialičyŭsia, a razam z tym pačali ŭźnikać novyja składanaści i ryzyki natyknucca na machlaroŭ.
Raniej ilhotniki sami šukali, kamu prapanavać svaje pasłuhi
Rasijanie pačali cikavicca kuplaj u Biełarusi śviežapryhnanych aŭto ź Jeŭropy i ZŠA jašče ŭ 2019 hodzie. Raźvićciu hetaha kirunku paspryjaŭ pryniaty viasnoju taho hoda 140-y ŭkaz, jaki dazvoliŭ peŭnaj katehoryi hramadzian uvozić aŭtamabili z trecich krain z apłataj 50% mytu.
Źjaŭleńnie lhotnaj razmytnioŭki ažyviła aŭtabiznes. Patok mašyn ź ES i ZŠA pačaŭ raści. Lhotnikaŭ (invalidaŭ 1 i 2 hrupy, a taksama šmatdzietnych baćkoŭ) chapała ŭsim žadajučym. Pradstaŭniki aŭtamabilnaha biznesu zhadvajuć, što jašče da kanca viasny hetaha hoda žadajučych pradać svajo prava na lhotu było nastolki šmat, što šmatdzietnyja i ludzi ź invalidnaściu niaredka sami šukali, kamu prapanavać svaje pasłuhi.
«U zaležnaści ad koštu aŭtamabila i abjomu ruchavika tady prasili 300-500 dalaraŭ, a na pieryfieryi možna było znajści žadajučych aformić na siabie aŭtamabil za 200-250 dalaraŭ», — kaža surazmoŭca.
Pry hetym pierahonščyk adznačaje, što da niadaŭniaha času ź nieznajomymi ludźmi asabliva nichto nie vieŭ spravy, pakolki heta nadta ryzykoŭna aformić aŭtamabil nieviadoma na kaho.
«Usie niejak namahalisia pracavać tolki sa znajomymi, znajomymi znajomych i h.d. Ciapier ža z hetym stała składana. Z-za adsutnaści pastavak novych aŭto ŭ Biełaruś i RF patok aŭto ź Jeŭropy i ZŠA pavialičyŭsia ŭ niekalki razoŭ, pačaŭ źjaŭlacca deficyt ilhotnikaŭ».
Z rostam popytu vyraśli i ceny na pasłuhi takich pamahatych. Surazmoŭca zaŭvažaje, što ciapier znajści lhotnika za 300-500$ amal niemahčyma.
«Prajs pačynajecca ad 500-700 dalaraŭ. Za darahija aŭto ź vialikim abjomam ruchavika (2.5 — 3.0 litry i vyšej) užo prosiać pa 1000-1500 dalaraŭ», — pryvodzić ličby pierahonščyk.
Kali razmova idzie pra razmytnioŭku novych aŭto, to ŭznaharoda moža dasiahać i niekalkich tysiač dalaraŭ, pakolki mytnyja staŭki dla novych aŭto składajuć 48% ad koštu.
Supołki pa vykryćci machlaroŭ
Praz značny rost stavak na pasłuhi lhotnikaŭ u internecie pačało źjaŭlacca ŭsio bolš abjaŭ ad pasiarednikaŭ, jakija pierapradajuć lhoty, a taksama ad machlaroŭ, jakija zamiest lhot pradajuć pavietra.
Adnym z załohaŭ pośpiechu ašukancaŭ daśviedčany aŭtapierahonščyk nazyvaje toj fakt, što ciapier u aŭtamabilny biznes pryjšło šmat vypadkovych ludziej.
«Ledź nie kožny druhi aŭtamabil u prodažy vystaŭlaje toj, chto pačaŭ zajmacca hetym tolki tamu, što ŭ krainie nazirajecca dobry popyt na takija mašyny, a ŭ jaho jość volnyja hrošy, kab niešta pryhnać. Praz heta i machlaram pracavać stała praściej», — ličyć jon.
Navat siarod kaleh mužčyny jość tyja, chto sutykaŭsia ź niadobrasumlennymi lhotnikami.
Pra novy vid machlarstva možna pačuć nie tolki ad pierahonščykaŭ, ale i ŭ admysłovych čatach i pablikach, dzie abmiarkoŭvajuć pryhon aŭto z-za miažy. U takich supołkach čas ad času źjaŭlajucca publikacyi, dzie karystalniki publikujuć danyja tych, chto, pa ich nazirańniach, źjaŭlajecca machlarom.
Kab źmienšyć ryzyku trapić na ašukancaŭ, pierahonščyki taksama stvarajuć supołki ŭ Viber, dzie abmieńvajucca infarmacyjaj pra davieranaści.
Machlary razumiejuć, što achviara naŭradci napiša zajavu
U pierahonnym biznesie apasajucca, što papularnaść takoha vidu machlarstva budzie raści, pakolki popyt na takija pasłuhi nikudy nie źnikaje, a ličba samich ilhotnikaŭ, na jakich jašče nie «viešali» aŭto, mienšaje.
«Pa sutnaści «achviara» ŭ niejkim sensie taksama zajmajecca machlarstvam, kali sprabuje z dapamohaj padstaŭnoj asoby razmytnić aŭto z 50%-naj źnižkaj. Działki, jaki «kidajuć» na lhoty, vydatna razumiejuć, što naŭradci niechta pojdzie ŭ milicyju z zajavaj, dzie skaža, što jon u zmovie ź inšym čałaviekam chacieŭ padmanuć dziaržavu, ale jaho abviali vakoł palca, tamu nie atrymałasia. Naturalna, što ašukancy karystajucca hetym napoŭnicu», — adznačaje surazmoŭca ź liku pierahonščykaŭ.
Z ulikam taho, što znajści nadziejnaha lhotnika pa adekvatnym košcie z kožnym dniom usio składaniej, niekatoryja pierahonščyki pačynajuć pracavać biez udziełu «viešałak» i razmytnivajuć aŭto pa poŭnym taryfie, raspavioŭ «Našaj Nivie» dyrektar adnoj ź firm, jakaja zajmajecca pryhonam aŭto na zamovu.
«Da niadaŭniaha času chiba 99% našych klijentaŭ namahalisia razmytnivać aŭto sa źnižkaj. Niejak vykručvalisia, kab sekanomić. Ale niedzie z kanca leta pačali źjaŭlacca pieršyja klijenty, jakija stali razmytnivać aŭto pa poŭnym taryfie. Adnak pakul, praŭda, razmova idzie tolko pra mašyny z ruchavikom da 1.5 litra», — padkreśliŭ biznesmien.
Tłumačycca heta vielmi prosta: mienavita dla aŭto z abjomam da 1500 sm³ praduhledžany samyja nizkija mytnyja staŭki. Naprykład, za ruchavik abjomam 1.4 litra pošlina składaje 2380 jeŭra, a kali razmytnivać pa lhocie, to atrymajecca 1190. Na pieršy pohlad atrymlivajecca dobraja ekanomija. Ale kali za mahčymaść razmytnić aŭtamabil sa źnižkaj daviadziecca zapłaci 700-1000 dalaraŭ, to ekanomija amal źnikaje, a dadatkovyja ryzyki i ciełaruchi — nie. Tym bolš, što da ŭznaharody lhotniku treba dadać vydatki na afarmleńnie davieranaści i lišniuju pastanoŭku aŭtamabila na ulik u DAI.
Rasijanie hublajuć cikavaść da razmytnioŭki praź Biełaruś
Klijenty z RF pačali ŭsio čaściej afarmlać aŭtamabili ŭ Rasii, minajučy biełaruskich ilhotnikaŭ.
«Heta ŭžo nie redkaść, kali rasijskija pakupniki bolš nie cikaviacca razmytnioŭka praź Biełaruś, a tolki prosiać padabrać, kupić i dastavić aŭtamabil ź Jeŭropy da Minska. Heta tyčycca navat aŭto z abjomam 2000 litraŭ, a časam navat i bolej.
Schiema była vyhadnaj, kali lhotniki brali pa 300-500 dalaraŭ, ciapier, kali za bolš-mienš darahija aŭto jany patrabujuć 1000 dalaraŭ i bolej, sens u ich pasłuhach čaściakom źnikaje. Prynamsi, kali razmova nie idzie pra mašyny ź vialikim abjomam».
Na dumku surazmoŭcy, bolšaść ź ludziej, jakija kuplajuć aŭto za 30-50 tysiač dalaraŭ, nie buduć zamoročvacca razmytnioŭkaj praź Biełaruś, kab u vyniku atrymać ekanomiju ŭ 500-1000 dalaraŭ, afarmlajučy pry hetym aŭtamabil u inšaj krainie nieviadoma na kaho.
Čytajcie taksama: «Kažuć pra 10-15 tysiač dalaraŭ, a padstaŭlajuć na 50-100». Šeryja imparciory aŭto, ilhotniki i amal nijakaj harantyi
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ2
Kamientary