Aryštavali majomaść ułaśnika kampanii pa vyrabu nadmahillaŭ. Jon padmanuŭ sotni biełarusaŭ na miljony rubloŭ
Zavieršana rasśledavańnie kryminalnaj spravy ŭ dačynieńni da Siarhieja Rudenki, kiraŭnika kampanii «Studyja hranitu RG» (były «Rytuał Hranit»). Śledstva ŭstanaviła, što jon padmanuŭ bolš za 700 čałaviek na 4,5 miljona rubloŭ.
Z 2017 hoda kampanija Siarhieja Rudenki zajmałasia vyrabam pomnikaŭ i dobraŭparadkavańniem miescaŭ pachavańnia.
Pavodle SK, «u pačatku 2022 hoda mužčyna vyrašyŭ ažyćciavić złačynnuju schiemu i zarabić na hora ludziej» i staŭ pracavać pa pryncypie finansavaj piramidy. Śledčyja taksama vyśvietlili, što Rudenka pieravodziŭ hrošy ź biełaruskaj firmy na padkantrolnyja rachunki zamiežnaj arhanizacyi.
U jakaści abaviazkovaj umovy — pieradapłata na raźlikovy rachunak da 70%. Pry hetym vytvorčaja dziejnaść pradpryjemstva ŭ Biełarusi była spyniena: rabotniki, jakija ažyćciaŭlajuć vyrab pomnikaŭ, zvolnieny, zakup materyjałaŭ zusim nie ažyćciaŭlaŭsia.
Padčas rasśledavańnia ŭstanoŭlena, što Rudenka padmanuŭ 706 biełarusaŭ, a suma škody pieravysiła 4,5 miljona rubloŭ.
Śledčyja va ŭzajemadziejańni z Departamientam finansavych rasśledavańniaŭ KDK Respubliki Biełaruś nakłali aryšt na majomaść biźniesmiena. Siarod aryštavanaha: 5 aŭtamabilaŭ, 3 kvatery, zaharadny dom, vytvorčyja budynki i zbudavańni, a taksama darahoje abstalavańnie na ahulnuju sumu bolš za 6 miljonaŭ rubloŭ. Heta daść mahčymaść zabiaśpiečyć kampiensacyju pryčynienaj škody.
Rudenku zavočna pradjaŭlena abvinavačańnie pa č. 4 st. 209 KK (machlarstva, učynienaje ŭ asabliva bujnym pamiery).
Pavodle SK, śledčyja nieadnarazova nakiroŭvali prośby ab akazańni pravavoj dapamohi ŭ krainy, dzie chavajecca Rudenka. «Niahledziačy na sotni ašukanych ludziej, kampietentnyja orhany zachodnich krain dasyłali tolki adpiski, spasyłajučysia na toje, što kryminalny pieraśled Rudenki palityzavany», — śćviardžaje SK.
Brat udavy Zielcara: Kadebisty išli ŭ kvateru pa mianie1
Kamientary