Sistemy NASAMS zaśviedčyli stopracentnuju efiektyŭnaść u pierachopie rasijskich rakiet
Pieradadzienyja Złučanymi Štatami sistemy supraćpavietranaj abarony NASAMS prademanstravali stopracentnuju efiektyŭnaść u pierachopie rasijskich rakiet padčas učorašnich rakietnych udaraŭ Rasii pa Ukrainie. Pra heta zajaviŭ kiraŭnik Pientahona Łojd Ościn u pačatku siomaj sustrečy kantaktnaj hrupy pa Ukrainie.
Jak adznačyŭ Łojd Ościn, Kreml raźličvaje, što bambavańni pachisnuć supraciŭ ukrainskaha naroda, ale ŭkrainskija hramadzianie adkazvajuć niabačanym dahetul supracivam.
«U ramkach hetaj kantaktnaj hrupy my budziem praciahvać demanstravać našu adzinuju padtrymku samaabaronie Ukrainy», — adznačyŭ ministr abarony ZŠA. Pavodle jaho słoŭ, namahańni kantaktnaj hrupy nakiravanyja na toje, kab Ukraina ŭtrymlivała inicyjatyvu na poli boju.
«U jakaści prykładu taho, jakimi važnymi źjaŭlajucca našy achviaravańni, možna nazvać sistemy SPA NASAMS, jakija ŭžo dziejničajuć va Ukrainie. Jany ŭčora prademanstravali pośpiech na 100 % u pierachopie rasijskich rakiet padčas žorstkaha bambavańnia Kramlom», — zajaviŭ Ościn.
«U toj čas jak Rasija praciahvaje svaje biaźlitasnyja bambardziroŭki, dziaržavy dobraj voli praciahvajuć padtrymku Ukrainy. Žorstkaść Rasii tolki umacoŭvaje naš supraciŭ», — padkreśliŭ kiraŭnik Pientahona.
Na minułym tydni pradstaŭnik Ministerstva abarony ZŠA, bryhadny hienierał Patryk Rajder paćvierdziŭ, što Ukraina atrymała dźvie sistemy supraćpavietranaj abarony NASAMS.
Kamientary