Siońnia ŭ Varšavie prezydent Polščy Lech Kačynśki padpisaŭ Lisabonskaje pahadnieńnie, tak zvanuju Eŭrapiejskuju kanstytucyju, jakaja siarod inšaha ŭ značnaj stupieni refarmuje kiroŭčyja orhany Eŭrapiejskaha Źviazu.
U cyrymonii, što adbyłasia ŭ prezydenckim pałacy, uziali ŭdzieł premjer-ministar, śpikiery sejmu dy senatu Polščy, kiraŭniki Eŭrakamisii i Eŭraparlamentu Žaze Barozu i Ježy Buzak, a taksama Fredryk Rejnfelt – premjer-ministar Švecyi, jakaja staršyniuje ciapier u Eŭraźviazie.
«Eŭrapiejski Źviaz jak nadzvyčaj paśpiachovy eksperyment, jaki praktyčna nia maje analahaŭ u historyi, pavinien być adkryty taksama dla inšych krainaŭ, što chočuć da jaho dałučycca, asabliva dla tych, što znachodziacca ŭ našaj cyvilizacyjnaj prastory. Havorka nia tolki pra bałkanskija dziaržavy, ale j pra Ŭkrainu, Hruziju, a z časam mahčyma j inšyja krainy», – zajaviŭ pierad padpisańniem dakumentu prezydent Polščy Lech Kačyński.
Pahadnieńnie praduhledžvaje istotnyja źmieny ŭ systemie kiravańnia Eŭraźviazam. Siarod inšaha budzie ŭviedzienaja pasada prezydenta abjadnanaj Eŭropy, abmiežavana kolkaść eŭrakamisaraŭ i ŭzmocniena rola Eŭrapiejskaha parlamentu.
«Heta aznačaje bolš značny ŭpłyŭ zvyčajnych hramadzianaŭ na prymańnie rašeńniaŭ u Eŭraźviazie, a mienšy – bruselskaj biurakratyi», – zajaviŭ premjer-ministar Polščy Donald Tusk.
Ciapier adzinaju z 27 krainaŭ Eŭraźviazu, jakaja jašče nie ratyfikavała Lisabonskaha pahadnieńnia, zastajecca Čechija.
Raźviedka ZŠA: Biełaruś stała pieradavym vajskovym płacdarmam Rasii24
Kamientary