Za namier zrabić dyviersiju suprać rasijskich vojskaŭ dvuch žycharoŭ Mazyra asudzili na 14 i 16 hadoŭ kałonii

34-hadovaha Siarhieja Pleškuna i 45-hadovaha Juryja Sielviča zatrymali ŭ sakaviku 2022 hodu. Biełaruskaja televizija vypuściła tady siužet, ź jakoha vynikaje, što za žycharami Mazyra sačyli supracoŭniki KDB. U haražy adnaho z zatrymanych Siarhiej i Jury abmiarkoŭvali mahčymaści pieraškodzić ruchu rasiejskaj vajskovaj techniki pa čyhuncy. Kančatkovaje abvinavačańnie im vystavili pavodle siami artykułaŭ:

• č. 2 art. 295-3 («Niezakonnyja dziejańni ŭ dačynieńni da pradmietaŭ, dziejańnie jakich zasnavanaje na vykarystańni haručych rečyvaŭ»);
• č. 2 art. 289 («Akt teraryzmu»);
• č. 1 art. 342 («Arhanizacyja i padrychtoŭka dziejańniaŭ, jakija hruba parušajuć hramadzki paradak, albo aktyŭny ŭdzieł u ich»);
• č. 4 art. 309 («Naŭmysnaje pryviadzieńnie ŭ nieprydatnaść transpartnaha srodku abo šlachoŭ znosin»);
• art. 341 («Apahańvańnie zbudavańniaŭ i psavańnie majomaści»);
• č. 1 art. 130 («Raspalvańnie inšaj sacyjalnaj varožaści»);
• č. 1 art. 361 («Sadziejničańnie ekstremisckaj dziejnaści»).

Zhodna z materyjałami spravy, u peryjad sa žniŭnia 2020-ha pa luty 2022 hodu Plaškun i Sielvič nibyta nabyli kampanenty dla vyrabu «kaktejlaŭ Mołatava» i piratechničny vyrab, jakija zachoŭvali i pieravozili ŭ roznych transpartnych srodkach i miescach z metaj ich vykarystańnia.

Taksama ich abvinavacili ŭ tym, što la adnaho z pradpryjemstvaŭ Mazyrskaha rajonu Plaškun i Sielvič nanieśli farbaj na płot i znak malunki i nadpisy.

Chto takija Siarhiej Plaškun i Jury Sielvič

U siužecie dziaržaŭnaj televizii ŭ sakaviku pakazali kadry ź niejkaha pamiaškańnia, padobnaha da haraža. Na videa dvoje mužčyn abmiarkoŭvajuć sposaby taho, jak pieraškodzić pierasoŭvańniu rasiejskaj techniki pa čyhuncy. Mahčyma, uvahu specsłužbaŭ adzin z zatrymanych, Siarhiej Plaškun, pryciahnuŭ tym, što skinuŭ videa z kalonaj rasiejskaj techniki ŭ adzin z «destruktyŭnych» kanałaŭ. Pry pieratrusie ŭ zatrymanych zabrali pustyja butelki, saletru, bitu, pneŭmatyčny pistalet. Śćviardžajecca, što abvinavačanyja mahli zrabić «kaktejli Mołatava».

Adzin z zatrymanych, 44-hadovy Jury Sielvič, žanaty, maje traich dziaciej. Dvoje darosłych synoŭ na momant zatrymańnia Sielviča byli ŭ vojsku, adzin słužyŭ u Marjinaj Horcy paśla zakančeńnia ŭniversytetu. Jašče ŭ siamji vychoŭvajecca pryjomnaja dačka, joj 10 hadoŭ. Pa słovach znajomych, Jury pracavaŭ «na siabie», zajmaŭsia ramontami.

«Jon aktyŭna ŭdzielničaŭ u pratestach, jakija byli ŭ Mazyry paśla vybaraŭ. Sielviča dvojčy zatrymlivali pavodle 23.34, adzin raz byli «sutki», druhi raz štraf. Jury dapamahaŭ finansava svajakam palitviaźniaŭ. Nu havaryli jany niešta, ale ž dziejańniaŭ nijakich nie było», — patłumačyŭ siabar abvinavačanaha.

Siarhiej Plaškun maje žonku i dvaich dziaciej. Adzin syn chodzić u pieršuju klasu, druhomu jašče niama hodu. Žonka Pleškuna ŭ dekretnym vodpusku.

«Siarhiej pracavaŭ handlovym ahientam. Jon dobry muž, baćka i siabar. Sapraŭdny, takich vielmi mała. Jon i Jury achviaravali saboj dziela svabodnaj Biełarusi», — zaznačyła znajomaja zatrymanaha, taksama žycharka Mazyra.

• 1
• 0
• 4
• 0
• 0
• 0
• 26
• 0