Hienštab Uzbrojenych sił Ukrainy paviedamiŭ pra źniščeńnie rasijskaha ŭdarnaha viertalota «Ka-52 «Alihatar» u Danieckaj vobłaści. Kamandujučy Sił bieśpiłotnych sistem Robiert Broŭdzi («Madziar») udakładniŭ, što źniščyć viertalot udałosia z dapamohaj optavałakonnaha drona. Heta pieršy taki vypadak za čas rasijska-ŭkrainskaj vajny, piša Ukrainskaja słužba Bi-bi-si.
Kamandavańnie SBS taksama apublikavała videa źbivańnia. Na kadrach vidać, jak mima ŭkrainskaha FPV-drona nizka nad ziamloj pralatajuć dva rasijskija viertaloty. Apierataru ŭdajecca atakavać sustrečnym kursam adzin ź ich. Traplańnie pryjšłosia ŭ bojekamplekt rakiet pad levym kryłom, jaki imhnienna ŭspychnuŭ. Straciŭšy kiravalnaść, Ka-52 upaŭ na ziamlu.
«U vyniku avaryjnaj pasadki ekipaž viertalota sprabavaŭ vyratavacca, adnak byŭ svoječasova vyjaŭleny i likvidavany piłotami sa składu 414‑j bryhady «Ptuški Madziara», — havorycca ŭ paviedamleńni Hienštaba.
Kiravali FPV-dronam apieratary bataljona «Drapiežniki vyšyń» 59‑j asobnaj šturmavoj bryhady bieśpiłotnych sistem. Dla hetaha padraździaleńnia heta ŭžo druhoje źniščeńnie rasijskaha viertalota. U vieraśni 2025 hoda im udałosia zvyčajnym FPV-dronam «upalavać» transpartna-bajavy viertalot Mi-8 na Pakroŭskim kirunku.
Uviečary 20 sakavika prezident Uładzimir Zialenski vydaŭ ukaz ab uznaharodžańni čatyroch bajcoŭ ekipaža dronaŭ, jakija źbili Ka-52. Jany ŭznaharodžanyja ordenami «Za mužnaść» II stupieni.
Što heta za viertalot
Ka-52 (Hokum B pa kłasifikacyi NATA, taksama viadomy jak «Alihatar») — rasijski raźviedvalna-bajavy viertalot koštam kala 16 miljonaŭ dalaraŭ. Armija RF aktyŭna jaho vykarystoŭvaje z pačatku vajny dla abstrełaŭ ukrainskich pazicyj i techniki.
Z uzbrajeńnia jon maje chutkastrelnuju harmatnuju ŭstanoŭku i supraćtankavy rakietny kompleks (STRK) «Vichŕ» z łaziernaj sistemaj naviadzieńnia. Ka-52 moža dadatkova brać na bort kiravanyja rakiety kłasa «pavietra — pavietra» blizkaha boju R-73 i «Ihła-V», a taksama niekiravanyja rakiety «pavietra — ziamla». Viertalot abstalavany ŭłasnaj radarnaj sistemaj i maje braniavanuju kapsułu dla ekipaža, jakaja katapultujecca. Hety viertalot vyrablajecca ŭ Rasii z 2008 hoda.
Čym jon byŭ źniščany
Źbity ŭdzień 20 sakavika viertalot staŭ 350-m, jaki Rasija straciła va Ukrainie z pačatku vajny, zhodna sa statystykaj Hienštaba USU. Adnak bolšaść ź ich byli źbityja rakietnym uzbrajeńniem, a taksama PZRK (pieranosnymi zienitna-rakietnymi kompleksami).
Upieršyniu z dapamohaj zvyčajnaha radyjokiravanaha FPV-drona ŭdałosia źbić rasijski viertalot u žniŭni 2024 hoda. Heta byŭ Mi-8 pablizu Daniecka. U vieraśni 2025 hoda viertalot Mi-8 byŭ źbity pablizu vioski Katlaroŭka (Danieckaja vobłaść) z dapamohaj FPV-kvadrakoptara. U listapadzie 2025 hoda ŭkraincam udałosia parazić jašče adzin Mi-8 u niebie nad Rastoŭskaj vobłaściu z dapamohaj deep-strike drona.
U pačatku sakavika Vajskova-marskija siły Ukrainy praviali apieracyju pa źniščeńni rasijskaha supraćłodkavaha viertalota Ka-27, jaki sadziŭsia na buravuju płatformu «Sivaš» u Čornym mory. Ukrainski biezekipažny katar (BEK), imavierna, dastaviŭ u mora na adlehłaść amal 100 km ad bieraha ŭdarny FPV-dron, jaki atakavaŭ viertalot u palocie.
Optavałakonnyja FPV-drony źjavilisia na froncie ŭ druhoj pałovie 2024 hoda. Ich pačali masava vykarystoŭvać rasijanie dla atak na ŭkrainskija mašyny, braniatechniku i žyvuju siłu. Praz toje, što optavałakonnyja drony niaŭraźlivyja da sistem REB, im ciažka supraćdziejničać.
Adnak jany majuć i niedachopy. Optavałakno dalikatnaje i łomkaje, a taksama maje abmiežavany radyus dziejańnia. Kiravańnie takim dronam patrabuje majsterstva apieratara, bo manieŭranaść bieśpiłotnika abmiežavanaja. U 2025 hodzie Ukraina pačała naroščvać vytvorčaść svaich sistem na optavałaknie i da kanca hoda zmahła zapuścić u sieryjnuju vytvorčaść adrazu niekalki vyrabaŭ.
Dron, jaki źniščyŭ rasijski viertalot Ka-52, maje košt kala 1 tysiačy dalaraŭ. Jon lacić z chutkaściu kala 110 km/h na adlehłaść da 20 km na vyšyni da 1 km.
Ukrainskija daradcy byli ŭ šoku, kali ŭ Piersidskim zalivie na adnu cel vypuskali vosiem rakiet Patriot — ahulnym koštam $25 miljonaŭ
Rasijskija vojski pačali vykarystoŭvać novuju zbroju — «śpiačyja drony»
Prychavanaje praniknieńnie: jakija źmieny ŭ taktycy rasijskaj armii pakazaŭ šturm Pakroŭska?
Za rostam vykarystańnia bieśpiłotnikaŭ Rasijaj va Ukrainie stajać kitajskija zavody
Rasija ŭdaskanaliła ataki dronami — zabiaśpiečvać tył ukraincam stanovicca ciažej
Ciapier čytajuć
Jak Ksiuša z SMA apynułasia ŭ Domie dziciaci pry žyvoj mamie? Voś što kaža sama maci6
Kamientary