U ZŠA paprasiŭ prytułku rasijski inžynier, jaki ŭdzielničaŭ u raspracoŭcy Tu-160
U kancy śniežnia rasijski vajenny inžynier padjechaŭ da paŭdniova-zachodniaj miažy ZŠA, paprasiŭ prytułku i prapanavaŭ raskryć niekatoryja z vajennych sakretaŭ Rasii, što pilna achoŭvajucca, paviedamlaje Yahoo News sa spasyłkaj na spravazdaču słužby mytnaha i pahraničnaha kantrolu Złučanych Štataŭ.
Mužčyna i jaho siamja pryjechali na braniravanym usiedarožniku i paprasili dazvołu na ŭjezd u ZŠA, bo bajalisia pieraśledu za ŭdzieł u antypucinskich pratestach u padtrymku Alaksieja Navalnaha. Mužčyna skazaŭ mytnikam, što ŭ jaho jość infarmacyja, patrebnaja ŭradu ZŠA.
Pa słovach źbiehłaha rasijanina, z 2018 pa 2021 hod jon pracavaŭ inžynieram-budaŭnikom na vytvorčaści vajskovaha samalota ŭ kanstruktarskim biuro «Tupaleŭ» u Kazani. Jon apisaŭ typ samalota jak šturmavik i skazaŭ, što abjekt «nazyvaŭsia White Swan — TU160, samy vialiki vajskovy samalot».
«Tu-160 «Bieły lebiedź», taksama viadomy pad kodavaj nazvaj NATA «Błekdžek» — samy daskanały stratehičny bambavik u arsienale Rasii, — havorycca ŭ spravazdačy mytni i pamiežnaj słužby ZŠA. — Jon vykarystoŭvaŭsia padčas taktyčnaha avijaŭdaru ŭ vajnie va Ukrainie».
«Ci moža kiraŭnik abjekta viedać, ci madyfikavali jany novyja bambaviki dla stralby hipierhukavymi rakietami? Jon moža. I heta surjoznaja reč — kali «Bieły lebiedź» madernizavali dla stralby hipierhukavymi rakietami. Jany chutkija i zapuskajucca sa značna bolšaj adlehłaści», — rastłumačyŭ surazmoŭca.
Paśla pryjezdu rasijanina ŭ ZŠA jaho imia i padrabiaznaści jaho historyi źjavilisia ŭ navinach. Yahoo News źviartaje ŭvahu na hetuju dziŭnuju akaličnaść, bo «vielmi niezvyčajna i, mahčyma, biesprecedentna», što źviestki pra čałavieka, jaki paprasiŭ prytułak i vydaje sakrety zamiežnaha sapiernika, stali ahulnadastupnyja. Prytym što hety sapiernik «adsočvaje i atručvaje, vykidvaje z voknaŭ ci inšym čynam zabivaje svaich pierabiežčykaŭ». Vydańnie dadaje: usie, z kim jano razmaŭlała, byli ździŭlenyja, što historyju hetaha čałavieka ŭklučyli ŭ ahulnadastupnuju spravazdaču mytni.
Kala paŭtara tydnia Pamiežnaja słužba i Ministerstva ŭnutranaj biaśpieki ZŠA pracavali, kab vyśvietlić asobu mužčyny i jaho raniejšaje miesca pracy. Bližej da 11 studzienia jaho pryznali hodnym davieru i patencyjna cikavym dla ZŠA, i, pa słovach dvuch uradavych čynoŭnikaŭ, pieradali ŭ FBR dla dalejšych raspytaŭ.
Miarkujecca, što inžynier znachodzicca ŭ ZŠA i jaho dahetul dapytvajuć amierykanskija ŭłady.
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary
Dyj chto b jaho takoha sakriotnaha dyj z žonkaj kudy vypuściŭ z Rasii? Śmiech u zale.