Ukraina ŭklučyła biełarusa, jakoha ličać supracoŭnikam KDB, u śpis dla abmienu pałonnymi
Ukraina ŭklučyła ŭ śpisy dla pieradačy Rasii ŭ miežach abmienu pałonnymi hramadzianina Biełarusi Maksima Ziaziulčyka, jakoha 18 studzienia ŭ Kijevie asudzili na 10 hadoŭ pazbaŭleńnia voli za ŭdzieł u jakaści najmita ŭ bajavych dziejańniach va Ukrainie.
Jak stała viadoma «Radyjo Svaboda», 2 sakavika sud uchvaliŭ rašeńnie ab vyzvaleńni Maksima Ziaziulčyka ad adbyćcia pakarańnia «ŭ suviazi z uchvaleńniem rašeńnia ab pieradačy asoby dla abmienu jak vajskovapałonnaha».
Apošni abmien pałonnymi Rasija i Ukraina praviali 16 lutaha. Tady va Ukrainu viarnulisia 100 vajskoŭcaŭ i adzin cyvilny hramadzianin. Pakul nieviadoma, trapiŭ Maksim Ziaziulčyk u toj abmien, ci ciapier rychtujecca novy.
21 lutaha ŭ Słužbie biaśpieki Ukrainy zajavili, što asudžany na 10 hadoŭ pazbaŭleńnia voli hramadzianin Biełarusi Maksim Ziaziulčyk, jakoha letaś u vieraśni ŭziali ŭ pałon ukrainskija vajskoŭcy pry vyzvaleńni ad rasijskich akupantaŭ Limanskaha rajona Danieckaj vobłaści, byŭ supracoŭnikam Kamiteta dziaržaŭnaj biaśpieki Biełarusi.
Jak paviedamlała SBU, siarod jaho asnoŭnych zadač byŭ zbor raźvieddanych ab uzorach zamiežnaha ŭzbrajeńnia, jakija pastupajuć padraździaleńniam USU ad zachodnich partnioraŭ.
Akramia taho, jon sprabavaŭ vyviedać płany mahčymaha ŭdziełu rasijskich PVK u sprobach adchileńnia ad ułady Łukašenki.
Maksimu Ziaziulčyku 22 hady. Chłopiec paśpieŭ advučycca ŭ ahratechničnym kaledžy ŭ Marjinaj Horcy, a paśla adsłužyć u vojsku. Słužyŭ jon u adnoj z čaściej siłaŭ śpiecyjalnych apieracyj (mahčyma, navat u samoj Marjinaj Horcy).
Chłopiec paśpieŭ pavajavać niašmat — z 21 lipienia, kali jon prybyŭ u Izium Charkaŭskaj vobłaści i atrymaŭ zbroju na pasadzie kulamiotčyka, da 19 vieraśnia, kali jaho ŭziali ŭ pałon niedaloka ad Svatava Łuhanskaj vobłaści.
Jon słužyŭ u padraździaleńni «Vieterany» kulamiotčykam-retranślataram u PVK «Redut».
SBU: Uziaty ŭ pałon biełarus nasamreč pracavaŭ na biełaruski KDB i źbiraŭ infarmacyju jak pra Ukrainu, tak i pra rasijskija PVK
Pobač z Łukašenkam na chakiei źjaviłasia novaja pryhažunia10
Kamientary