Za nadpis na biuleteni dla hałasavańnia žychara Ivanava asudzili za chulihanstva dvojčy
Sud Ivanaŭskaha rajona 10 krasavika vynies prysud 36-hadovamu mantažniku Dźmitryju Žydko, jakoha abvinavacili pavodle č. 1 art. 339 Kryminalnaha kodeksa ŭ chulihanstvie, piša «Viasna».
Spravu razhladaŭ sudździa Mikałaj Stasievič, dziaržabvinavaŭca — pamočnica prakurora Karyna Šymko.
Zhodna z materyjałami spravy, 27 lutaha 2022 hoda abvinavačany Žydko padčas praviadzieńnia respublikanskaha refierendumu znachodziŭsia na vybarčym učastku, raźmieščanym u Ivanaŭskim rajonnym centry kultury i narodnych tradycyj, nibyta ŭ stanie ałkaholnaha apjanieńnia. Atrymaŭšy biuleteń dla hałasavańnia, mužčyna ŭčyniŭ na im nieprystojny nadpis u adras Łukašenki. Zatym, nie apuściŭšy biuleteń u skryniu dla hałasavańnia, abvinavačany pakazaŭ jaho ŭ razhornutym vyhladzie členam kamisii, čym parušyŭ pracu vybarčaha ŭčastka.
Na biuleteni byŭ vyjaŭleny nadpis: «Łukašenka i Pucin, …. žachlivym čynam».
1 sakavika sudździa Ivanaŭskaha rajonnaha suda Hienadź Kudłasievič pa hetym epizodzie ŭžo pakaraŭ mužčynu administracyjnym aryštam terminam na 15 sutak pa artykule 19.1 KaAP (drobnaje chulihanstva).
Zatym była zaviedziena kryminalnaja sprava pa č. 1 art. 368 KK (abraza Łukašenki), adnak paśla ekśpiertyzy była vyniesiena pastanova ab spynieńni spravy praz adsutnaść sastavu złačynstva, ale była zaviedziena sprava pa č. 1 art. 339 (chulihanstva).
Na sudovym pasiadžeńni 7 krasavika vystupili śviedki — try pradstaŭnicy vybarčaj kamisii. Pradstaŭnik abvinavačańnia zaprasiŭ dla Žydko dva hady pazbaŭleńnia voli ŭ kałonii ahulnaha režymu, ale z ulikam amnistyi hety termin skaracić na adzin hod.
Taki prysud i byŭ vyniesieny ŭ paniadziełak, 10 krasavika.
Atrymlivajecca, što Dźmitryja Žydko pakarali dvojčy. Miž tym jurysty «Viasny» kažuć ab pravile non bis in idem.
Zhodna ź im, «nichto nie moža być pakarany dvojčy za adno i toje ž parušeńnie, što źjaŭlajecca ŭniviersalnym pryncypam zakanadaŭčaha rehulavańnia jurydyčnaj adkaznaści i zamacavana ŭ aktach mižnarodnaha prava (p. 7 art. 14 Mižnarodnaha pakta ab hramadzianskich i palityčnych pravach), a taksama ŭ č. 2 artykuła 115 Kanstytucyi, č. 1 artykuła 14 Kodeksa ab sudaŭładkavańni, art. 14. 1 PVKaAP. Takim čynam, parušany pryncyp abaviazkovaści sudovaj pastanovy, tak jak adnamu i tamu ž dziejańniu z roźnicaj hod byli dadzieny pa sutnaści dźvie jurydyčnyja acenki: spačatku ŭ paradku administracyjnaha pracesu, zatym u paradku kryminalnaha sudavodstva».
Kamientary