Administracyja Bajdena imkniecca adnavić lidarstva ZŠA ŭ śfiery telekamunikacyj, apiaredziŭšy Kitaj.
Nie paśpieli varjaty pa ŭsim śviecie adyści ad raspaŭsiudžańnia karanavirusa praz 5G-vyški i ŭžyŭleńnia 5G-čypaŭ pad vyhladam vakcyny — jak u dźviery hrukaje novaja biada: administracyja Bajdena pačynaje płanavać biespravadnyja telekamunikacyi 6G.
The Wall Street Journal paviedamlaje, što Bieły dom sustreŭsia z pradstaŭnikami biznesu, uradavych viedamstvaŭ i navukovaj supolnaści, kab pačać raspracoŭku metaŭ i stratehij dla novaj kamunikacyjnaj technałohii 6G, jakaja, siarod inšych udaskanaleńniaŭ, daść mahčymaść zrabić vobłačnyja vyličeńni i mabilny internet paŭsiudnym u śviecie.
Da razhortvańnia nastupnaha pakaleńnia telekamunikacyj jašče šmat hadoŭ, ale jano moža prakłaści šlach da hłabalnaha dostupu ŭ sietku, jaki ŭsio jašče niemažlivy z sučasnym standartam 5G. Pašyreńnie dostupu da internetu było pryjarytetam dla administracyi Bajdena ŭ ramkach infrastrukturnych inicyjatyŭ.
Inicyjatyva pa płanavańni 6G taksama nakiravana na adnaŭleńnie lidarstva ZŠA i ich sajuźnikaŭ u halinie telekamunikacyj, dzie Kitaj dasiahnuŭ značnych pośpiechaŭ, u tym liku dziakujučy vialikim inviestycyjam u vytvorčaść ułasnaha abstalavańnia i bolš aktyŭnamu ŭdziełu ŭ mižnarodnaj standartyzacyi.
Aficyjny pradstaŭnik administracyi Bajdena pryznaŭ, što Kitaj efiektyŭna vykarystoŭvaŭ 5G dla dasiahnieńnia svaich ekanamičnych metaŭ i metaŭ nacyjanalnaj biaśpieki, takich jak advajavańnie ŭ Zachada doli suśvietnaha rynku dla svaich telekamunikacyjnych kampanij, u tym liku Huawei Technologies Co.
Administracyja Biełaha doma taksama zasiarodziłasia na stvareńni i zachavańni pieravah i ŭ inšych halinach vysokich technałohij, dzie ZŠA sutykajucca z novymi vyklikami z boku Kitaja. Siudy ŭvachodziać vytvorčaść paŭpravadnikoŭ, kvantavyja vyličeńni i bijatechnałohii.
Paśla takich tryvožnych navinaŭ raduje tolki adno: ciapier dla ŭsich amataraŭ šapačak z falhi jość miesca, dzie možna (choć nienadoŭha) schavacca i adsiadziecca, pakul Bił Hiejts budzie pravodzić svaje žachlivyja vopyty nad nasielnictvam płaniety. Tak, my jašče letaś pisali, što Rasija zastałasia biez suviazi piataha pakaleńnia, bo adsutnaść abstalavańnia z-za sankcyj zakryła mahčymaść stvareńnia sietak 5G u Rasii, imavierna, na doŭhija hady.
Kamientary