Rasijanie nie mieli inšaha płana zachopu Kijeva, jak vysadka ŭ Hastomieli — Budanaŭ
Ciapier, pa słovach hałoŭnaha raźviedčyka Ukrainy, paŭtorny nastup akupantaŭ ź Biełarusi — niemahčymy.
Kiraŭnik ukrainskaj raźviedki zajaviŭ, što rasijskija akupanty nie mieli nijakaha inšaha płana zachopu Kijeva, akramia «ŭdałaj» vysadki desantu ŭ Hastomieli (aeraport za 30 kiłamietraŭ na paŭnočny zachad ad Kijeva, niepadalok ad biełaruskaj miažy — NN). Pra heta kiraŭnik Hałoŭnaha ŭpraŭleńnia raźviedki Minabarony Ukrainy Kirył Budanaŭ zajaviŭ u intervju Dźmitryju Kamarovu, piša «Ukrainskaja praŭda».
«Uvieś płan byŭ — heta imklivaja vysadka pasadačnym sposabam [na aeradrom Hastomiel] i adtul iści. Heta byŭ naohuł adziny płan… Pa-pieršaje, jany nie vieryli, što tut budzie supraciŭ naohuł, pa-druhoje, jany vieryli, što impetna vysadziacca, i samalot za samalotam buduć vyhružać padraździaleńni, jakija adrazu buduć uvachodzić u Kijeŭ».
Budanaŭ dadaŭ, što ceły dzień 24 lutaha 2022 hoda rasijanie sprabavali vysadzić tam desant, i śviata vieryli, što im heta ŭdasca.
Pavodle jaho, nie apošniuju rolu ŭ hetym adyhrała taja infarmacyja, jakuju raspaŭsiudžvała ŭkrainskaja raźviedka.
«Taja, u jakuju jany chacieli vieryć, jana ŭsio ž uziała vierch. Čamu kazali, što rasijanie tupyja, nie vieryli, što ŭsio ž budzie vajna: jany nie ŭziali z saboj palivazapraŭščykaŭ, u ich tanki spynialisia, nie było padvozu charčoŭ, heta ŭsio praŭda. (…) Nichto nie spadziavaŭsia vajavać, jak u Maryupali. Varyjantaŭ takich nie było. Jany vieryli, što nichto nie zmoža stvaryć im surjoznaje procidziejańnie, i jany zojduć va ŭradavy kvartał, źmieniać kiraŭnictva. Tak jak, na ich dumku, kiraŭnictva dziaržavy na hety čas pavinna było b kudyści biehčy, kali nie — jany jaho źniščyli b», — skazaŭ Kirył Budanaŭ.
Kiraŭnik HUR dadaŭ, što Rasija ciaham dvuch tydniaŭ mianiała datu ŭvarvańnia. Kančatkovuju infarmacyju ab napadzie a 4-j ranicy 24 lutaha Ukraina atrymała prykładna ŭ 15:00 23 lutaha.
U toj ža čas, jon ličyć, što kali b Rasii ŭdałosia vysadzicca ŭ Hastomieli, to «Kijeŭ byŭ by ŭziaty».
Sa słoŭ Budanava, aktyŭna Rasija pačała rychtavacca da ahresii suprać Ukrainy z 2007 hoda, a ŭ 2014 hodzie akupanty skarystalisia zručnym dla ich momantam.
Pry hetym jon ličyć, što vajna pamiž Ukrainaj i Rasijaj była niepaźbiežnaj.
Jon zajaviŭ, što RF chacieła pačać poŭnamaštabnaje ŭvarvańnie jašče ŭ sakaviku 2021 hoda, ale hetyja płany byli vykrytyja.
U čatach Kalinkavičaŭ raspaŭsiudžvajecca VIDEA, jakoje zafiksavała padzieńnie bieśpiłotnika8
Kamientary