Prezident Uładzimir Zialenski apublikavaŭ videa, na jakim ukrainskija vajskoŭcy paviedamlajuć, što vyzvalili z-pad rasijskaj akupacyi siało Staramajorskaje ŭ Danieckaj vobłaści.
«35-ja bryhada, a taksama bataljon siabroŭskaj terabarony «Arej», vykonvajučy zadańnie, vyzvalili siało Staramajorskaje. Słava Ukrainie!» — havorać u videa.
Zialenski prakamientavaŭ ubačanaje takimi słovami:
«Naš poŭdzień! Našy chłopcy! Słava Ukrainie!»
Namieśnica ministra abarony Hanna Malar taksama paviedamiła pra deakupacyju Staramajorskaha. «Staramajorskaje Danieckaj vobłaści vyzvalili. Ciapier našy vajskoŭcy praciahvajuć abaraniać nasieleny punkt», — napisała jana ŭ telehramie.
Toje, što ŭkrainskija ŭłady aficyjna paviedamili pra vyzvaleńnie hetaha nasielenaha punkta, aznačaje, što jany nie prosta ŭ jaho ŭvajšli, ale i nadziejna ŭ im zamacavalisia. Zvyčajna jak vajskoŭcy USU, tak i cyvilnyja čynoŭniki nie śpiašajucca zajaŭlać pra pośpiechi, kali niama poŭnaj upeŭnienaści, što situacyja na hetym učastku frontu ŭžo nie pavierniecca ŭ inšy bok.
Uvohule ž pra vyzvaleńnie ŭkraincami siała Staramajorskaje adrazu niekalki rasijskich vajenkaraŭ paviedamili jašče 16 lipienia.
Bai pad Staramajorskim išli bolš za miesiac. Siało znachodzicca ŭ dalinie rečki Mokryja Jały. Susiedni Raŭnopal byŭ vyzvaleny 26 červienia, Makaraŭka — u siaredzinie červienia.
Paśla pakidańnia Staramajorskaha rasijanie nie zdolnyja buduć utrymać susiedniaje Uražajnaje na inšym bierazie raki.
Z vyzvaleńniem hetych viosak ukrainskaja armija zakančvaje zrazańnie tak zvanaha Uremieŭskaha vystupu i vychodzić na pieršyja rubiažy «linii Suravikina» pad Staramłynaŭkaj.
Kamientary