U Mazyry kolkaść pamierłych ad pnieŭmanii dasiahnuła 9 čałaviek

U 100-tysiačnym horadzie z pačatku epidemii na pnieŭmaniju zachvareli amal 500 čałaviek. A ŭsiaho ŭ listapadzie na VRVI i hryp zachvareli bolš za 15 tys. žycharoŭ Mazyra i rajona.

Takija źviestki pryvioŭ hałoŭny doktar Mazyrskaj centralnaj haradskoj palikliniki Ihar Baranaŭ u intervju rajonnaj haziecie «Žyćcio Paleśsia».

Pavodle infarmacyi hałoŭnaha doktara, u listapadzie na VRVI i hryp zachvareli bolš za 15 tys. žycharoŭ Mazyra i rajona (u horadzie i rajonie pražyvaje 132 tys. čałaviek), u tym liku kala 6,5 tys. dziaciej da 14 hadoŭ. Samy vysoki rost zachvorvańnia byŭ zarehistravany 9—10 listapada. Najbolš schilnymi da chvarob akazalisia asoby va ŭzroście ad 18 da 54 hadoŭ i dzieci da 14 hadoŭ.

Za listapad zarehistravana kala 24 tys. naviedvańniaŭ paliklinik darosłymi i kala 14 tys. — dziećmi, doma ahledžana kala 5 tys. darosłych i bolš čym 6,5 tys. dziaciej.

«Hryp sioleta pryjšoŭ raniej času, u niecharakterny dla jaho pieryjad. Akramia taho, nichto nie čakaŭ takoha rezkaha ŭzdymu zachvorvańnia, i što jon paciahnie za saboj bolš niebiaśpiečnyja i ciažkija prajavy — uskładnieńni ŭ vyhladzie pnieŭmanii», — adznačaje ŭrač u hazietnym artykule. Pavodle jaho źviestak, za ŭvieś pieryjad prajšli stacyjanarnaje lačeńnie 452 chvoryja na pnieŭmaniju, vypisana paśla papraŭki 225 čałaviek. Zastajucca na lačeńni 185 darosłych i 41 dzicia. Dzieviać čałaviek znachodziacca ŭ adździaleńni reanimacyi, piać ź ich — na štučnaj vientylacyi lohkich i, pavodle słoŭ hałoŭnaha ŭrača, vyklikajuć «najbolšuju tryvohu».

Ad pnieŭmanii pamierli chvoryja va ŭzroście da 50 hadoŭ.

Adny mieli spadarožnuju patałohiju, u inšych nie było prablem sa zdaroŭjem da pastupleńnia ŭ balnicu. «My adznačali, što na praciahu niekalkich hadzin karcina mianiałasia małankava, i navat u ludziej, jakija znachodzilisia ŭ balnicy, paharšaŭsia kliničny stan. Akramia kisłarodnaj padtrymki prychodziłasia (i ciapier prychodzicca) skarystoŭvać štučnuju vientylacyju lohkich z‑za asablivaści paražeńnia lohačnaj tkanki, a mienavita paražeńnia nižnich adździełaŭ dychalnaj sistemy. Karcina ŭskładniajecca tym, što nazirajecca hipaksiemija, heta značyć nizkaje nasyčeńnie kryvi kisłarodam pa pryčynie taho, što paražajecca lohačnaja tkanka, što pryvodzić da paliorhannaj niedastatkovaści», — tłumačyć doktar.

Pavodle słoŭ Baranava, u Mazyrskim rajonie zarehistravana siem vypadkaŭ zachvorvańnia na hryp A (H1N1). Hety virus vydzieleny ŭ čatyroch pamierłych ad pnieŭmanii.

• 0
• 0
• 0
• 0
• 0
• 0
• 0
• 0