Fota: gettyimages
Niahledziačy na toje, što zmanlivy kantent byŭ narešcie vydaleny, aŭtarka Džejn Frydman, imiem jakoj prykryvalisia kavarnyja ŠI-piraty, niepakoicca, što adsutnaść vyraznaj, uzhodnienaj palityki ŭ Amazon i inšych padobnych kampanijach pakidaje adčynienymi dźviery dla inšych machlaroŭ.
Džejn Frydman — piśmieńnica i sapraŭdny vieteran amierykanskaj vydavieckaj industryi. Jana była prezidentkaj i hałoŭnaj vykanaŭčaj dyrektarkaj HarperCollins Publishers Worldwide, adnaho ź viadučych suśvietnych anhłamoŭnych vydaviectvaŭ.
U kamientary dla Gizmodo piśmieńnica raspaviała, što daviedałasia pra tvory samazvancaŭ, napisanyja ŠI, paśla taho, jak adzin ź jaje čytačoŭ natyknuŭsia na ich na Amazon i źviarnuŭsia da jaje niepasredna. Spačatku čytač padumaŭ, što dziŭnaja mova była sprobaj Frydman paekśpierymientavać z novym stylem piśma. Narešcie čytač zrazumieŭ, što adroźnieńni, vierahodna, byli bolšymi, čym prosta stylistyčnyja adchileńni.
Aŭtarka vyjaviła kala paŭtuzina knih, jakija pradavalisia na płatformie pad jaje imiem. Što jašče horš, Frydman skazała, što falšyvyja knihi dadajucca na jaje aficyjnuju staronku Goodreads — sajt ahladu knih, jaki naležyć Amazon, kudy mnohija čytačy źviartajucca, kab znajści tvory piśmieńnikaŭ.
Piśmieńnica padała zajavu ab parušeńni praz aficyjnuju formu Amazon i atrymała aŭtamatyčny adkaz. Kampanija paprasiła ŭ jaje rehistracyjnyja numary handlovych marak, čaho, pa słovach Frydman, u bolšaści aŭtaraŭ prosta niama. Amazon pieršapačatkova zakryŭ spravu i skazaŭ joj, što źmieściva nie budzie vydalena, pakolki jana nie vałodaje aŭtarskimi pravami na pracy štučnaha intelektu. Adnak praź niekalki hadzin pradstaŭnik Amazon źviazaŭsia z aŭtarkaj i skazaŭ, što jany razhladajuć spravu dalej.
Tym časam u (byłym užo) tvitary narastaŭ hramadski rezanans z boku inšych aŭtaraŭ i naziralnikaŭ. Narešcie Amazon byŭ vymušany vydalić fejkavyja tvory aŭtarki sa svajoj płatformy. Pradstaŭnik kampanii patłumačyŭ, što ŭ ich «jość dakładnyja rekamiendacyi pa źmieścivie», jakija rehulujuć, jakija knihi mohuć być vystaŭleny na prodaž.
Taksama ŭ zajavie Amazon byli, kaniešnie, i standartnyja słovy pra vitańnie vodhukaŭ ad aŭtaraŭ, abaviazkovaje vypraŭleńnie prablem u vypadku pamyłki i ŭkładańnie značnych srodkaŭ dla abarony ad złamyśnikaŭ. Ale kali pradstaŭnika kampanii paprasili ŭdakładnić, jakoje kankretnaje praviła abo punkt palityki kampanii byli parušanyja, što pryviało da vydaleńnia źmieściva, stvoranaha ŠI — Amazon admoviŭsia ad dalejšych kamientaroŭ.
Reziumujučy historyju, Frydman kaža, što kampanii pavinny surjozna pastavicca da padobnych prablem: «Havorka idzie nie pra toje, kab zakryć štučny intelekt va ŭsim śviecie, a pra toje, kab suisnavać ź im takim čynam, kab stvaralniki-ludzi pavažalisia i byli abaronienyja ad taho, što niekatoryja z drennych hulcoŭ źbirajucca zrabić z technałohijaj».
Čytajcie taksama:
U amierykanskich škołach zabaranili niekatoryja knihi zhodna z paradaj ChatGPT
Na biełaruskim telekanale prahnoz nadvorja viadzie štučny intelekt — Bahdan Zavirucha
U ZŠA vyprabavali ŭdarny bieśpiłotnik pad kiravańniem štučnaha intelektu
